Ղեկավարվելով «Բաժնետիրական ընկերությունների մասին» օրենքի պահանջներով` կառավարությունը երեկվա նիստում, չզեկուցվող հարցերի շարքում, որոշեց «Գալակտիկա» փակ բաժնետիրական ընկերության 80 տոկոս պետական սեփականություն հանդիսացող բաժնետոմսերի կառավարման լիազորությունները վերապահել բարձր տեխնոլոգիական արդյունաբերության նախարարությանը։ Նախարարն ու տարածքային կառավարման եւ ենթակառուցվածքների նախարարության պետական գույքի կառավարման կոմիտեի նախագահը որոշումն ուժի մեջ մտնելուց հետո մեկամսյա ժամկետում պետք է ապահովեն «Գալակտիկայի» բաժնետոմսերի հանձնում-ընդունումը, ինչպես նաեւ ընկերության արժեթղթերի ռեեստրը վարող մասնագիտական կազմակերպության կողմից գրանցումը։
Ըստ ՏԿԵՆ-ի՝ «Գալակտիկայի» 80 տոկոս պետական սեփականության բաժնետոմսերի կառավարման լիազորությունները նախկինում վերապահվել էին գիտությունների ազգային ակադեմիային, իսկ բաժնետոմսերի 20 տոկոսը մասնակի անհատույց մասնավորեցման արդյունքում պատկանում է աշխատավորական կոլեկտիվին՝ 225 ֆիզիկական անձի։ Կառավարության 2020 թ. մայիսի 27-ին թիվ 847-Ա որոշմամբ «Գալակտիկայի» պետական սեփականության բաժնետոմսերի տնօրինման լիազորությունը վերապահվել է Պետական գույքի կառավարման կոմիտեին։
«Գալակտիկան» զբաղվում էր արտադրատեխնիկական նշանակության արտադրանքի, ժողովրդական սպառման ապրանքների, բժշկական, հատուկ նշանակության արտադրատեսակների եւ սարքերի մշակմամբ, արտադրությամբ եւ իրացմամբ, իրականացնում էր հետազոտություններ ու մշակումներ բնական գիտությունների, ճարտարագիտության բնագավառներում եւ գիտատեխնիկական սպասարկման ոլորտում։ «Գալակտիկան» արդեն մի քանի տարի է, ինչ գործունեություն չի ծավալում եւ ֆինանսական մուտքերն ապահովում է ընկերության տարածքը եւ շարժական գույքը վարձակալությամբ տրամադրելու դիմաց վարձավճարների հաշվին։
Կոտայքի մարզի Գառնի գյուղական համայնքի վարչական տարածքում գտնվող «Գալակտիկայի» անշարժ գույքը 60,0 հա մակերեսով հողատարածք է եւ 13546.6 քմ մակերեսով շենք-շինություններ:
Բարձր տեխնոլոգիական արդյունաբերության նախարարության 2023 թ. մարտի 14-ի գրության համաձայն՝ «Գալակտիկայի» տարածքում վարձակալական հիմունքներով գործունեություն են ծավալում ռազմարդյունաբերական համալիրի վեց ընկերություն: ՏԿԵՆ-ը վստահ է, որ ընկերության պետական սեփականության բաժնետոմսերի կառավարման լիազորությունները բարձր տեխնոլոգիական արդյունաբերության նախարարությանը վերապահելը կնպաստի ռազմատեխնիկական քաղաքականության զարգացման գերակա ուղղությունների իրականացման նպատակով գիտաարտադրական պաշարով գիտատեխնիկական համալիրի ստեղծմանը. «Ռազմարդյունաբերական կլաստերի ստեղծումով ՀՀ զինված ուժերի ու այլ ուժային կառույցների պահանջմունքի բավարարման համար գիտատեխնիկական զարգացման կանխատեսման հիման վրա կմշակվեն եւ կիրականացվեն ռազմարդյունաբերական համալիրի զարգացման երկարաժամկետ պլաններ, հիմնարար հետազոտական եւ գիտատեխնիկական, ինչպես նաեւ նորարարական աշխատանքներ»:
Հետագայում ԳԱԱ «Ա. Բ. Նալբանդյանի անվան քիմիական ֆիզիկայի ինստիտուտ» ՊՈԱԿ-ի կողմից գիտահետազոտական եւ փորձակոնստրուկտորական աշխատանքների ավարտից հետո (ավարտական փուլում է արդեն) «Գալակտիկայի» տարածքում նախատեսվում է ստեղծել դաշտային փորձարկումների RMM կայանք։ Ինչպես նաեւ՝ նշյալ ՊՈԱԿ-ի փորձնական արտադրամաս, որտեղ իրենց փորձարկումները կիրականացնեն նաեւ ռազմարդյունաբերական համալիրի սուբյեկտները: Անհրաժեշտ է նշել, որ ընկերությունն ունի հազվագյուտ օպտիկական սարքավորումներ, որոնք կարող են օգտագործվել ռազմարդյունաբերության համալիրի ռեեստրում ընդգրկված ընկերությունների կողմից: Ռազմարդյունաբերական կլաստերի ստեղծումը պետություն-մասնավոր հատված համագործակցության լավագույն օրինակ կլինի:
Հայաստանի մասնաբաժինը կավելանա
ՀՀ եւ ՌԴ կառավարությունների միջեւ Եվրասիական զարգացման բանկի վճարված կանոնադրական կապիտալում ՌԴ մասնաբաժնի մասի առուվաճառքի համաձայնագիրը վավերացնելու մասին ՀՀ օրինագծին էր վերաբերում երեկվա նիստում չզեկուցվող մեկ այլ հարց։ Համաձայնագրի վավերացումը, ըստ ՀՀ ֆինանսների նախարարության, նպատակահարմար է։
Ֆիննախի տվյալների համաձայն՝ Եվրասիական զարգացման բանկի կանոնադրական կապիտալը կազմում է 7 մլրդ ԱՄՆ դոլար, որից վճարված կապիտալը՝ 1.5 մլրդ, ցպահանջ՝ 5.5 մլրդ ԱՄՆ դոլար: ՀՀ-ն Եվրասիական զարգացման բանկի լիիրավ անդամ է դարձել 2009 թ. ապրիլին: Հայաստանի ներդրումը բանկի կապիտալում 100 հազար ԱՄՆ դոլար է: ՀՀ մասնաբաժինը 0,007 տոկոս է։ Կանոնադրական կապիտալի յուրաքանչյուր բաժնետոմսի արժեքը 1000 ԱՄՆ դոլար է, եւ յուրաքանչյուր վճարված բաժնետոմսը համապատասխանում է մեկ ձայնի։ Ներկայումս ԵԱԶԲ-ի ներդրումային պորտֆելի ծավալը, հաշվի առնելով իրականացված ծրագրերը, 13,4 մլրդ ԱՄՆ դոլար է, որից 484,2 մլն ԱՄՆ դոլարը 23 նախագծերի շրջանակներում տրամադրվել է ՀՀ-ին:
Նշյալ համաձայնագիրը նպատակ ունի կարգավորելու ԵԱԶԲ-ի կապիտալում ՌԴ մասնաբաժնի վերաբաշխման հետ կապված իրավահարաբերությունները։ ՀՀ կողմից 64 մլն ԱՄՆ դոլար արժողությամբ 64 000 բաժնետոմս գնելուց հետո ՀՀ մասնաբաժինը կկազմի 4,22 տոկոս:
