Եռօրյա այցով Արցախում էր Ն.Ս.Օ.Տ.Տ. Գարեգին Երկրորդ կաթողիկոսը: Պատվիրակությանը, որի կազմում էին ՀԲԸՄ նախագահ Պերճ Սեդրակյանը, Արցախի հերոս Պարգեւ արքեպիսկոպոս Մարտիրոսյանը, սահմանում դիմավորել են Արցախի հոգեւոր թեմի առաջնորդ Վրթանես եպիսկոպոս Աբրահամյանը, ՌԴ խաղաղապահ ուժերի հրամանատարի տեղակալ, գնդապետ Բորիս քահանա Գրիշինը:
Վեհափառ հայրապետը ԱՀ նախագահ Արայիկ Հարությունյանի, խորհրդարանի պատգամավորների եւ կառավարության անդամների ուղեկցությամբ ծաղկեպսակ է տեղադրել Ստեփանակերտի հուշահամալիրում վեր խոյացած հուշակոթողին: Ապա հոգեւոր դասի հետ աղոթք է բարձրացրել առ Աստված՝ արցախյան երկրորդ պատերազմում նահատակված քաջ հայորդիների հոգիների համար: Կաթողիկոսը նաեւ այցելել է պատերազմում զոհված տղաների շիրիմներին, ծաղիկներ տեղադրել եւ իր խոնարհումը բերել նրանց հիշատակին:
Նույն օրը Ամենայն հայոց կաթողիկոսը ԱՀ երրորդ նախագահ Բակո Սահակյանի եւ ՀԲԸՄ նախագահ Պերճ Սեդրակյանի ուղեկցությամբ առաջին անգամ հայրապետական այց է կատարել Ամարաս, ուր Հրաշափառի արարողությունից հետո կատարվել է հոգեհանգստի արարողություն՝ հայրենիքի պաշտպանության ժամանակ զոհված հերոս զինծառայողների հանգստության եւ խաղաղության համար: Միասնական աղոթք բարձրացնելով, Վեհափառ հայրապետն Ամենակարող Աստծուց խնդրեց, որպեսզի «խաղաղության եւ ապահովության մեջ պահի եւ պահպանի Արցախն ու նրա զավակներին»:
Կաթողիկոսն իր օրհնությունն ու պատգամը բերելով ժողովրդին, մասնավորապես ասաց. «Սիրելիներս, Հայրական սիրով ու ջերմագին զգացմունքներով եմ ուղեւորվել Արցախ՝ մեր սուրբ եկեղեցու հավատավոր զավակներին հանդիպելու: Մենք այստեղ ենք տագնապալի օրերից հետո գոտեպնդվելու միմյանցով, զորանալու մեր տիրոջ խոսքով: Մեր Տեր Հիսուս Քիստոսի խոսքը, որ կոչում է համբերություն եւ հավատարմություն, պիտի օգնի մեզ հաղթահարելու դժվարություններն ու փորձությունները, ցավն ու վիշտը եւ ընթանալու առաջ: Ծանր փորձությունները, որոնց միջով անցանք, եւ հիմա խնդիրները, որ մեր առջեւ են, չեն կարող մեզ մատնել հուսահատության, այլ ընդհակառակը՝ պիտի ավելի համախմբվենք, իմաստնանանք՝ դասեր քաղելու սխալներից եւ սթափ գնահատելու իրավիճակները: Լինենք համախմբված եւ հավատարիմ մնանք մեր հայրերի հավատքին, հայ եկեղեցուն եւ հայրենիքին»:
Վեհափառ հայրապետը դիմելով ներկաներին, նշեց, որ այսօր Արցախի քաջազուն զավակներն արի հոգով, հաստատակամ կանգնած են մնում հայրենի հողին, որի ամեն մի թիզը ներկված է հայ զինվորի արյամբ, որը վկայում է մեր ժողովրդի դարավոր պատմության եւ ինքնության, մեր ստեղծարար կյանքի եւ ձգտումների մասին: «Արցախը, որ նվիրական մասն է մեր բնօրրան հայրենիքի, առաջիններից է քրիստոնեության լույսը տարածել եւ ծաղկուն տարիքում նահատակվել սուրբ Գրիգոր Լուսավորչի թոռը՝ սուրբ Գրիգորիս հայրապետը: Այստեղ Ամարասում է հայկական առաջին դպրոցներից մեկը հիմնադրել Մեսրոպ Մաշտոցը: Այստեղ են գտնվում մեր սրբերից շատերի մասունքները, որ նրանց վրա բարձրացել են մեր եկեղեցիներն ու վանքերը եւ հորդորում են մեզ՝ մշտարթուն լինել ու անսասան պահել մեր հավատքը: Արցախը շարունակում է մնալ մեր ժողովրդի հավատքի եւ հայրենասիրության խորհրդանիշը, շարունակում է միավորել մեր ժողովրդին ազգային իղձերի ու գաղափարների շուրջ»,- ընդգծեց Գարեգին Երկրորդը:
