Հայաստանի դեմ Ադրբեջանի ռազմական ագրեսիան շարունակվում է։ Պաշտոնական տվյալներով՝ երեկվա դրությամբ հայկական կողմի զոհերի թիվը 135 է, կան բազմաթիվ վիրավորներ, այդ թվում՝ քաղաքացիական բնակչության շրջանում: Հայկական կողմը նշում է, որ զինված ուժերը կարողացել են վեց դիրք վերադարձնել, սակայն չի նշվում, թե որքանն են մնում ադրբեջանական վերահսկողության տակ։ Ադրբեջանական լրատվամիջոցներում բավական մտահոգիչ թվեր են հիշատակվում, որոնք նպատակահարմար չէ նշել։ Իրավիճակի լրջությունը հուշում է ՀՀ զինված ուժերի գլխավոր շտաբի պետ Էդվարդ Ասրյանի հայտնած տեղեկությունն այն մասին, որ եթե մինչ ադրբեջանական ագրեսիան Ջերմուկ քաղաքից մինչեւ սահման թշնամու հեռավորությունը եղել է 11-12 կմ, ապա ներկայում այն 4.5 կմ է։ Այդ մասին նա ասել է Հայաստանում հավատարմագրված դիվանագիտական կորպուսի ներկայացուցիչների հետ Ջերմուկ քաղաքում երեկվա հանդիպման ժամանակ։ Ռազմավարական խորության բացակայության պայմաններում չափազանց կարեւոր նշանակություն ունի յուրաքանչյուր դիրք, առավել եւս եթե այն ռազմավարական բարձունք է կամ կարող է վերահսկողություն հաստատել Հայաստանի ճանապարհների եւ այլ կարեւոր հատվածների նկատմամբ։
ՀՀ կառավարության երեկվա նիստում հանրապետության արտակարգ իրավիճակների նախարարության ղեկավար Արմեն Փամբուխչյանը հայտնել է, որ ադրբեջանական զինուժը հրետանային հարվածներ է հասցրել Վայոց ձորի մարզի Կեչուտի ջրամբարին։ Ջերմուկից ընդամենը 3.5 կմ հարավ գտնվող կարեւոր ենթակառուցվածքը վնասվել է։ Այլ ավերվածություններ եւս արձանագրված են, մասնավորապես վնասներ են պատճառվել ճոպանուղուն, հրշեջ-փրկարարական ծառայության շենքին, հյուրանոցների, մեկ պանսիոնատի, քաղաքացիների գույքին։ Տարածքային կառավարման եւ ենթակառուցվածքների փոխնախարար Վաչե Տերտերյանն էլ տեղեկացրել է, որ, ըստ նախնական տվյալների, Գեղարքունիքի, Վայոց ձորի եւ Սյունիքի մարզերում ավերվել է 192 տուն։
Միջազգային հանրությունն արձագանքում է տեղի ունեցածին, հնչում են ինչպես Ադրբեջանին դատապարտող, այնպես էլ՝ կողմերի միջեւ հավասարության նշան դնող հայտարարություններ։ ՀՀ տարածքային ամբողջականության դեմ Ադրբեջանի սանձազերծած ռազմական ագրեսիայի առնչությամբ նախօրերին ՄԱԿ-ի Անվտանգության խորհուրդը ՀՀ դիմումի հիման վրա անցկացրել էր հրատապ նիստ: ՄԱԿ-ում ՀՀ մշտական ներկայացուցիչ Մհեր Մարգարյանը հորդորել է միջազգային կառույցին՝ տեր կանգնել միջազգային խաղաղության եւ անվտանգության պահպանման իր պատասխանատվությանը եւ պահանջել Ադրբեջանից՝ անհապաղ դուրս բերել զինված ուժերը Հայաստանի ինքնիշխան տարածքից: Մհեր Մարգարյանը նաեւ հայտարարել է, որ վստահելի տեղեկությունների համաձայն՝ Ադրբեջանը ծրագրում է եւս մեկ ռազմական հարձակում՝ ընդլայնելով ագրեսիայի աշխարհագրությունը, այդ թվում՝ Նախիջեւանի ուղղությամբ:
