Բազմաթիվ մարգարեություններ, որոնք գրված են Հին ուխտի Մովսեսի օրենքում, մարգարեական գրքերում եւ սաղմոսներում, բավական մանրամասնված են։ Օրինակ՝ ասվում է, որ Նա պետք է մատնվի Իր ընկերոջ կողմից, եւ նույնիսկ նշված է դրամի քանակը, որի դիմաց կատարվելու է մատնությունը ( 30 արծաթ).
«Եւ ես նորանց ասեցի. Եթէ հաճելի է ձեր աչքին, տուէք իմ վարձքը, իսկ եթէ ոչ, թող տուէք. եւ նորանք կշռեցին իմ վարձքը երեսուն արծաթ։ Եւ Տէրն ասեց ինձ, Դէն գցիր դա բրուտի մօտ, պատուական գին է, որով ես գնահատուեցայ նորանց կողմից. եւ ես առայ այն երեսուն արծաթը, եւ գցեցի նորան Տիրոջ տունը բրուտի մօտ»։ Զաքարիա 11։12-13
«Եւ պիտի թափեմ Դաւիթի տան վերայ, եւ Երուսաղէմումը բնակողի վերայ շնորհքի եւ աղօթքի հոգին. եւ նորանք պիտի մտիկ տան ինձ, որին խոցեցին. եւ սուգ պիտի անեն նորա վերամիամօրի սուգի պէս. եւ պիտի ցաւեն նորա վերայ, ինչպէս որ անդրանիկի վերայ կցաւեն»։ Զաքարիա 12։10
Սաղմոսներում խոսվում է ձեռքերն ու ոտքերը ծակելու մասին, ոսկորների ողջ մնալու մասին, թեպետ այն ժամանակներում դատապարտյալի ծնկները, ոսկորները ջարդելը ամենաընդունված ու սովորական պատժի տեսակներից էին.
«Որովհետեւ շուները պատեցին ինձ, եւ չարերի ժողովքը շրջապատեցին ինձ. իմ ձեռքերը եւ ոտքերը ծակեցին։ Ես համարում եմ իմ ամեն ոսկորները, բայց նորանք նայում եւ դիտում են ինձ։ Շորերս բաժանում են իրանց մէջ, եւ պատմուճանիս վերայ վիճակ են գցում»։ Սաղմոս 22։16-18
«Տէրը պահում է նորա ամեն ոսկորները, որ նորանցից ոչ մէկն էլ չկոտրուի»։ Սաղմոս 34։20
Այս բոլոր մարգարեությունները կատարվել են Քրիստոսի խաչելությունից շատ տարիներ առաջ։ Այդ մարգարեություններից շատերը կատարվել են հռոմեացի զինվորականների ձեռքով, որոնք ոչինչ չգիտեին այդ հինավուրց մարգարեությունների մասին։
«Արդ՝ երբոր տեսնէք աւերածի պղծութիւնը, Դանիէլ մարգարէի ձեռով ասուածը, սրբութեան տեղումը կանգնած. կարդացողը մտածէ»: Մատթեոս 24։15
«Եւ նա արծաթը գցեց տաճարի մէջ՝ հեռացաւ, եւ գնաց ինքնիրան խեղդեց։ Եւ քահանայապետներն որ արծաթն առան՝ ասեցին. Արժան չէ՛ դորան գանձանակի մէջ ընդունել, որովհետեւ արիւնի գին է։ Եւ խորհուրդ արին եւ նորանով բրուտի արտատեղն առան, օտարականների գերեզմանատեղի համար։ Նորա համար այն արտատեղը Արիւնի արտ կոչուեցաւ մինչեւ այսօր։ Այն ժամանակ կատարուեցաւ Երեմիա մարգարէի ձեռով ասուածը: Եւ երեսուն արծաթն առան՝ այն գնահատուածի գինը, որ Իսրայէլի որդիներից ոմանք գնահատել էին, Եւ նորան բրուտի արտին տուին, ինչպէս որ հրամայեց ինձ Տէրը»։ Մատթեոս 27։5-10
«Բայց երբոր Յիսուսի մօտ եկան եւ տեսան նորան արդէն մեռած, նորա սրունքները չջարդեցին»։ Հովհաննես 19։33
Մարգարեությունների իրականացման միջոցով Աստված հաստատեց, որ Հիսուս Քրիստոսն է ճշմարիտ Փրկիչը, Ում Նա խոստացել էր ուղարկել այս մեղավոր աշխարհ։
Անահիտ ԲԱՆՈՒՉՅԱՆ