Կարեւորելով ազգի ուժերի համախմբումը ծանր պատերազմի հետեւանքով ավերված բնակավայրերի վերականգնման խնդրում՝ Վեհափառ հայրապետն արցախցիներին, համայն հայությանը պատգամեց ապաքինում, հույսով ու լավատեսությամբ նպաստել հայ ժողովրդի վերազարթոնքին, իր հայրենի հողի վրա ազատ ու անկախ ապրելու արդար իրավունքների պաշտպանությանը. «Միասնաբար տոկալով, նեղություններին համբերելով պիտի արժանի լինենք մեր խիզախ զավակներին, ովքեր իրենց կյանքը նվիրաբերեցին հայրենիքին եւ անմահացան: Թող Աստված երկնային բարձունքներում, խաղաղության մեջ հանգչեցնի հայրենիքի պաշտպանության համար նահատակված հայորդիների հոգիները, ապաքինություն պարգեւի վիրավորներին, շուտափույթ ազատ արձակվեն եւ տուն վերադառնան բոլոր հայ գերիները»:
Իր օրհնությունը ժողովրդին բաշխելուց հետո, Գարեգին Երկրորդը խոնարհումը բերելով Ամարասի վանքում ամփոփված սուրբ Գրիգորիս հայրապետի շիրիմին, ծանոթացավ վանական համալիրի վերանորոգման աշխատանքներին, իր գոհունակությունը հայտնեց «իրականացվող սուրբ գործի առնչությամբ»: Այնուհետեւ հայրապետական պատվիրակությունն այցելեց Մաճկալաշեն գյուղ, ուր կաթողիկոսը հանդիպում ունեցավ զոհված ազատամարտիկների հարազատների հետ, իր մխիթարանքի եւ զորակցության խոսքերը հաղորդեց համայնքի ներկայացուցիչներին:
Այցի հաջորդ օրը Վեհափառը նախագահ Ա. Հարությունյանի եւ մյուս պաշտոնատար անձանց ուղեկցությամբ եղել է Գանձասար վանքում եւ հանդես եկել հայրապետական մաղթանքով:
Այցի շրջանակում Գարեգին Երկրորդը հանդիպումներ է ունեցել նախագահ Արայիկ Հարությունյանի եւ արտգործնախարար Դավիթ Բաբայանի հետ: Նա այցելել է նաեւ հայրենյաց պաշտպաններին եւ հետաքրքրվել նրանց զինծառայության պայմաններով, հայրապետական օրհնանք հղել եւ անփորձանք ծառայություն մաղթել:
Ն.Ս.Օ.Տ.Տ. Գարեգին Երկրորդի եռօրյա այցն Արցախ ավարտվել է Ստեփանակերտի Սուրբ Աստվածածին Հովանի մայր տաճարում՝ Արցախի հավատավոր ժողովրդին մատուցած սուրբ պատարագով եւ հայրապետական օրհնանքի խոսքերով: Պատարագը մատուցվել է Արցախի հոգեւոր թեմի առաջնորդ Վրթանես եպիսկոպոս Աբրահամյանի ձեռամբ: Ուշագրավ է հատկապես այն, որ մարդիկ բացառիկ հնարավորություն են ունեցել հաղորդակցվելու Էջմիածնի մայր աթոռից Արցախ բերված սուրբ Գրիգորիս Լուսավորչի մասունքներին: Արարողությանը ներկա էին ԱՀ նախագահ Արայիկ Հարությունյանը, ԱՀ երկրորդ եւ երրորդ նախագահներ Արկադի Ղուկասյանն ու Բակո Սահակյանը: Օրհնելով ժողովրդին, Հայոց կաթողիկոսը հայցեց, որ «Փրկիչ տերը ամենազոր իր Սուրբ Խաչի հովանի ներքո անսասան խաղաղության մեջ պահի Արցախի Հանրապետությունը, եւ Աստծո ողորմությամբ զորանա արցախահայությունը՝ կերտելով ստեղծագործ եւ զարգացող կյանքի նորանոր հաջողություններ»:
