Աստվածաշնչում կան մի քանի բառեր, որոնք թարգմանվում են «օրհնություն» կամ «օրհնել»։ Եբրայերեն «բարակ» բառը, որ շատ հաճախ թարգմանվում է «օրհնել», կարող է նշանակել «գովել», «շնորհավորել» կամ «ողջունել»։ Ծննդոց գրքում է առաջինը նկարագրված Աստծո կողմից ծովային թռչունների ու կենդանիների օրհնության դրվագը.
«Եւ Աստուած տեսաւ, որ բարի է։ Եւ Աստուած օրհնեց նորանց ասելով, Աճեցէք եւ շատացէք եւ լցրէք ծովերի միջի ջրերը. եւ թռչունները շատանան երկրի վերայ»: Ծննդոց 1։22
Աստված օրհնում է Ադամին ու Եվային, տալով նրանց իշխանություն բոլոր կենդանիների վրա։
«Եւ Աստուած օրհնեց նորանց, եւ Աստուած ասաց նորանց. Աճեցէք եւ շատացէք, եւ լցրէք երկիրը, եւ տիրեցէք նորան. եւ իշխեցէք ծովի ձկների, եւ երկնքի թռչունների վերայ, եւ երկրի վերայ սողացող բոլոր կենդանիների վերայ»։ Ծննդոց 1։28
Աստված Աբրահամին ուղարկելով Ավետյաց երկիր, խոստացավ օրհնել իրեն, մեծացնել իր անունը եւ նրա միջոցով օրհնել երկրի բոլոր սերունդները։
«Եւ Եհովան ասեց Աբրամին. Գնա քո երկրիցը, եւ քո ազգականներիցը, եւ քո հօր տանիցն այն երկիրը, որ ես քեզ ցոյց կտամ։ Եւ ես քեզ մեծ ազգ պիտի շինեմ, եւ քեզ օրհնեմ, եւ քո անունը մեծացնեմ եւ դու օրհնեալ կլինիս։ Եւ քեզ օրհնողներին կօրհնեմ եւ քեզ անիծողներին կանիծեմ. եւ երկրի բոլոր ազգերը քեզանով կօրհնուին»։ Ծննդոց 12։1-3
Աստվածաշնչում օրհնության խոսքեր են ասում նաեւ մարդիկ։ Երբ Ռեբեկան Իսահակի հետ ամուսնանալիս պետք է լքեր հայրական տունը, նրա ընտանիքը օրհնում է.
«Եւ օրհնեցին Ռեբեկային եւ ասեցին նորան. Ով մեր քոյր, շատ եւ շատ հազարներ դառնաս եւ քո սերունդն իր թշնամիների դուռը ժառանգէ»։ Ծննդոց 24։60
Երբ Իսահակը մահվան մահճում էր, օրհնեց իր որդի Հակոբին հետեւյալ բառերով.
«Եւ Աստուած տայ քեզ երկնքի ցօղիցը եւ երկրի պարարտութիւնիցը, եւ ցորենի, եւ գինու առատութիւն։ Ազգեր ծառայեն քեզ եւ ժողովուրդներ քեզ երկրպագեն. քո եղբօր վերայ իշխան եղիր. եւ քո մօր որդիքը քեզ երկրպագեն. քեզ անիծողներն անիծեալ եւ քեզ օրհնողներն օրհնեալ լինին»։ Ծննդոց 27։28-29
Հոբի գրքի 5։17-ում ասվում է. «Ահա երանելի է այն մարդը, որին Աստուած խրատում է, ուրեմն Ամենակարողի խրատը մի մերժիր»։ Այս օրհնության իմաստն այն է, որ Աստված մշտապես մեզ ուղղորդում է ճիշտ ճանապարհի։
Անահիտ ԲԱՆՈՒՉՅԱՆ
