Կառավարությունը երեկվա նիստում, չզեկուցվող հարցերի շարքում, բավարարեց Հայաստանի վերականգնվող էներգետիկայի եւ էներգախնայողության հիմնադրամի՝ գերակա ոլորտում իրականացվող ներդրումային ծրագրի շրջանակներում ներմուծվող տեխնոլոգիական սարքավորումների, դրանց բաղկացուցիչ ու համալրող մասերի, հումքի եւ նյութերի նկատմամբ սակագնային, մասնավորապես, ներմուծման մաքսատուրքից ազատելու արտոնությունից օգտվելու հայտը։
Ներմուծման ժամանակահատվածը 2022 թ. սեպտեմբերի 1-ից մինչեւ 2023 թ. փետրվարի 28-ը ներառյալ է։ Ծրագրի իրականացման ժամկետը որոշումն ուժի մեջ մտնելուց հետո 6 ամիս է։ Հումքն ու նյութերը ներմուծման մաքսատուրքից ազատելու անհրաժեշտությունը կառավարության 2015 թ. սեպտեմբերի 17-ի թիվ 1118-Ն որոշման համապատասխան է:
Ըստ էկոնոմիկայի նախարարության (ամբողջ տեղեկությունը պատկան այս կառույցինն է,- Ա. Մ.), Հայաստանի վերականգնվող էներգետիկայի եւ էներգախնայողության հիմնադրամի եւ ֆրանսիական NEPSEN կազմակերպության համագործակցությամբ մշակվել եւ իրականացվում է «Հայաստանում լողացող արեւային կայանների զարգացման ծրագիր»։ Այս շրջանակներում ուսումնասիրվել է Հայաստանում առկա ջրային պաշարներն ու դրանց վրա լողացող արեւային կայանների կառուցման եւ շահագործման տեխնիկատնտեսական իրագործելիությունը։ Ծրագիրը ամբողջությամբ ֆինանսավորվում է Ֆրանսիայի ֆինանսների եւ էկոնոմիկայի նախարարության FASEP ծրագրի կողմից։
Նախատեսվում է կառուցել շուրջ 151 կՎտ դրվածքային հզորությամբ փորձնական լողացող արեւային ֆոտովոլտային կայան: Որպես փորձնական ծրագիր նորարարական է եւ առաջինը տարածաշրջանում, հետեւաբար համարվում է նշանակալի առաջընթաց Հայաստանի էներգետիկ ոլորտի համար:
Ի դեպ, Երեւանյան լիճն է ընտրվել որպես լողացող արեւային կայանի տեղանք։ Նշյալ հիմնադրամն է կայանը շահագործելու, եւ այն լինելու է հիմնադրամի սեփականությունը։ Հիմնադրամը ստանալու է էլեկտրաէներգիայի գնման երաշխիքով էլեկտրաէներգիայի արտադրության լիցենզիա։
Ինչ վերաբերում է ներդրումներին։ Ծրագրի շրջանակներում նախատեսվում է իրականացնել 90 մլն դրամի ներդրում՝ սարքավորումների ձեռք բերման համար։ Սարքավորումները ներկրելուց հետո հավաքակցման աշխատանքներ են տարվելու։ Կստեղծվի 3 աշխատատեղ՝ 300 հազ. դրամ միջին աշխատավարձով։ Արտոնություն ստանալու համար ներկայացված ապրանքների արժեքը կազմում է 55.7 մլն դրամ: Մաքսատուրքից ազատման արտոնությունը գնահատվում է 4 մլն դրամ: Ներմուծվող ապրանքները չեն ներմուծվում ԵԱՏՄ անդամ երկրներից, քանզի չեն բավարարում ընկերության տեխնիկական պահանջներին։
Հիշեցնենք՝ կառավարությունը մտադիր է մինչեւ 2030 թ. արեւային էներգիայի արտադրության բաժինն ընդհանուրի մեջ հասցնել առնվազն 15 տոկոսի։
