Տերը Ֆիլադելֆիային խոստանում է իր հովանավորությունն ու պաշտպանությունը.
«Որովհետեւ իմ համբերութեան խօսքը պահեցիր, ես էլ քեզ կպահեմ այն փորձութեան ժամիցը, որ գալու է այս աշխարհքի վերայ, որ փորձէ երկրի երեսի վերայ բնակողներին»։ Հայտնություն 3։10
Մարդը, ով այսօր պահում է Աստծո պատվիրանները, հույս ունի, որ ծանր ժամանակներում Տերը կպահի իրեն, քանզի Տերը փրկել կարող է։
Աստված պահպանեց նրանց կյանքը, ում դռան վրա նշան էր արված գառան արյունով։ Պետք է ունենալ գառան արյան նշանը, եւ Աստված կպահպանի մեզ զազրելի գայթակղություններից, որոնցով պատվում է ողջ մոլորակը։
Երբ գա ժամանակը, ամենաուժեղը կդառնա ամենաթույլը, եւ կդողան ամենահզորները։ Այո՛, կատարիր Աստծո պատվիրաններն այսօր՝ վաղվա ապավինության հույսով։
Այս խոսքերն իրականություն դարձան փոքրիկ Ֆիլադելֆիայի ճակատագրում. այս ոչ մեծ քաղաքում, ըստ ամենայնի, տիրում էր մեծ սեր, անգամ «ֆիլադելֆիա» բառը հին հունարենից թարգմանաբար նշանակում է «եղբայրական սեր»։
Այս քաղաքն իր ուղղափառությունը պահպանել է նույնիսկ այն ժամանակ, երբ թշնամիների օղակը սեղմվել է բոլոր կողմերից։ Տասնչորսերորդ դարում, երբ շրջակայքը թուրքական տիրապետության տակ էր, Ֆիլադելֆիան պահպանում էր չեզոք քաղաքի կարգավիճակը եւ հատում էր իր դրամական միավորը։
Երկար տարիներ Ֆիլադելֆիան մնում էր միակ բյուզանդական պատվարը Փոքր Ասիայում, մինչեւ որ 1390 թ. այն վերջիվերջո ընկավ սուլթանական զորքերի արշավանքից։
«Ահա ես գալիս եմ շուտով. պահիր այն որ ունիս, որ ոչ ով չառնէ քո պսակը»։ Հայտնություն 3։11
Ինչ որ անում ես, պետք է լավ անես եւ պահպանես։ Ցանկացած աշխատանք, գործ, որ անում ես, պետք է լավ անես։ Եվ պետք է պահես այդ լավ արածներդ։ Իհարկե, առաջին հերթին պետք է պահպանես հավատքդ։
«Ով որ յաղթում է սիւն կանեմ նորան իմ Աստուծոյ տաճարումը, եւ այլ եւս դուրս չի գնալ. եւ նորա վերայ կգրեմ իմ Աստուծոյ անունը, եւ իմ Աստուծոյ քաղաքի անունը, այն նոր Երուսաղէմի անունը որ իջնում է երկնքիցն իմ Աստուածանիցը եւ իմ նոր անունը»։ Հայտնություն 3։12
Անահիտ ԲԱՆՈՒՉՅԱՆ
