Արցախյան վերջին պատերազմից հետո Քաշաթաղի շրջկենտրոն Բերձորի Սուրբ Համբարձման եկեղեցու հոգեւոր սպասավոր տեր Բենիամին քահանա Ծատուրյանը հարկադրված ծառայության անցավ Ասկերանի շրջանի Աստղաշենի Սուրբ Աստվածածին եկեղեցում: Այժմ Բերձորում դեռ բնակվում են մեր հայրենակիցների որոշ ընտանիքներ, եւ նրանք էլ ունեն հոգեւորի կարիք:
Հայ առաքելական եկեղեցու Արցախի թեմի որոշմամբ նախատեսված է յուրաքանչյուր ամիս հոգեւոր արարողություն իրականացնել Բերձորի Սբ Համբարձման եկեղեցում, հիմնականում՝ սուրբ պատարագ մատուցել: Հերթականը կայացավ ապրիլի 21-ին։ Բերձորի քաղաքապետ Նարեկ Ալեքսանյանը, ով ներկա էր հոգեւոր արարողությանը, տեղեկացրեց, որ պատարագը մատուցվել է Ստեփանակերտի Աստվածամոր Սուրբ Հովանի մայր տաճար եկեղեցու հոգեւոր հովիվ տեր Ներսես քահանա Ասրյանի հանդիսապետությամբ, այլ հոգեւորականների մասնակցությամբ։ Ներկա են եղել նաեւ Բերձորում այժմ բնակվողներ ու աշխատողներ, ոստիկանության աշխատակիցներ, հյուրեր, Բերձորի նախկին քաղաքապետ Արթուր Սահակյանը, ով այժմ զբաղված է Արցախի Շուշիի շրջանի Բերդաձորի ենթաշրջանի Եղցահող գյուղում նոր տներ կառուցելով։ Հոգեւոր հայրը Տերունական աղոթքով է սկսել արարողությունը։ Ներկաները մոմեր են վառել՝ հավատով, որ Սուրբ Համբարձման եկեղեցում միշտ է մատուցվելու սուրբ պատարագ։
Արարողությունից հետո տեր Ներսես քահանա Ասրյանը դիմել է ներկաներին՝ մաղթելով Աստծո հաջողությունները, որ Տերը զորավիգ լինի մեր ժողովրդին, վիրավոր, բայց կանգուն ու հպարտ Արցախին։ Աստծո զորություն է մաղթել նաեւ մանուկներին, ովքեր իրենց ներկայությամբ առավել ոգեշնչել էին բոլորին։ Սուրբ պատարագը մատուցվել է Սուրբ Հարության՝ Մեծ Զատիկի տոնի առթիվ։ Նախատեսված է հաջորդ սուրբ պատարագը մատուցել մայիսի 26-ին՝ Սուրբ Համբարձման տոնի օրը: Այս անգամ սրբատանը հոգեւոր երգերով հանդես կգա Սբ Համբարձման եկեղեցու երգչախումբը՝ Հասմիկ Գրիգորյանի գլխավորությամբ: Արարողությանը ներկա է լինելու նաեւ տեր Բենիամին քահանան:
