Օրեր առաջ Արցախի մայր թատրոնի 90-ամյա հոբելյանի կապակցությամբ թերթում տպագրված հարցազրույցում, ի թիվս մի շարք հարցերի, մտահոգություն էր հայտնվում մշակութային ժառանգության պահպանման, շենքային պայմանների բարելավման վերաբերյալ: Մասնավորապես՝ մատնանշվում էր թատրոնի՝ ճարտարապետական բացառիկ արժեք ներկայացնող շենքի տխուր ճակատագիրը: Ահա արդեն 15 տարի է, ինչ այն վտանգված է, գտնվում է փականքի տակ՝ եւ ներկայացումներ չեն բեմադրվում: Շենքի հիմնանորոգման եւ վերականգնողական աշխատանքների անհրաժեշտությունը բազմիցս է քննարկման առարկա դարձել կառավարությունում: Խնդիրն արծարծվել է ընդհուպ նախագահի մակարդակով: Մինչեւիսկ վերակառուցման նպատակով «առաջ են քաշվել» մի շարք տարբերակներ (խոսքը մշակված նախագծերի մասին է): Ցավոք, այդ խոստումներն ու խոսակցությունները, առիթից առիթ շրջանառվելուց բացի, կյանքի չեն կոչվել: Եվ տարիների ընթացքում լքված եւ անտեսված շինության վիճակը վատթարացել է: Հարցազրույցի հրապարակումից հետո կարծես ԱՀ իշխանությունների ուշադրությունը նորից սեւեռվել է հոգսաշատ թատրոնի խնդիրների, հատկապես շենքի վերանորոգման չարչրկված հարցի վրա: Պետնախարար Արտակ Բեգլարյանի մոտ հրավիրված աշխատանքային խորհրդակցությունում, որին ներկա էին կրթության, գիտության, մշակույթի եւ սպորտի նախարարության ու մի շարք այլ գերատեսչությունների պատասխանատուներ, Հայ առաքելական եկեղեցու Արցախի թեմի ներկայացուցիչներ, շահագրգիռ քննարկումներ են ծավալվել պետական թատրոնի հին շենքի վերակառուցման նոր նախագծի շուրջ, որտեղ մասնագետների կողմից արվել են խելամիտ առաջարկություններ:
Պետնախարարը, որպես պատմամշակութային ժառանգություն, որպես ճարտարապետական կոթող, կարեւորելով շենքի վերականգնումը եւ թատրոնի դերը մշակութային (թատերական) կյանքի աշխուժացման, լավագույն ավանդույթների պահպանման ու զարգացման գործում, հանձնաժողովի անդամներին հորդորեց քննարկումների ժամանակ ավելի ակտիվ եւ անաչառ գտնվել ու հավանության արժանացնել «առավել համոզիչ եւ հիմնավորված նախագիծը»: ԿԳՄՍ փոխնախարար Լեռնիկ Հովհաննիսյանի կարծիքով՝ նախարարության գիտամեթոդական խորհրդի կողմից ներկայացվող նախագիծը թատրոնի վերակառուցման-վերականգնողական աշխատանքների վերաբերյալ՝ քննարկումների մի քանի փուլ է անցել, եւ այն «լիազոր մարմնի կողմից հաստատվելուց հետո», հավանաբար, շինաշխատանքները գործնական բնույթ կստանան: Նրա խոսքով՝ գերատեսչական խորհրդի անդամները ոչ բոլոր հարցերում են միակարծիք եղել, սակայն քննարկումների ընթացքում այդ շեշտադրումները հստակեցվել, ամբողջացվել են, եւ արդյունքում սկզբունքային հարցերի շուրջ գրեթե միասնական կարծիք է ձեւավորվել:
Ինչպես ճեպազրույցի ժամանակ լրագրողներին տեղեկացրել է Լ. Հովհաննիսյանը, վերակառուցման աշխատանքների ընթացքում հաշվի կառնվի «վիճարկման յուրաքանչյուր մանրուք», որպեսզի չխաթարվի շենքի պատմաճարտարապետական տեսքը, եւ նորոգումներն ընթանան պատշաճ որակով: Փոխնախարարն այն համոզմունքն ունի, թե թատրոնի շենքի վերականգնումը կնպաստի մշակութային միջավայրի պահպանմանը եւ թատերական արվեստի զարգացմանը, «հանդիսատեսը նորից հայացքով կշրջվի դեպի նորոգ օջախ եւ կվերականգնի իր հիշողությունները»:
Այդ հանգամանքն իր խոսքում կարեւորեց ճարտարապետ Սերգեյ Գալստյանը, որի հեղինակած նախագիծն այսօր հիմք է ծրագրին ձեռնամուխ լինելու համար: Ասել է թե՝ քննարկումներն ավարտական փուլ են թեւակոխել, ու «սայլը տեղից կարծես շարժվում է» արդեն:
Վերջում Լեռնիկ Հովհաննիսյանը հավաստիացրեց, թե այլեւս հապաղելու ժամանակ չկա, եւ «շուտով կմեկնարկեն վերակառուցման աշխատանքները»: Ի պատասխան այն հարցի, թե որտեղից կհայթայթվեն ենթադրվող գումարները, նա նշեց, որ շինարարությունը կիրականացվի ինչպես պետական, այնպես էլ՝ բարեգործական միջոցների հաշվին:
