ԵՏՀ կոլեգիայի 2020 թ. ապրիլի 28-ի թիվ 62 որոշմամբ երկարաձգվել էր երրորդ երկրներից ՀՀ տարածք ներմուծվող ապրանքների մաքսատուրքի դրույքաչափերի արտոնությունների ժամկետը: Այս որոշմամբ սահմանվել են նաեւ այն ապրանքների ցանկը (ավելի քան 600 անուն ապրանք) եւ դրույքաչափերը, որոնց ներմուծման ժամանակ Հայաստանում 2020 թ. ընթացքում կիրառվել են ԵԱՏՄ միասնական մաքսային սակագների դրույքաչափերից տարբերվող դրույքաչափեր։ Եվ խոսքը ցածր դրույքաչափերի մասին է: Ու որոշումը թեպետ ուժի մեջ է մտել հունիսի 12-ից, սակայն ունի հետադարձ ուժ:
Հաշվի առնելով, որ թիվ 62 որոշումը տարածվում է նաեւ 2020 թ. հունվարի 1-ից ծագած իրավահարաբերությունների վրա, Հայաստանի պետական եկամուտների կոմիտեն 2020 թ. հունիսի 12-ից կազմակերպել է այդ ապրանքների ներմուծման ժամանակ բարձր դրույքաչափերով վճարված մաքսատուրքերի տարբերության վերահաշվարկման եւ տնտեսավարողների վերադարձման գործընթաց:
Ինչքանո՞վ են տնտեսավարողներն օգտվել այս հնարավորությունից։
«ՀՀ»-ն ՊԵԿ-ից տեղեկացել է, որ կոմիտեում կատարված ուսումնասիրությամբ պարզվել է, որ 2020 թ. ընթացքում ներկայացված 3808 հայտարարագրերում մաքսատուրքի գումարները հաշվարկվել եւ գանձվել են բարձր դրույքաչափերով: Տնտեսավարողների մի մասն օգտվել է ընձեռված հնարավորությունից, դիմել է ՊԵԿ եւ փոփոխություններ կատարել նախկինում ներկայացված մաքսային հայտարարագրերում՝ ավելի բարձր մաքսատուրքի դրույքաչափերը փոխարինելով որոշմամբ սահմանված ավելի ցածր դրույքաչափերով:
Սակայն դեռ 1678 կազմակերպություն տարբեր պատճառներով նախկինում ներկայացված մաքսային հայտարարագրերում չի կատարել անհրաժեշտ փոփոխությունները:
Ուստի ՊԵԿ-ը եւս մեկ անգամ հիշեցնում է․ այն տնտեսավարողները, որոնք 2020 թ. հունվարի 1-ից մինչեւ հունիսի 11-ը ներմուծել են թիվ 62 որոշման ցանկում ընդգրկված ապրանքները, եւ դրանց համար կիրառվել են մաքսատուրքի բարձր դրույքաչափեր, փոփոխություններ կատարեն նախկինում ներկայացված մաքսային հայտարարագրերում, որպեսզի կարողանան հետ ստանալ օրենքով սահմանված կարգով ավելի վճարված գումարները:
Դրա համար վճարումը կատարողը կամ նրա իրավահաջորդը պետք է դիմում ներկայացնի պետական եկամուտների կոմիտե, որի հիման վրա էլ մաքսային մարմինը կուսումնասիրի ապրանքների մաքսային ձեւակերպումներն ու կկազմակերպի վերադարձման գործընթացը:
