ՀԱԷԿ-ում են «Գազպրոեկտն» ու «Գրոսսը»

Հայկական ատոմակայանում շարունակվում են ամենամյա պլանային նախազգուշական վերանորոգման (ՊՆՎ -2021) աշխատանքները։ ՀԱԷԿ-ում են ռուսական «Գազպրոեկտ» («КТПИ «Газпроект») եւ ուկրաինական «Գրոսս» (ФПК «Гросс») բաց բաժնետիրական ընկերությունների ներկայացուցիչները։

Հատկապես ի՞նչ գործ են նրանք անում ատոմակայանում. «ՀՀ»-ն փորձեց ճշտել ՀԱԷԿ ՓԲԸ գլխավոր տնօրենի առաջին տեղակալ, հայկական ատոմակայանի տնօրեն Մովսես Վարդանյանից։

Ըստ ՀԱԷԿ-ի տնօրենի՝ կենտրոնացված վերանորոգումների արտադրամասի եւ  «Գազպրոեկտի» մասնագետների մասնակցությամբ իրականացվում են ՀԱԷԿ-ի թիվ 2 էներգաբլոկի ռեակտորի գլխավոր անջատատեղի մանեկապտտչի արդիականացման աշխատանքներ՝ դրա շահագործման ժամկետը երկարացնելու նպատակով: Վերանորոգման շրջանակներում կատարվում են մի շարք համալրող մասերի եւ համակարգերի (մասնավորապես՝ էլեկտրական համակարգի բաղադրամասեր, կառավարման համակարգ, հիդրավլիկ համակարգի բաղադրամասեր եւ խողովակաշարեր) փոխարինում, մեխանիզմների լրամշակում (М140 գամասեղների ամբարձիկներ) եւ այլն:

Ի դեպ, այս աշխատանքների արդյունավետությունն ապահովելու նպատակով «Գազպրոեկտ» ընկերությունն այնուհետեւ նախատեսում է անցկացնել մի շարք ստուգումներ, ինչպեսեւ ուսուցման դասընթացներ ՀԱԷԿ-ի համապատասխան անձնակազմի համար:

Ինչ վերաբերում է «Գրոսս» ընկերության աշխատանքին։ «ՀԱԷԿ» ՓԲԸ-ի եւ «Գրոսս» ԲԲԸ-ի միջեւ կնքված պայմանագրի շրջանակներում նախատեսված են ՀԱԷԿ-ի տեխնիկական աջակցությանն ուղղված մի շարք ծառայություններ, մասնավորապես՝ 15Д100 դիզել-գեներատորների վերանորոգման, շահագործման, վթարային իրավիճակների եւ պլանային սպասարկման:

Այս պահին «ՀԱԷԿ»-ի կենտրոնացված վերանորոգումների արտադրամասի մասնագետների եւ ուկրաինացի գործընկերների համատեղ ջանքերով իրականացվում են դիզել-գեներատորների ընթացիկ վերանորոգման աշխատանքները: Մասնակիորեն փոխարինվել են դիզելների հովացման համակարգի ռետինատեխնիկական պատրաստվածքները: Իրականացվել է  սեղմման ճնշման եւ աշխատանքային ճնշման ստուգում՝ ըստ դիզելների գլանների, եւ արտանետված գազերի ջերմաստիճանների տարբերության կարգավորում՝ ըստ գլանների:

Նկատենք, որ «Գրոսս» ընկերության հետ Հայկական ԱԷԿ-ն արդեն տարիներ շարունակ ակտիվ համագործակցություն է ծավալում. դիզել-գեներատորների հիմնանորոգումից սկսած մինչ օրս ընկերության մասնագետները շարունակում են իրականացնել սպասարկման եւ նորոգման այլ տարաբնույթ աշխատանքներ:

Մովսես Վարդանյանը մեկ ճշգրտում արեց. «Գրոսս»-ը, ճիշտ է, այս պահին աշխատանքներն ավարտել է, «բայց մեկ ստուգում կա օրեր անց (տեխնոլոգիապես հետո պետք է արվեր), կստուգեն, հետո նրանց աշխատանքը կհամարենք ավարտված»։