«Զօրաց Տիրոջ բարկութիւնիցն երկիրը այրուելու է, եւ ժողովուրդը կրակի ճարակի պէս է լինելու, մարդ իր եղբօրը չէ խնայելու»։ Եսայի 9։19
Աշխարհակործան բարկության օրը թշնամությունը եղբայրների միջեւ կհասնի այն աստիճանի, որ եղբորը եղբայրը մահվան կմատնի, որպեսզի խուսափի հալածանքներից։
«Եւ եղբայրը եղբօրը մահի կմատնէ, եւ հայրը որդուն, եւ որդիքը վեր կկենան իրանց ծնողների վերայ, եւ կսպաննեն նորանց։ Եւ ամենից կատուիք իմ անունի համար. բայց ով որ կհամբերէ մինչեւ վերջը, նա կապրի»։ Մատթեոս 10։21-22
«Եւ կմատնուիք ծնողներից եւ եղբայրներից եւ ազգականներից եւ բարեկամներից էլ, եւ ձեզանից կսպանեն»։ Ղուկաս 21։16
Եղբայրների հաշտեցման թեման անհամեմատ քիչ տեղ է գրավում Աստվածաշնչում։ Հակոբն ու Եսավը, Հովսեփն ու եղբայրները, ի վերջո, հաշտվում են, սակայն դա մեծ զգայական կորուստներ արժեցավ։
«Վիրաւորուած եղբայրը ամուր քաղաքից պինդ է. եւ վէճերը բերդի նիգերին են նման»։ Առակաց 18։19
Աստվածաշնչյան օրենքներում ու առակներում ներկայացվում է կատարյալ մոտեցումը. աղքատ եղբորը հարկավոր է մոտենալ մեծահոգաբար.
«Եթէ քո Եհովայ Աստուծոյ քեզ տուած երկրումը քո քաղաքների մէկումը եղբայրներիդ մէկը աղքատ լինի, սիրտդ չխստացնես եւ ձեռքդ չխփես քո աղքատ եղբօրիցը. Այլ անպատճառ ձեռքդ բաց անես նորա համար, եւ նօրա կարօտութեան բաւական լինելու չափ փոխ տաս նորան։ Զգուշացիր, մի գուցէ սրտիդ մէջը չար խորհուրդ մտնէ, ասելով. Եօթներորդ տարին՝ թողութեան տարին՝ մօտ է, եւ աղքատ եղբօրդ վերայ չար աչքով նայես եւ նորան չտաս. եւ նա էլ քեզ դէմ Եհովային աղաղակէ, եւ դու յանցաւոր լինես։ Անպատճառ տաս նորան, եւ նորան տալիս սիրտդ չնեղուի. որովհետեւ քո Եհովայ Աստուածը այս բանի պատճառով կօրհնէ քեզ քո ամեն գործքերումը եւ քո ամեն ձեռնարկած բաներումը»։ Երկրորդ օրինաց 15։7-11
Սուտ վկայություն տվող եւ եղբայրների մեջ գժտություններ գցող անձը զզվելի է Աստծո աչքին.
«Սուտեր փչող անիրաւ վկայ, եւ եղբայրների մէջ կռիւներ գցող»։ Առակաց 6։19
Բոլոր ժամանակներում սիրող եղբայրը աջակից ու օգնական է.
«Ամէն ժամանակ սիրող է բարեկամը, եւ եղբայրը նեղ օրուան համար է ծնուած»։ Առակաց 17։17
Եղբայրների միջեւ թշնամությունը ճիշտ չէ, հակաբնական է։ Ըստ Աստծո պլանի՝ Աստծո եւ մարդկանց, ինչպես նաեւ միջանձնային հարաբերություններում պետք է պահպանվեն մտերիմ հարաբերություններ։
Անահիտ ԲԱՆՈՒՉՅԱՆ
