Իրանի Չալդրանի Ղարաքիլիսա գյուղում գտնվող Սուրբ Թադեւոսի վանքում, աշխարհի տարբեր ծայրերից ժամանած հայերի մասնակցությամբ եւ առողջապահական արձանագրությունների պահպանմամբ, կայացել է ամենամյա պատարագի արարողութունը։
Նշվում է, որ Ատրպատականի Հայոց թեմի առաջնորդ Գրիգոր եպիսկոպոս Չիֆթչյանն արարողության ժամանակ ասել է. «Իսլամական Իրանում այս արարողության անցկացումը քրիստոնյաների եւ մուսուլմանների եղբայրության, միասնության եւ սրտակցության ապացույցն է»:
Թեմական խորհրդի պատասխանատուներից Գագիկ Ջորջյանն այս կապակցությամբ ասել է. «Այս արարողությունը շարունակվում է 1954 թվականից մինչեւ այսօր»:
Գագիկ Ջորջյանը հավելել է, որ պատարագին մասնակցած հայերը մոմեր են վառել, կատարել Տերունական աղոթքը եւ կրոնական այլ ծեսեր:
Ամեն տարի Իրանում հայերի կրոնական ծիսակատարության անցկացումը վկայում է, որ երկրում կրոնական եւ էթնիկ խմբերն ապրում են խաղաղության պայմաններում եւ ներկայացնում է իրանցիների բարեկամական վերաբերմունքը նրանց նկատմամբ:
Սուրբ Թադեւոսի ուխտագնացությանն ամեն տարի մասնակցում են ինչպես իրանահայերն այնպես էլ աշխարհի այլ երկրներից, այդ թվում՝ Հայաստանից, Սիրիայից, Լիբանանից, Նիդեռլանդներից, Ֆրանսիայից, Ավստրիայից, Գերմանիայից, Կանադայից եւ այլ երկրների ժամանած հայերը:
Ս Թադեւոս (Թադե) Առաքեալի վանքը քրիստոնեական աշխարհի ամենահին եկեղեցին է եւ թվագրվում է մեր թվարկության յոթերորդ դարով: Այն կառուցվել է Չալդրանից 20 կմ հյուսիս-արեւելք՝ Հիսուս Քրիստոսի Առաքյալ Թադեոսի գերեզմանի վրա:
