Տավուշի մարզի Բերդի տարածաշրջանի հոգեւոր հովիվ, արժանապատիվ տեր Արամ քահանա Միրզոյանը համոզված է՝ ծնողների ամենամեծ նվերը երեխաներին մկրտելն է։ «Պետք է գիտակցենք՝ մեր երեխաները միայն նյութական չեն, առաջին հերթին հոգեւոր էակներ են»,- ասաց նա, երբ մկրտում էր Տավուշի մարզի Չինարի գյուղի 24 մանուկներին։
Մայիսի 26-ին Հայ առաքելական եկեղեցին տոնում է Սուրբ Համբարձման օրը։ Մեր ժողովրդի ամենասիրած տոներից է Սուրբ Համբարձումը՝ Ջան գյուլումը, որի արմատները գալիս են նախաքրիստոնեական ժամանակներից։ Այն արտահայտել է մեռնող եւ հառնող Աստծու, բնության զարթոնքի, վերածնության գաղափարները։ Հայ առաքելական եկեղեցին Քրիստոսի Համբարձման տոնի օրը հիշատակում է նաեւ 1441 թ. Հայոց կաթողիկոսական աթոռը Սսից տեղափոխելու եւ Սուրբ Էջմիածնում վերահաստատելու պատմական դեպքը։ Համբարձման տոնի առթիվ Հայոց եկեղեցիներում մատուցվել է սուրբ պատարագ։ Բերդ քաղաքի Սուրբ Հովհաննես եկեղեցում, որի օծման արարողությունը տեղի է ունեցել 2014 թ. սեպտեմբերի 14-ին, կայացավ մանուկների մկրտության արարողություն։ Երեւանում գործող «Հուսո տուն բարեգործական կենտրոն» հիմնադրամի նախաձեռնությամբ, Էջմիածնից Ղազարյան ընտանիքի աջակցությամբ Տավուշի մարզի Չինարի գյուղի մանկապարտեզի 24 սան՝ 10 տղա եւ 14 աղջիկ, մկրտվեցին։
Տեր Արամ քահանա Միրզոյանը, սարկավագ-գնդերեցներ Հովհաննես Ավետիսյանի եւ Արթուր Գեւորգյանի օգնությամբ, կատարեց մկրտության սուրբ արարողությունը։ Կնքահայրերն էին փոխգնդապետ Գոռ Ղազարյանը, եղբայրը՝ Գեւորգ Ղազարյանը, եւ փոխգնդապետ Հակոբ Գեւորգյանը։ Տերունական աղոթքից հետո Մկրտության ավազանի սուրբ ջրով ու մյուռոնով օծվեցին փոքրիկները։ Կնքահայրերն իրենց սանիկների համար Հավատ, Հույս, Սեր եւ Մկրտություն խնդրեցին Աստծուց։ Կնքամայրերն իրենց սանիկներին խաչեր նվիրեցին՝ հավատով, որ Սուրբ խաչը կլինի պահապան փոքրիկներին եւ նրանց հայրենի Չինարիին։ Ավարտելով հոգեւոր արարողությունը՝ տեր Արամ քահանա Միրզոյանն ասաց. «Փառք եմ տալիս Աստծուն, որ մեզ արժանացրել է այս մեծ օրհնությանը: Գաղտնիք չէ՝ մենք շատ դժվար ժամանակներ ենք ապրում, եւ այս օրհնաբեր արարողությունը կարծես թե լույսի եւ հույսի առկայություն լինի մեր կյանքում, որը գալիս է ջերմացնելու մեր հոգիները: Ես անկեղծորեն պետք է ասեմ՝ Սուրբ Համբարձման տոնը մեր եկեղեցում երբեք այսքան գեղեցիկ չէր եղել»։ «Հուսո տուն բարեգործական կենտրոն» հիմնադրամի տնօրենը խորհրդանշական համարեց այն, որ հատկապես սահմանապահ Չինարի գյուղի մանուկների մկրտությունը համընկավ մեր ժողովրդի կողմից սիրված հոգեւոր տոնի՝ Սուրբ Համբարձման հետ։
Առավոտյան, երբ հիմնադրամի տնօրենի եւ աշխատակիցների հետ Երեւանից մեկնեցինք Տավուշ, Մ. Պողոսյանն ասաց՝ արդեն մի քանի տարի է՝ իրենց կազմակերպությունը, որ տարբեր բարեգործական ծրագրեր է իրականացնում Երեւանում եւ մարզերում, սահմանապահ Չինարիում նույնպես մի շարք բարեգործական աշխատանքներ է կատարել, մասնավորապես՝ մանկապարտեզի հարակից տարածքում խաղահրապարակ եւ անխափան էլեկտրամատակարարման համար ավտոմատ կառավարման համակարգով էլեկտրական գեներատոր է տեղադրվել: Ընթացքում «Հայաստան-Արմենիան հիլֆ Շտեռնշտանդեն» կառույցի հետ «Պաշտպանված մանկություն սահմանին» ծրագրի շրջանակում որոշել է մանկապարտեզի սաների համար զբոսանք կամ նման այլ միջոցառում կազմակերպել։ Հիմնադրամի փոխտնօրեն Արտակ Վերդյանն առաջարկել է մկրտել երեխաներին։ Դիմել են Տավուշի թեմի առաջնորդին, եւ արդյունքում՝ կայացավ այս հոգեւոր արարողությունը, որն էլ համարվում է ծրագրի ավարտ։ Սակայն Չինարի գյուղին հիմնադրամի աջակցությունները շարունակվելու են։
