«Արվեստագետ» կրթամշակութային հասարակական կազմակերպության նախագահ Իվան Անտոնյանի նախաձեռնությամբ լոռեցի մի խումբ մտավորականներ այցելեցին Հովհաննես Թումանյանի ծննդավայր Դսեղ, գրողի տուն-թանգարան: Նրանք Ամենայն հայոց բանաստեղծին հարգանքի տուրք մատուցեցին գյուղի հրապարակում տեղադրված նրա հուշարձանի մոտ: Տուն-թանգարանում նրանց դիմավորեց տնօրեն Ռոզա Ղազումյանը: Ցուցասրահում Ի. Անտոնյանն անդրադարձավ ՀՀ ժողովրդական նկարիչ Հրանտ Թադեւոսյանի «Ներիր ինձ, Գիքոր» կտավի ստեղծման պատմությանը, որը հեղինակը Հովհ. Թումանյանի 150-ամյակին ընդառաջ «Արվեստագետ» ՀԿ-ի նախաձեռնությամբ նվիրել է թանգարանին: Ապա Ռոզա Ղազումյանը հյուրերին ուղեկցեց բանաստեղծի սենյակ, որտեղ ներկաներն ասմունքեցին Թումանյանի քառյակներից:
Հուշակոթողի մոտ, որտեղ ամփոփված է բանաստեղծի սիրտը, Ի. Անտոնյանը հրապարակեց «Արվեստագետ» ՀԿ-ի որոշումը՝ Վանդոս Ղարագյոզյանին հանձնելով «Հովհաննես Թումանյան-150» հուշամեդալը:
Հայաստանի գրողների միության նախագահության անդամ, ՀԳՄ Լոռու մարզային բաժանմունքի նախագահ, բանաստեղծ Մանվել Միկոյանը եւ Վանաձորի Հովհ. Թումանյանի անվան պետական համալսարանի պատմության ամբիոնի վարիչ, պատմական գիտությունների դոկտոր, պրոֆեսոր Ֆելիքս Մովսիսյանը գնահատանքի խոսքեր ասացին եւ շնորհավորեցին մանկավարժական գիտությունների դոկտոր, պրոֆեսոր, Վանաձորի պատվավոր քաղաքացի, Լոռվա ասպետ Վանդոս Ղարագյոզյանին՝ ողջունելով Ի. Անտոնյանի նախաձեռնությունը:
ՀՀ վաստակավոր արտիստ, Վանաձորի «Հորովել» երգի-պարի համույթի մենակատար Ստեփան Դալլաքյանը եւս շնորհավորեց Վ. Ղարագյոզյանին, ապա կատարեց գուսան Զաքարյանի «Անմահ Թումանյան» երգը: Վ. Ղարագյոզյանը շնորհակալություն հայտնեց պարգեւի համար՝ նշելով, որ այն իր ունեցած պարգեւների մեջ ամենաթանկն է, ապա արտասանեց Ամենայն հայոց բանաստեղծի քառյակներից:
Գագիկ ԱՆՏՈՆՅԱՆ
Լոռի
