Բրյուսելյան վերջին հանդիպման շեշտադրումները հիմնականում նույնն էին, ինչ նախորդ հանդիպումներինը: Դրանք աստիճանաբար ավելի շատ վերածվում են աշխատանքային քննարկումների, քանի որ օրակարգային հարցերը պարզ են, եւ խնդիրը դրանց կատարման ընթացքը խթանելն է: Մայիսի 22-ին ՀՀ վարչապետ Նիկոլ Փաշինյանի, Եվրոպական խորհրդի նախագահ Շառլ Միշելի եւ Ադրբեջանի նախագահ Իլհամ Ալիեւի եռակողմ հանդիպման ժամանակ հիմնական օրակարգային հարցերը եղել են տարածաշրջանային հաղորդակցության ուղիների բացմանն ուղղված աշխատանքների հետագա ընթացքը, սահմանագծման ու անվտանգության խնդիրներով հանձնաժողովների աշխատանքների մեկնարկը:
Այս հանդիպման կարեւորությունն այն է, որ դրա ընթացքում Բաքվի առաջնորդը սկսել է ավելի իրատեսական մտածողության տարրեր ցուցաբերել: Ի տարբերություն նախկինում արած պնդումներին, թե արցախյան հարց գոյություն չունի, քանի որ Ադրբեջանը Թուրքիայի հետ այն պատերազմի միջոցով է լուծել, Բրյուսելի եռակողմ հանդիպման ժամանակ Ալիեւը բանակցային սեղանի շուրջ քննարկել է նաեւ Արցախի Հանրապետության խնդրին հիմնարար կարգավորում տալու հարցերը: Հակամարտող կողմերից, միջնորդ եւ տարածաշրջանային երկրներից, թերեւս, միայն Ադրբեջանի ղեկավարությունն էր մնացել, որը չէր ուզում տեսնել հանրահայտ ճշմարտությունը, այն է՝ տարածաշրջանում կայունություն եւ խաղաղություն հաստատելու համար պետք է լուծվի հակամարտության հիմքը՝ Արցախի ժողովրդի ինքնորոշման իրավունքի հարցը, այլ կերպ ասած՝ Արցախի կարգավիճակը: Հանդիպման ժամանակ ձեռք են բերվել նաեւ այլ կարեւոր համաձայնություններ, մասնավորապես՝ երկրների տարածքներով տարանցման վերաբերյալ:
Եռակողմ քննարկումներին հաջորդած Շառլ Միշելի հայտարարության մեջ ասվում է. «Երկրների ղեկավարները պայմանավորվել են տրանսպորտային հաղորդակցությունների ապաշրջափակման անհրաժեշտության մասին։ Նրանք համաձայնեցրել են սկզբունքներ, որոնք կարգավորում են տարանցումը Ադրբեջանի արեւմտյան մասից դեպի Նախիջեւան եւ Հայաստանի տարբեր մասերի միջեւ` Ադրբեջանի տարածքով, ինչպես նաեւ միջազգային փոխադրումները` երկու երկրների հաղորդակցային ենթակառուցվածքներով։ Նրանք, մասնավորապես, պայմանավորվել են սահմանների կառավարման, անվտանգության, տարածքային տուրքերի, ինչպես նաեւ միջազգային փոխադրումների մաքսատուրքերի սկզբունքների մասին»։
Այլ կերպ ասած՝ հանդիպմանն ամրագրվել է, որ թյուրքական պետությունների պատկերացրած «Զանգեզուրի միջանցքը» չի կարող լինել, եւ պետությունների միջեւ հաղորդակցությունը նրանց մաքսային կարգավորումների ու պետությունների ինքնիշխան իրավունքների, տարանցումը կանոնակարգող առկա օրենքների նորմերի համաձայն է իրականացվելու:
Միշելը նաեւ հայտնել է, որ երկու ղեկավարների համար ընդգծել է Արցախի Հանրապետության էթնիկ հայ բնակչության իրավունքների եւ անվտանգության հարցերի լուծման անհրաժեշտությունը։ Ասվածի համատեքստում Արցախի ժողովուրդը բազմիցս հանրաքվեների ու ընտրությունների միջոցով բարձրաձայնել եւ այսօր էլ հայտարարում է, որ Ադրբեջանի կազմում չի տեսնում իր ապագան, ուստի այդ որոշումների շրջանակում է լինելու իր ինքնորոշման իրավունքի իրացումը:
Բրյուսելյան հանդիպմանը զուգահեռ՝ Գյումրիից մի քանի տասնյակ կիլոմետր հեռու, Կարսում տեղի ունեցան թուրք-ադրբեջանական համատեղ լայնածավալ զորավարժությունները։ Տխուր ավանդույթի համաձայն՝ նման հանդիպումներից առաջ ադրբեջանաթուրքական կողմը ուժի ցուցադրության գործողություններ է անում, եւ, ինչպես միշտ է լինում, բրյուսելյան վերջին հանդիպման նախօրեին էլ ադրբեջանական զինուժը սադրանքներ ձեռնարկեց հայ-ադրբեջանական սահմանին, ինչի հետեւանքով ՀՀ ԶՈՒ-ն ունեցավ մեկ վիրավոր: Մյուս կողմից էլ Կարսի զորավարժությունը հստակ ուղերձներ է պարունակում նաեւ ՌԴ-ի համար, քանի որ այն անցկացվում է ռուսական 102-րդ ռազմաբազայի մշտական տեղակայման վայրի հարեւանությամբ:
Ռուսաստանը, ամենայն հավանականությամբ, կարձագանքի այդ զորավարժությանը եւ բրյուսելյան հանդիպմանը: Ուկրաինական հակամարտության պատճառով Արեւմուտք-ՌԴ սրված հարաբերությունները թույլ չեն տա Մոսկվային արցախյան հակամարտության կարգավորման գործընթացում զիջել իր առաջնային դիրքերը, եւ վերջինիս նախաձեռնողական հերթական քայլն առաջիկայում անխուսափելի կլինի:
