Հունվարի 27-ին, ժամը 19:00-ին «Արամ Խաչատրյան» համերգասրահում կնշվի մաեստրո Տիգրան Մանսուրյանի տարեդարձը: Համերգը նախաձեռնել է «Կողբ» հիմնադրամը եւ անցկացվում է Մանսուրյանի անվան կոմպոզիտորների միջազգային մրցույթի շրջանակում։
Մանսուրյանի անվան կոմպոզիտորների միջազգային մրցույթի կազմակերպիչների փոխանցմամբ, համերգային ծրագրում հնչելու են Տիգրան Մանսուրյանի ստեղծագործությունները։ Կկայանա «8 հայրեն սիրո, պանդխտության եւ լուսնյակ գիշերների» ստեղծագործության համաշխարհային պրեմիերան։ Երաժշտասերները հնարավորություն կունենան ունկնդրելու նաեւ «Օրհներգ-Նավապետ Բարի» ստեղծագործությունը, խոսք` Մեսրոպ Մաշտոցի։ Այն Հայաստանում հնչելու է առաջին անգամ։ Համերգը կրում է «Մանսուրյան. խոսքի եւ մեղեդու խաչմերուկին» խորագիրը եւ կներկայացնի երաժշտության ու պոեզիայի գեղեցիկ ներդաշնակությունը։
Երեկոյի ընթացքում ելույթ կունենան Հայաստանի պետական կամերային նվագախումբը (գեղարվեստական ղեկավար եւ գլխավոր դիրիժոր՝ Վահան Մարտիրոսյան), Հայաստանի պետական կամերային երգչախումբը (գեղարվեստական ղեկավար եւ գլխավոր դիրիժոր՝ Ռոբերտ Մլքեյան) եւ Երեւանի պետական կամերային երգչախումբը (գեղարվեստական ղեկավար եւ խմբավար՝ Քրիստինա Ոսկանյան)։ Հանդես կգան նաեւ բարիտոն Տիգրան Քախվեջյանը, ասմունքող Բաբկեն Չոբանյանը։ Համերգը կղեկավարի դիրիժոր Ռոբերտ Մլքեյանը։
