Հայաստանի գրողների միությունում նախօրեին տեղի ունեցավ «Օդապարիկ արեւը» գրքի շնորհանդեսը։ Գրքում Հայաստանի մանկագիրների գործերն են՝ նվիրված մանուկներին։
Ինչպես նշեց բանաստեղծ, հեքիաթագիր Սաթենիկ Ղազարյանը. «Չկա այսպիսի գիրք, սա առաջինն է մեր ժամանակում: Բոլորս էլ ունենք մեր գրքերը` մանկական, սակայն սա առաջինն է, որովհետեւ հավաքել ենք բոլոր մանկագիրների գործերը, որոնցից պատրաստել ենք ժողովածու, որը կարող է լինել նաեւ քրեստոմատիա»։
Շնորհանդեսին ելույթներով հանդես եկան Հայաստանի գրողների միության նախագահ, բանաստեղծ, մանկագիր Էդվարդ Միլիտոնյանը, արձակագիր, բանաստեղծ, թարգմանիչ, «Օդապարիկ արեւը» գրքի հրատարակիչ Վան Արյանը, խմբագիր, հրապարակախոս, արձակագիր Տիգրան Նիկողոսյանը եւ այլք, որոնք բոլորն էլ իրենց ներդրումն են ունեցել այս գրքի ստեղծման գործում։
Իր խոսքում հրատարակիչը` Վան Արյանը, մասնավորապես նշեց. «Ես հաճելիորեն զարմացել եմ այս գրքի մեջ ընդգրկված մեր հայ մանկագիրների այսպիսի բարձր մակարդակից: Ինձ թվում է՝ ցանկացած մարդ, ով ձեռքը կվերցնի այս գիրքը, իմ պես զարմացած կմնա եւ գոհ կլինի, որ մենք ունենք այսպիսի գրականություն»։
Գիրքը ներառում է պոեզիա եւ արձակ, բոլոր ստեղծագործությունները մանուկների համար են, եւ գրեթե բոլոր ելույթ ունեցողները նշեցին, որ գիրքն առանձնանում է մյուս ժամանակների բոլոր գրքերից, այն իր տեսակով առաջինն է։
Անուշ ՀԱՅՐԻՅԱՆ
ՀՊՄՀ, լրագրության 2-րդ կուրս
