Կառավարության 2019 թ. հոկտեմբերի 24-ի «Գյուղատնտեսության ոլորտում ապահովագրական համակարգի ներդրման փորձնական ծրագրի իրականացման համար պետական աջակցության ծրագիրը հաստատելու մասին» թիվ 1485-Լ որոշման մեջ գործադիրի երեկվա նիստում փոփոխություններ ու լրացումներ արվեցին։ Որոշումն ուժի մեջ կմտնի հրապարակմանը հաջորդող օրվանից։
Ըստ էկոնոմիկայի նախարարության (տեղեկությունը բացառապես պատկան այս կառույցինն է)` փոփոխությունների ու լրացումների անհրաժեշտությունը ծրագրի գործողության անցած ժամանակահատվածի արդյունքներով որոշ դրույթների փոփոխությունն է, ծրագրի գործողության ժամկետի, ծրագրի շրջանակում յուրաքանչյուր հեկտարին համապատասխան ապահովագրված ծածկույթի համար կիրառվող ոչ պայմանական չհատուցվող գումարի դրույթի հստակեցումը։
Գյուղատնտեսության ոլորտում ապահովագրական համակարգի ներդրման փորձնական ծրագրի իրականացման համար պետական աջակցության ծրագիրը մեկնարկել է 2019 թ.՝ երկու մշակաբույսի ապահովագրությամբ։ Ներկայումս ապահովագրվում են մեկ տասնյակից ավելի մշակաբույսեր՝ գարնանային ցրտահարության, երաշտի, կարկուտի եւ հրդեհի ռիսկերից։ 2022 թ. գյուղատնտեսական տարվա համար ապահովագրական ընկերությունների կողմից վաճառվել է 5091 ապահովագրության պայմանագիր՝ 6444 հեկտար ընդհանուր մակերեսով տարածքի համար։ Համախառն ապահովագրավճարը կազմել է 866.3 մլն դրամ։ 2022 թ. ապահովագրական պատահարների հետեւանքով ապահովագրական ընկերությունների կողմից տրամադրվել է 2167 ապահովագրական հատուցում՝ շուրջ 1.32 մլրդ դրամի չափով:
Դարձյալ ըստ էկոնոմիկայի նախարարության` ծրագրի գործողության անցած ժամանակահատվածի արդյունքներով պայմանավորված` առաջացել է գործընթացը որոշակի կարգավորելու անհրաժեշտություն՝ կապված ծրագրի գործողության ժամկետի, ապահովագրական ընկերությունների ոչ շահութաբեր աշխատանքի հետ, ինչն էլ կարող է խոչընդոտ լինել ծրագրի հետագա ընթացքի համար։ Փոփոխություններն ու լրացումները նպատակ ունեն նպաստել փորձնական ծրագրի հաջող իրականացմանը՝ հստակեցնելով սուբսիդավորման գործընթացում մոնիթորինգի իրականացումը, միաժամանակ հանվել է ապահովագրական ընկերությունների կողմից կիրառվող ապահովագրության ոչ պայմանական չհատուցվող գումարի կոնկրետ չափը։ Սա յուրաքանչյուր գյուղատնտեսական տարվա համար կսահմանվի «Գյուղատնտեսությունը ապահովագրողների ազգային գործակալություն» ՀԿ խորհրդի կողմից։
«Վերոնշյալ կարգավորումները կհստակեցնեն փորձնական ծրագրի իրականացման գործընթացը, ինչը պայմանավորված է նաեւ ապահովագրական ընկերությունների եւ վերաապահովագրող կազմակերպության համար գործընթացի ոչ եկամտաբեր լինելու հանգամանքով, ինչը կարող է հանգեցնել ապահովագրական ընկերությունների ծրագրին մասնակցելուց հրաժարվելուն։ Խնդիրը կարող է բացասաբար անդրադառնալ փորձնական ծրագրի իրականացման եւ հանրապետությունում գյուղատնտեսության ապահովագրության ամբողջական համակարգի ներդրման գործընթացի վրա»,- նշում է պատկան կառույցը։
Միաժամանակ 2023 թ. պետբյուջեում ներառված է «Գերմանիայի զարգացման վարկերի բանկի (KFW) հետ համատեղ գյուղատնտեսության ոլորտում ապահովագրական համակարգի ներդրման փորձնական ծրագրի իրականացման համար պետական աջակցություն» միջոցառումը։ Ծրագրի իրականացման ժամկետը 2025 թ. ներառյալ է, ընդ որում՝ ծրագիրը կիրականացվի յուրաքանչյուր տարվա պետական բյուջեում այդ նպատակով միջոցներ նախատեսված լինելու դեպքում։
Նշվում է, թե ՀՀ կառավարության 2021-2026 թթ. ծրագրով նպատակ է դրվել առաջիկա 5 տարիներին ներդնել գյուղատնտեսական մշակաբույսերի ամբողջական ապահովագրությունը՝ ներառելով հիմնական մշակաբույսերը, ընդլայնել ապահովագրվող ռիսկերի ցանկը, աշխարհագրությունը՝ ներառելով բոլոր մարզերը, ստեղծել նախադրյալներ կենդանիների ապահովագրության ներդրման համար։
