Եղբայրներն ամրացնում են միմյանց ճշմարտության մեջ եւ աջակցում թույլերին։
«Եղբարք, եթէ ձեզանից մէկը մոլորուի ճշմարտութեան ճանապարհիցը, եւ մէկը դարձնէ նորան, թող գիտենայ, թէ մեղաւորին իր մոլորութեան ճանապարհիցը դարձնողը, մի հոգի կփրկէ մահից եւ մեղքերի շատութիւնը կծածկէ»։ Հակոբոս 5։19-20
«Նայեցէք. եղբարք, մի գուցէ ձեզանից մէկումը անհաւատութեան չար սիրտ լինի, որ ապստամբուի կենդանի Աստուածանից, Այլ իրար յորդորեցէք ամեն մէկ օր. քանի որ այսօր է ասվում, որ ձեզանից մէկը չխստանայ մեղքի խաբէութիւնովը»։ Եբրայեցիս 3։12-13
«Եղբարք, եթէ մէկը յանկարծ բռնուի մի յանցանքով, դուք որ հոգեւոր էք, այնպիսին հաստատեցէք հեզութեան հոգով, զգուշացիր քո անձին, որ դու էլ չփորձուիս»։ Գաղատացիս 6։1
«Եւ այսպէս եղբայրների դէմ մեղանչելով, եւ այն տկարների խղճմտանքը զարկելով Քրիստոսի դէմ մեղք էք գործում։ Վասն որոյ՝ եթէ կերակուրն իմ եղբօրը գայթակղեցնում է, ես յաւիտեան միս չեմ ուտիլ, որ իմ եղբօրը չգայթակղեցնեմ»։ Ա Կորնթացիս 8:12-13
Եղբայրության մասին Պողոսի խոսքերում զգացվում է ջերմություն, նրբություն, անկեղծություն։ Եղբայրական կապերը պետք է լինեն ամուր եւ խոր։ Եկեղեցու անդամ եղբայրներին Պողոս առաքյալը կոչ է անում. «Բարեւ են տալիս ձեզ բոլոր եղբարքը. բարեւ տուէք իրար սուրբ համբոյրով»։ Ա Կորնթացիս 16։20
Տարբեր թղթերում Պողոսը եղբայրների յուրահատուկ բնորոշումներ է տալիս. օրինակ՝ ֆիլիպեցիներին ուղղված թղթի 4։1-ում գրում է. «Ուրեմն, իմ սիրելի եւ բաղձալի եղբարք, իմ ուրախութիւնը եւ իմ պսակը. այսպէս հաստատ կացէք Տէրումը, սիրելիներ»։ Իսկ Սալոնիկցիներին Պողոսը գրում է.
«Բայց մենք, եղբարք, թէեւ առ ժամանակ ձեզանից որբ մնացինք երեսով եւ ոչ սրտով, բայց աւելի եւս շտապեցինք ձեր երեսը տեսնելու մեծ փափագով»։ Ա Թեսաղոնիկեցիս 2։17
Ամփոփելով եղբայրության թեման՝ կարելի է եզրակացնել, որ եղբայրության գաղափարի մեջ արտահայտված է շատ ավելին, քան պարզապես հավատացյալների միությունը։ Դա առավել հայտնի եւ տարածված կերպարն է Աստծո ընտանիքի։ Հնարավոր է՝ հենց դրա համար է, որ լինելով ամենատարածված փոխաբերությունը՝ մենք քիչ ուշադրություն ենք դարձնում նրան։
Այնուամենայնիվ, եղբայրությունը մնում է մտերմության, համակարծիքության, միասնության իդեալական կերպարը, որը պետք է գոյություն ունենա հավատացյալների շրջանում։ Կարեւոր դեր է խաղում նրա մեջ ամփոփված հավասարության գաղափարը, սակայն ամենակարեւորն այն է, որ եղբայրությունը ե՛ւ լավ է, ե՛ւ հաճելի։
Անահիտ ԲԱՆՈՒՉՅԱՆ
