Հե՞շտ է արդյոք նմանվել Հիսուսին՝ միշտ հնազանդվելով ծնողներին։ Թե՞ երբեմն քեզ թվում է, նրանք հաճախ չեն հասկանում այսօրվա կյանքից ոչինչ, եւ որ դու շատ ավելին գիտես, քան նրանք։ Հնարավոր է, որ դու ինչ-որ հարցերում ավելին գիտես, հատկապես, եթե դրանք վերաբերում են գիտատեխնիկական առաջընթացին։ Բայց հիշիր, որ Հիսուսն իր հասկացողությամբ ու պատասխաններով հիացնում էր փորձառու վարդապետներին։ Համաձայնիր, որ նրա համեմատ դու այնքան էլ շատ բան չգիտես։ Սակայն Հիսուսը հնազանդ էր իր ծնողներին։ Դա անպայմանանորեն չի նշանակում, որ նա համաձայն էր ծնողների բոլոր որոշումների հետ։ Սակայն, միեւնույն ժամանակ, նա մնում էր նրանց ենթակայության տակ, այդ թվում՝ պատանի տարիքում։ Ի՞նչ կարելի է սովորել նրա օրինակից.
«Պատուիր քո հօրը եւ քո մօրը, ինչպէս որ քո Եհովայ Աստուածը քեզ պատուիրեց, որ քո օրերը երկար լինեն, եւ քեզ համար բարի լինի այն երկրի վերայ, որ քո Եհովայ Աստուածը քեզ տալիս է»։ Երկրորդ օրինաց 5։16
«Երանի թէ նորանց սիրտն էլ այնպես լիներ, որ ինձանից վախենալով իմ բոլոր պատուիրանքները պահէին ամեն ժամանակ, որպէսզի իրանց համար բարի լինէր եւ իրանց որդկանցն էլ՝ յաւիտեան»։ Երկրորդ օրինաց 5։29
Հնազանդվելն այնքան էլ հեշտ չի տրվում։ «Որդիք, հնազանդ եղէք ձեր ծնողներին Տէրով. որ այն է արժանը։ Պատուիր քո հօրը եւ մօրը, սա է առաջին պատուիրանքը խոստմունքով»։ Եփեսացիս 6։1
Ինչո՞ւ է Աստված երեխաներին հրահանգում ենթարկվել ծնողներին։ Հնազանդվելով ծնողներին, դու հնազանդվում ես Աստծուն։ Բացի այդ, քո ծնողները հաստատ ավելի փորձառություն ունեն, քան դու։ Իհարկե, պետք է հաշվի առնել կարեւորագույն այն հանգամանքը, որ Աստված պատվիրում է հնազանդել ծնողներին՝ ՏԵՐՈՎ, այսինքն այն ամենում, ինչը բխում է Աստծուց եւ համահունչ է Աստվածաշնչի պահանջներին։ Այսինքն, եթե ծնողները կամ այլ մեծեր քեզ կհրահանգեն ստել, գողանալ կամ այլ նման բաներ, հարկավոր է առաջնորդվել ՏԵՐՈՎ.
«Պետրոսը եւ առաքեալները պատասխանելով ասեցին. Աստուծոյ պէտք է աւելի հնազանդել, քան թէ մարդկանց»։ Գործք Առաքելոց 5։29
Արդյոք եթե դու լինեիր կատարյալ, մեղքից զատ, չպղծված, ինչպիսին Հիսուսն էր, դու մշտապես ավելի հե՞շտ կենթարկվեիր ծնողներիդ։ «Որովհետեւ այսպիսի քահանայապետ էր վայելում մեզ, սուրբ, անմեղ, անարատ, մեղաւորներիցը ջոկուած եւ երկնքիցը վեր բարձրացած»: Եբրայեցիս 7։26
«Եւ Եհովան ասեց իր սրտումն. այլ եւս չեմ անիծիլ երկիրը մարդի պատճառով, որովհետեւ մարդի սրտի խորհուրդը չար է իր մանկութիւնիցը, եւ այլ եւս չեմ զարկիլ բնաւ ոչ մի կենդանի, ինչպէս արի»։ Ծննդոց 8։21
Այնուամենայնիվ, նույնիսկ Հիսուսն ինչ-որ բան ուներ սովորելու հնազանդության առումով. «Թէ եւ Որդի էր, այն չարչարանքներիցը հնազանդութիւնը սովորեց»։ Եբրայեցիս 5։8
Անահիտ ԲԱՆՈՒՉՅԱՆ