ՄԱԿ-ում Ֆրանսիայի մշտական ներկայացուցիչ, Անվտանգության խորհրդի նախագահ Նիկոլա դե Ռիվիերը կոչ է արել Ադրբեջանին հետ քաշել իր զորքերը Հայաստանի Հանրապետության ինքնիշխան տարածքից դեպի ելման դիրքեր՝ ընդգծելով, որ Հայաստանի տարածքային ամբողջականությունը պետք է պահպանվի: Հնդկաստանի ներկայացուցիչ Ռուչիրա Կամբոջը կոչ է արել ագրեսոր կողմին անհապաղ դադարեցնել գործողություններն ու հանդուրժողականություն դրսեւորել, սակայն այդպես էլ չի հնչել ագրեսոր կողմի անունը: ՄԱԿ-ում Ռուսաստանի Դաշնության մշտական ներկայացուցիչ Վասիլի Նեբենզյան անընդունելի է համարել ուժի կիրառումը՝ կոչ անելով Ադրբեջանին եւ Հայաստանին կատարելու ռուսական միջնորդությամբ ձեռք բերված բոլոր պայմանավորվածությունները հրադադարի մասին:
Խիստ մտահոգիչ է ՄԱԿ-ի Անվտանգության խորհրդի հրատապ նիստում ՄԱԿ-ի գլխավոր քարտուղարի Եվրոպայի, Կենտրոնական Ասիայի եւ Ամերիկաների հարցերով փոխտեղակալ Միրոսլավ Յենչայի՝ հրատապ նիստում ներկայացրած զեկույցում իրական ագրեսորի հստակ արձանագրման բացակայությունը, ինչպես նաեւ հնչեցրած որոշ եզրակացություններ։ Նրա խոսքով՝ «էսկալացիան ընդգծում է կողմերի՝ տարածքային ամբողջականության եւ ինքնիշխանության փոխադարձ ճանաչման շրջանակներում սահմանագծման եւ սահմանազատման շարունակվող գործընթացում առաջ շարժվելու հրատապ անհրաժեշտությունը»՝ կոչ անելով կողմերին «օգտվել այդ կարեւոր մեխանիզմից՝ որպես սահմանին լարվածությունը թուլացնելու անհրաժեշտ քայլ»: Առանց ՀՀ տարածքից ադրբեջանական զինված ուժերի դուրսբերման՝ սահմանազատման եւ սահմանագծման գործընթացը չի կարող համապատասխանել միջազգային իրավունքին։ Մյուս կողմից՝ եթե «կողմերի՝ տարածքային ամբողջականության եւ ինքնիշխանության փոխադարձ ճանաչման» գործընթացը տեղի ունենա առանց Արցախի ժողովրդի ինքնորոշման իրավունքը հաշվի առնելու, ապա կվտանգվի արցախահայության գոյությունն իր իսկ հայրենիքում։
Ակնհայտ է, որ Ադրբեջանի ռազմական ագրեսիայի նպատակն է ՀՀ տարածքի հաշվին սահմանային կապ հաստատել Նախիջեւանի հետ։ Միաժամանակ, երբ Հայաստանի դեմ ռազմական գործողությունները ներկայացվում եւ ընկալվում են որպես «սահմանային լարվածություն Հայաստանի եւ Ադրբեջանի միջեւ», դրանով իսկ միջազգային հանրությունը խուսափում է գնահատական տալ Ադրբեջանի ցեղասպան քաղաքականությանը։ 2020 թ. Արցախում կատարած պատերազմական հանցագործությունների համար Ադրբեջանը դեռ չի ենթարկվել պատասխանատվության, «միջազգային հանրությունն» այդպես էլ քաղաքական գնահատական չտվեց կատարվածին, ինչի հետեւանքները տեսնում ենք այսօր։
