Խորհրդային նշանավոր հրամանատար, Հայրենական մեծ պատերազմի բանակների եւ ճակատների հրամանատար, Խորհրդային Միության կրկնակի հերոս, մարշալ Հովհաննես Քրիստափորի Բաղրամյանի ծննդյան 125-ամյակի առթիվ նրա ծննդյան օրը՝ դեկտեմբերի 2-ին, Մոսկվայում տեղի է ունեցել «Հաղթանակի արվեստը. մարշալ Բաղրամյան» վավերագրական ֆիլմի պրեմիերան: Կինոնկարը ցուցադրվել է Մոսկվայի «Поклонная гора» հուշահամալիրի Հաղթանակի թանգարանի պատերին:
Մարշալ Բաղրամյանը յուրահատուկ ու հարուստ կենսագրություն է ունեցել՝ լի վերելքներով ու վայրէջքներով, անհավանական հաջողություններով եւ ճակատագրի ողբերգական շրջադարձերով։ Նրան վիճակված էր մասնակցելու Հայրենական մեծ պատերազմի առաջին ամիսների ամենաարյունալի մարտերին, որտեղ կարողացել է հզոր դիմադրություն կազմակերպել՝ ճնշելով հակառակորդին։
Նացիստների դեմ Բաղրամյանի իրականացրած բազմաթիվ ռազմական գործողություններ մինչ օրս մանրակրկիտ ուսումնասիրվում են աշխարհի բոլոր ռազմական ակադեմիաներում: «Բագրատիոն» գործողությունը հավերժ կմնա օրինակ եւ կրկնօրինակման առարկա: Մերձբալթյան երկրների ազատագրումը, չորս օրում Քյոնիգսբերգի անառիկ ամրոցի գրավումը մարշալ Բաղրամյանի ծրագրած եւ հաջողությամբ իրականացված ամենայուրահատուկ գործողություններն են։
Սակայն նրա ռազմական արվեստի գագաթն է համարվում «Անադիր» գործողությունը: Անցնելով չորս պատերազմ՝ Առաջին աշխարհամարտից մինչեւ քաղաքացիական պատերազմ, խորհրդա-ֆիննական պատերազմից մինչեւ Երկրորդ համաշխարհային պատերազմ, մարշալ Բաղրամյանն իր անունը ոսկե տառերով գրեց Խորհրդային Միության ժողովուրդների պատմության մեջ։
«Ժառանգություն եւ առաջընթաց» հիմնադրամի նախագահ Արմայիս Կամալովը նշել է, որ Բաղրամյանն այն մարդկանցից է եղել, որն իր գեներալների, սպաների եւ զինվորների հետ կարողացել է հասնել հաղթանակի Հայրենական մեծ պատերազմում: ՌԴ-ում Հայաստանի Հանրապետության արտակարգ եւ լիազոր դեսպան Վաղարշակ Հարությունյանն էլ շեշտել է, որ Խորհրդային Միությունում հզոր մարշալներ են եղել, որոնք համաշխարհային հաղթանակ են տարել, եւ աշխարհը գնահատում է նրանց:
«Ժառանգություն եւ առաջընթաց» հիմնադրամի անդամ, ֆիլմի գաղափարի հեղինակ եւ գլխավոր պրոդյուսեր Արթուր Սողոմոնյանն էլ ընդգծել է, որ նա որոշել է վավերագրական ֆիլմեր նկարահանել հինգ հայ մեծանուն մարշալների մասին: Նա հետաքրքիր է համարել այն, որ հինգ մարշալն էլ ծնունդով Ղարաբաղից են: Նրա խոսքով՝ ֆիլմերը պարզապես կենսագրականներ չեն, այլ փորձ՝ բացահայտելու մարշալների անձը:
Միջոցառմանը ներկա են եղել Հայրենական մեծ պատերազմի հրամանատարների հարազատները, Ռուսաստանի հերոսներ, զինված ուժերի տարբեր ստորաբաժանումների զինվորականներ, լրագրողներ, պատմաբաններ, հասարակական գործիչներ եւ Մարշալ Բաղրամյանի ընտանիքի ընկերները։