Իսկ սահմանամերձ բնակավայրերին աջակցելը բոլորի պարտքն է։ Բոլորը պետք է հնարավորության սահմաններում օժանդակեն, որպեսզի սահմանապահ գյուղացին իր հողում մնա, արարի։ Այս առումով Մ. Պողոսյանը գովեստով խոսեց Էջմիածնում բնակվող Ղազարյանների ընտանիքի մասին։ Հիմնադրամի հոգաբարձուների խորհրդի անդամ Գեւորգ Ղազարյանը եղբոր՝ Գոռ Ղազարյանի, եւ ընկերոջ՝ Հակոբ Գեւորգյանի հետ ստանձնել է երեխաների կնքահայրերը դառնալու մեծ պատասխանատվությունը: Բացի այդ, Ղազարյաններն իրենց մայրիկի՝ արմատներով Կիլիկիայից Մարի Թասալյանի հետ, արդեն մի քանի տարի է՝ տարբեր ծրագրեր իրականացնելու համար աջակցում են հիմնադրամին, որն ունի նաեւ «Գթության խոհանոց»։ Յուրաքանչյուր տարի Ամանորին նրանք են «Գթության խոհանոցի» շահառուներին մատուցում տոնական ճաշը։ Գեւորգ Ղազարյանի կարծիքով հայի համար մկրտությունը անհրաժեշտություն է։ «Հայ լինելը չի որոշվում միայն ազգանվան վերջավորությամբ: Հայն առանձնանում է նաեւ իր հոգեւոր աշխարհով եւ ապրելակերպով: Չափազանց կարեւոր է երեխաների մկրտված լինելը, հատկապես սահմանամերձ բնակավայրում, որտեղ հավատքն ու հույսն առավել անհրաժեշտ են վաղվա օրվա համար»,- ասաց Գ. Ղազարյանը: Իսկ նրա եղբայրը՝ Գոռը, մեծ սիրով ու հպարտությամբ 10 տղաների կնքահայրը դարձավ։ «Մենք պետք է ապրենք ու արարենք Հայաստանում, եւ հայոց վանքերում միշտ պետք է մկրտության արարողություններ լինեն՝ ի հեճուկս մեր թշնամիների»,- ասաց փոխգնդապետ Գոռ Ղազարյանը՝ հավելելով, որ սփյուռքից էլ պետք է տուն վերադառնան։
Մինչ մկրտության արարողությունը, եկեղեցու բակում զրուցեցի գնդերեց-սարկավագների հետ։ Արմավիրի մարզից են բանակում կարեւոր ծառայություն իրականացնող երիտասարդ հոգեւորականները։ Հովհաննեսն արդեն 1 տարի է՝ ծառայում է, ավարտել է Գեւորգյան հոգեւոր ճեմարանը։ Իսկ Արթուրը սովորել է Սեւանի հոգեւոր դպրոցում, այնուհետեւ՝ Գեւորգյան ճեմարանում, ավարտել եւ այժմ բանակում գնդերեց է։ Հնարավոր է՝ նախատեսած ժամկետից ավելի ծառայեն զինվորական գնդում։ Փոխգնդապետ, 7 աղջիկների կնքահայր Հակոբ Գեւորգյանի համար շատ կարեւոր է մանուկների մկրտությունը, եւ սիրով է համաձայնել ընկերոջ՝ Գոռի հետ դառնալ սահմանամերձ մեր երեխաների կնքահայրը։ Չինարիի մանկապարտեզի տնօրեն Փառանձեմ Ավագյանը տեղեկացրեց՝ 22 տարի է՝ ղեկավարում է 53-ամյա նախակրթարանը, որտեղ այժմ հաճախում են 2-6 տարեկան 26 երեխա։ Գոհ է բարերարներից՝ բոլոր սաներն արդեն մկրտված են։ Հավելեց նաեւ, որ գյուղի միջնակարգ դպրոցում սովորում է 72 աշակերտ։ Մկրտությունից հետո զրուցեցի նաեւ երեխաների ծնողների հետ։ 5-ամյա Վիկտորյա Պետրոսյանի մայրը՝ Արփինեն, եւ հայրը՝ Սերգոն, ուրախ են՝ իրենց դուստրը նույնպես մկրտվեց։ Արտակարգ իրավիճակների նախարարության մարզային կառույցում է աշխատում Վիկտորյայի հայրը, ով անհրաժեշտության դեպքում նաեւ սահմանապահ է։ Նարեկ եւ Արմինե Աղասյաններն իրենց դստերը՝ 5-ամյա Միլենային էին ուղեկցում։ Սամվել Աղասյանը թոռներին՝ 6-ամյա Ալինային ու 2-ամյա Սամվելին էր գրկել մկրտությունից հետո։ Շնորհակալություն են հայտնում կազմակերպիչներին ծնողները՝ հավաստելով, որ միշտ իրենց հողում են մնալու։ Արարողությանը ներկա էին նաեւ Մարի Թասալյանը՝ հարսների ու թոռների հետ, Բերդի համայնքապետարանի աշխատակազմի քարտուղար Հասմիկ Մելիքյանը, Չինարի բնակավայրի վարչական ղեկավար Սամվել Սաղոյանը, հյուրեր:
Հ. Գ. Ի դեպ, «Հուսո տուն բարեգործական կենտրոնը» մեծ աջակցություն է ցուցաբերել նաեւ արցախցիներին հատկապես 44-օրյա պատերազմի առաջին օրվանից՝ տեղահանվածներին տրամադրելով կացարան եւ անհրաժեշտ պարագաներ։
