Նոր Երուսաղեմը օրհնություն կբերի մարդկանց երկրի վրա։ Նոր Երուսաղեմի մասին Աստվածաշնչում ասվում է, որ այն իջնելու է Աստվածանից երկնքից։ Դա նշանակում է, որ նրա օգնությամբ Աստված երկրի վրա փոփոխություններ կիրականացնի։ Դրանով երեւում է Աստծո Թագավորության եւ Նոր Երուսաղեմի միջեւ կապը, որի միջոցով Աստված կիրականացնի իր կամքը երկրի վրա, ինչպես երկնքում.
«Գայ քո արքայութիւնը, լինի քո կամքը, ինչպէս երկնքումն՝ այնպես էլ երկրի վերայ»։ Մատթեոս 6։10
Ահա թե ինչպիսի օրհնություններ են սպասվում մարդկանց ապագայում։ Այլեւս չի լինի մեղք։ Նոր Երուսաղեմից հոսում է կենդանի ջրով գետը եւ սնուցում կյանքի ծառերը, որոնք բժշկում են ժողովուրդների.
«Եւ ցոյց տուաւ ինձ մի մաքուր գետ, կենդանի ջրի ակնվանու նման փայլուն, որ դուրս էր գալիս Աստուծոյ եւ Գառի աթոռից։ Եւ նորա հրապարակի միջումը եւ գետի այս կողմին եւ այն կողմին կեանքի ծառ կար, որ տասնեւերկու կերպ պտուղ էր բերում. ամեն մէկ ամիս տալիս էր իր պտուղը. եւ այն ծառի տերեւը բժշկում էր հեթանոսներին։ Եւ այլ եւս նզովք բնաւ չի լինիլ. եւ Աստուծոյ եւ Գառի աթոռը նորանում կլինի. եւ նորա ծառաները կպաշտեն նորան։ Եւ նորա երեսը կտեսնեն, եւ նորա անունը նորանց ճակատների վերայ։ Եւ գիշեր չի լինիլ այնտեղ, եւ ճրագի եւ արեգակի լոյս պէտք չէր նորանց, որովհետեւ Տէր Աստուածը լուսաւորում է նորանց, եւ կթագաւորեն յաւիտեանս յաւիտենից»։ Հայտնություն 22։1-5
Մարդիկ կբժշկվեն ե՛ւ ֆիզիկապես, ե՛ւ հոգեպես, կձերբազատվեն մեղքից եւ ձեռք կբերեն կատարյալ կյանք։ Հենց այսպիսի կյանք էր նախատեսել ի սկզբանե Աստված.
«Որ ստեղծուածներն իրանք էլ ապականութեան ծառայութիւնիցը կազատուին՝ Աստուծոյ որդկանց փառաւոր ազատութեան մէջ մտնելով»։ Հռովմեացիս 8։21
Մարդիկ կունենան մոտ հարաբերություններ Աստծո հետ։ Մեղքի պատճառով մարդիկ հեռացել են Աստծուց.
«Այլ ձեր անօրէնութիւններն են բաժանում ձեր Աստուծոյ մէջ տեղը, եւ ձեր մեղքերը ծածկեցին նորա երեսը ձեզանից, որ չլսէ»։ Եսայի 59։2
Եվ երբ որ մեղքը լիովին հաղթահարված եւ չեզոքացված կլինի, լիովին կիրականանա հետեւյալ մարգարեությունը. «Եւ մի մեծ ձայն լսեցի երկնքիցը, որ ասում էր. Ահա Աստուծոյ խորանը մարդկանց հետ, եւ նա կբնակուէ նորանց հետ, եւ նորանք կլինին նորան ժողովուրդ, եւ ինքն Աստուած նորանց հետ կլինի նորանց Աստուած։ Եւ կջնջէ Աստուած բոլոր արտասուքը նորանց աչքերիցը, եւ մահն այլեւս չի լինիլ, ոչ սուգ եւ ոչ աղաղակ, եւ ոչ ցաւ այլեւս չի լինիլ, որովհետեւ առաջիններն անցան»։ Հայտնություն 21։3-4
Անահիտ ԲԱՆՈՒՉՅԱՆ
