Տաղանդաշատ երիտասարդ երաժիշտներին բացահայտելու, մեծանուն կոմպոզիտոր Արամ Խաչատրյանի արվեստը հանրայնացնելու նպատակով Խաչատրյանի ծննդյան օրը՝ հունիսի 6-ին, Երեւանում մեկնարկեց Խաչատրյանի անվան 18-րդ միջազգային մրցույթը: Այն 2022-ին կանցկացվի թավջութակ մասնագիտությամբ։
Երեկ լրագրողների հետ հանդիպմանը մրցույթի հոգաբարձուների խորհրդի նախագահ Արմեն Սմբատյանն ասաց՝ այս տարի մրցույթին մասնակցում են երաժիշտներ Հայաստանից, Բելգիայից, Ռուսաստանից, Վենեսուելայից, Կորեայի Հանրապետությունից, Ճապոնիայից, Չինաստանից, Ռումինիայից, Մոլդովայից, Բելառուսից, Շվեյցարիայից, Իսպանիայից եւ Իտալիայից:
«Դիմել է 50-ից ավելի թավջութակահար, սակայն նախընտրական փուլը հաղթահարել եւ առաջին փուլին մասնակցելու իրավունք է ստացել 19 թավջութակահար: Մեր առաջնային նպատակն այն է, որ աշխարհում հնարավորինս շատ հնչի Արամ Խաչատրյանի երաժշտությունը: Այս մրցույթի շնորհիվ այսօր աշխարհում ավելի քան 5000 երաժիշտ կատարում է Խաչատրյանի կոնցերտները»,-նշեց Սմբատյանն ու ընդգծեց՝ բացման համերգը տեղի կունենա «Արամ Խաչատրյան» համերգասրահում:
Հայաստանի պետական սիմֆոնիկ նվագախմբի հետ որպես մենակատար հանդես կգա անվանի ջութակահար Քրիստոֆ Բարատին։ Համերգը կղեկավարի Սերգեյ Սմբատյանը։ Կհնչեն Արամ Խաչատրյանի սյուիտը «Դիմակահանդես» դրամայի համար գրված երաժշտությունից, Սպարտակի եւ Ֆրիգիայի ադաջոն «Սպարտակ» բալետից եւ կոմպոզիտորի Ջութակի կոնցերտը։
Արմեն Սմբատյանը տեղեկացրեց՝ մրցույթի ժյուրին կգլխավորի հանրահայտ ջութակահար Էդուարդ Վուլֆսոնը, որի սաներն հանդես են գալիս մեծ բեմերում։ Ժյուրիի կազմում են դիրիժոր Դմիտրի Յաբլոնսկին, Վեբերի փառատոնի հիմնադիր տնօրեն Մարտին Էնգստրոմը, 1999 թվականից Մարինյան թատրոնի գլխավոր թավջութակահար Օլեգ Սենդեցկին, վինագործների պատրաստած թանկարժեք ջութակների, ալտերի եւ թավջութակների շուկայում առաջատար գործակալություններից մեկի ղեկավար Քրիստոֆեր Րունինգը, թավջութակահար Իշտվան Վարդան, հինավուրց եւ ժամանակակից երաժշտության նվագախմբի ղեկավար, թավջութակահար Արամ Թալալյանը եւ թավջութակահար Յին Ջաոն:
Էդուարդ Վուլֆսոնի խոսքով՝ մեծ տոն է ոչ միայն Հայաստանի, այլեւ աշխարհի համար, քանի որ Արամ Խաչատրյանն ու նրա երաժշտությունը համամարդկային արժեքներ են: «Հետաքրքիր է, որ մրցույթի մասնակիցներն իրենց ելույթներն սկսում են՝ Բախի, Վեբերի եւ այլ հեղինակների գործեր հնչեցնելով, սակայն ավարտում են՝ Արամ Խաչատրյանի ստեղծագործությունները կատարելով: Բոլոր մասնակիցներին հորդորում եմ լինել հանգիստ, խաղաղ եւ ստեղծագործությունները կատարել սեփական ու յուրօրինակ մեկնաբանություններով, որովհետեւ դա է երաժշտության անկեղծության հիմքում»,- շեշտեց ջութակահարը:
«Արամ Խաչատրյան-մրցույթ» մշակութային հիմնադրամի գործադիր տնօրեն Մարտին Թովմասյանը, ներկայացնելով մրցույթի ընթացակարգը, հայտնեց, որ խաչատրյանական մրցույթը բաղկացած է երեք փուլից։ Հունիսի 7-ին եւ 8-ին տեղի կունենա մրցույթի առաջին փուլը, հունիսի 9-ին եւ 10-ին կանցկացվի երկրորդ փուլը, իսկ 11-ին եւ 12-ին՝ երրորդ եզրափակիչ փուլը։ Արդյունքները կամփոփվեն եւ կհայտարարվեն հունիսի 13-ին՝ մրցույթի փակման պաշտոնական արարողությանը։ Երկրորդ եւ երրորդ փուլերում մասնակիցների պարտադիր կատարման ծրագրում ներառված են նաեւ Խաչատրյանի ստեղծագործությունները։
Մրցույթի առաջին մրցանակակիրը կարժանանա 10 000 ԱՄՆ դոլարին համարժեք դրամական պարգեւի, երկրորդ տեղը զբաղեցնող մասնակիցը կստանա 5 000 ԱՄՆ դոլարին համարժեք դրամի չափով մրցանակ, իսկ երրորդ հորիզոնականը զբաղեցնող մասնակիցը կպարգեւատրվի 3 000 ԱՄՆ դոլարին համարժեք դրամով։ Նախատեսված են նաեւ հատուկ մրցանակներ, որոնց մասին կհայտարարվի մրցույթի փակման արարողության ժամանակ։ Ասուլիսից անմիջապես հետո տեղի ունեցավ վիճակահանություն, եւ որոշվեց մրցույթի մասնակիցների ելույթների հերթականությունը։
