Պետական եկամուտների կոմիտեն ընդլայնում է էլեկտրոնային հարթակում մատուցվող մաքսային ծառայությունները: Եվ, ինչպես ՊԵԿ-ն է վստահեցնում, «հաշված րոպեների ընթացքում տնտեսավարողները կարող են կատարել իրենց մաքսային պարտավորությունները բանկային քարտով վճարման միջոցով»։
Հուլիսի 1-ից ներդրված վճարումների էլեկտրոնային համակարգը թույլ է տալիս տնտեսավարողներին բանկային քարտով վճարման միջոցով կատարել իրենց մաքսային պարտավորությունները առանց մաքսային մարմինների հետ շփման, առանց բանկ եւ մաքսատուն այցելելու՝ իրենց իսկ գրասենյակներից։
Մաքսային եւ այլ վճարներն էլեկտրոնային եղանակով իրականացնելու համար տնտեսավարողները «Ազգային մեկ պատուհան» համակարգի միջոցով մուտք են գործում «Վճարումների կենտրոնացված հաշվառում» համակարգ եւ վայրկյանների ընթացքում կատարում անհրաժեշտ վճարումները:
Համակարգը, ինքնաշխատ եղանակով քարտային վճարում իրականացնելուց հետո, պետական վճարումների էլեկտրոնային հարթակից ստացված հաստատումներից հետո տվյալ պարտավորությունը համարում է մարված։ Սա մաքսային մարմինների կողմից ներմուծվող կամ արտահանվող ապրանքները բաց թողնելու հիմք է դառնում։
Էլեկտրոնային նոր հարթակի գործարկումը, ըստ ՊԵԿ-ի, հատկապես կարեւոր է համավարակի տարածման պայմաններում։
Այսպիսով` եւ՛ մաքսային մարմինների ծանրաբեռնվածությունն է պակասում, եւ՛ տնտեսավարողներն են ժամանակ ու նյարդեր խնայում։ Բացի այդ, միջնորդավճարն է անհամեմատ ցածր, քան բանկերում։
ՊԵԿ-ից վստահեցնում են, որ այս համակարգը նաեւ նպաստում է հսկողական աշխատանքների արդյունավետության բարձրացմանը։ Մեկ հարթակում հսկվում է վճարումների ամբողջ շարժը՝ նվազեցնելով ռիսկերը։
