Պատմության հետագծով

-1892 թ. մայիսի 19-ին ծնվել է Համո Բեկնազարյանը՝ հայ նշանավոր կինոռեժիսոր, սցենարիստ, կինոդերասան։ «Հայֆիլմ» կինոստուդիայի հիմնադիր։ ՀԽՍՀ ժողովրդական արտիստ (1935)։ 1914-ից նկարահանվել է կինոյում՝ հանդես գալով ավելի քան 70 ֆիլմում։ Դասվել է ռուսական համր կինոյի աստղերի շարքը։ 1925 թ. հրավիրվել է Երեւան Դանիել Դզնունու կողմից եւ ձեռնամուխ եղել հայկական կինոյի ստեղծմանը։ Նույն թվականին Բեկնազարյանը նկարահանել է «Նամուս» գեղարվեստական ֆիլմը, 1926-ին հայկական առաջին կինոկատակերգությունը՝ «Շոր եւ Շորշորը»։ Կինոյի համր շրջանի լավագույն գործերից են նաեւ նրա «Զարե» (1926 թ.), «Խասփուշ» (1927 թ.), «Տունը հրաբխի վրա» (1928 թ.) եւ այլ կինոնկարներ, որոնք խոշոր ներդրում են կինոարվեստի պատմության մեջ։ Բեկնազարյանը, համադրելով հայ դերասանական դպրոցի եւ գրականության բնորոշ առանձնահատկությունները, սկզբնավորել է կինեմատոգրաֆիայի ազգային ոճը։ Այդ սկզբունքը կինոռեժիսորը զարգացրել է իր հնչուն կինոնկարներում. դրանցից առաջինը «Պեպո» (1935 թ.) ֆիլմն էր, որը թեմայի խորությամբ, վառ արտահայտչականությամբ եւ կինոպատումի հզոր ոճով երեւույթ էր նաեւ համաշխարհային կինոարվեստում։

-1913 թ. մայիսի 19-ին ծնվել է Մկրտիչ Կորյունը՝ հայ բանաստեղծ, առակագիր:

-1928 թ. մայիսի 19-ին ծնվել է Սերգեյ Մերգելյանը՝ հայ մաթեմատիկոս, ԽՍՀՄ գիտությունների ակադեմիայի թղթակից անդամ (1953-ից, 1991-ից՝ ՌԳԱ), ՀԽՍՀ ԳԱ անդամ (1956-ից, 1993-ից՝ ԳԱԱ ), Ստալինյան մրցանակակիր (1952), Սուրբ Մեսրոպ Մաշտոց շքանշանակիր (2008)։ ԽՍՀՄ պատմության մեջ ամենաերիտասարդ գիտությունների դոկտորը (աստիճանը շնորհվել է թեկնածուական թեզը պաշտպանելիս 20 տարեկանում), ԽՍՀՄ գիտությունների ակադեմիայի ամենաերիտասարդ թղթակից անդամը (24 տարեկան)։ Ասպիրանտուրայում սովորելու տարիներին 20-ամյա Մերգելյանը լուծեց մաթեմատիկական ֆունկցիաների տեսության հիմնարար պրոբլեմներից մեկը, որի լուծումն ավելի քան 70 տարի չէր գտնվում։ Նրա ապացուցած թեորեմը՝ կոմպլեքս ֆունկցիաների հավասարաչափ բազմանդամային մոտարկման հնարավորության վերաբերյալ, դասական է համարվում եւ ներառված է Ֆունկցիաների տեսության դասընթացում։ Մերգելյանը կանգնած է եղել Հայաստանի հաշվողական տեխնիկայի զարգացման ակունքներում։

-1953 թ. մայիսի 19-ին ծնվել է Շավարշ Կարապետյանը՝ հայ ջրասուզորդ, աշխարհի եւ Եվրոպայի բազմակի չեմպիոն:

-1995 թ. մայիսի 19-ին ծնվել է Հովհաննես Գաբուզյանը՝ հայ շախմատիստ: