Հայկական ատոմակայանի թեման «ՀՀ»-ն միշտ է ուշադրության կենտրոնում պահել՝ հասկանալի առաջնային երկու պատճառով. 1. ՀԱԷԿ-ը մեզ համար ունի աշխարհաքաղաքական եւ էներգետիկ անվտանգության նշանակություն, 2. Թուրքիան եւ Ադրբեջանը միջազգային ամենատարբեր հարթակներում աշխատում են ՀԱԷԿ-ի դեմ, իսկ մենք մեր հանրությանը թյուրըմբռնումներից զերծ պահելու համար, բացատրում ենք առաջ քաշված վարկածների սնանկությունը։ Հանրությա՛նը, որովհետեւ եւ՛ մեր, եւ՛ միջազգային մասնագիտական հատվածը տեղյակ է ՀԱԷԿ-ում կատարվող աշխատանքներից, արդյունքներից։
Իսկ այս տարի ՀԱԷԿ-ի հանդեպ մեր ուշադրությունը կրկնապատկել ենք՝ պայմանավորված պլանային նախազգուշական վերանորոգման աշխատանքների (ՊՆՎ) աննախադեպ ծավալով եւ նպատակով՝ կայանի շահագործման ժամկետի երկարաձգման անհրաժեշտությամբ, ինչը մեր պետության համար ռազմավարական նշանակություն ունի։
Ինչեւէ, հիմա ՀԱԷԿ-ում է «VUEZ a. s.» ընկերությունը (Սլովակիա), որը տարիներ շարունակ գործունեություն է ծավալում ատոմային կայաններում ոչ միայն Սլովակիայում, այլեւ եվրոպական երկրներում, Ռուսաստանում, Ուկրաինայում: Մասնավորապես ի՞նչ է անում մեր կայանում։
Ինչպես «ՀՀ»-ին տեղեկացրեց ՀԱԷԿ ՓԲԸ գլխավոր տնօրենի առաջին տեղակալ, հայկական ատոմակայանի տնօրեն Մովսես Վարդանյանը, միջուկային անվտանգության բնագավառում միջազգային համագործակցության INSC-2017 ծրագիր կա, որն ուղղված է Հայկական ԱԷԿ-ին տեխնիկական օգնություն տրամադրելուն: Այդ օգնության բաղկացուցիչ մասն է նաեւ ՀԱԷԿ-ի թիվ 2 էներգաբլոկի հերմետիկ գոտու կիպության բարձրացման նախագիծը: Եվ այս նախագծին մասնակցում է «VUEZ a. s.» ընկերությունը։
Եթե ավելի պարզ խոսենք այս աշխատանքի նշանակության մասին, ապա ռեակտորին կից հերմետիկ գոտին էներգաբլոկում վթարի դեպքում խոչընդոտում է շրջակա միջավայր ճառագայթաակտիվ նյութերի ներթափանցումը եւ ապահովում է ատոմային էլեկտրակայանի մերձակայքում ապրող բնակչության անվտանգությունը: Նախագծի նախնական փուլն ուղղված էր նախապատրաստական աշխատանքներին եւ այն փաստաթղթերի մշակմանը, որոնց համաձայն կիրականացվեն հերմետիկ գոտու անկիպությունների հայտնաբերումն ու վերացումը եւ դրանց վերացման արդյունավետության ստուգումը: Հիմա «VUEZ a. s.» ընկերության աշխատակիցները Հայկական ԱԷԿ-ի մասնագետների հետ միասին հայտնաբերել ու վերացրել են թիվ 2 բլոկի հերմետիկ գոտու անկիպությունները:
«Եվ, ի դեպ, խոսքը ոչ միայն թիվ 2 էներգաբլոկի հերմետիկ գոտու, այլեւ աշխատած միջուկային վառելիքի պահման ավազանի կիպության բարձրացման մասին է։ Ու այս աշխատանքներն անում են միայն ՊՆՎ-ների ժամանակ»,- ասաց Մ. Վարդանյանը։
Նա հավելեց, որ նախագծի շրջանակներում իրականացվելու է նաեւ ՀԱԷԿ-ի համապատասխան անձնակազմի ուսուցում, որի արդյունքում կայանի մասնագետները կկարողանան ինքնուրույն հայտնաբերել եւ վերացնել հերմետիկ գոտու նոր առաջացած անկիպությունները: Հաջորդ փուլը նախատեսվում է իրականացնել օգոստոս-սեպտեմբերին: Աշխատանքներն ավարտելուց հետո, այսինքն՝ ՊՆՎ-2021-ի վերջում կանցկացվի հերմետիկ գոտու կիպության համալիր փորձարկում:
Նախագիծը կշարունակվի մինչեւ 2024 թ.։ Անկիպությունների վերացման աշխատանքները կիրականացվեն ամենամյա պլանային վերանորոգումների ընթացքում:
