Պայքար միայնության դեմ

Ոմանք միայնակ մարդկանց խորհուրդ են տալիս ընդգրկվել որեւէ ակումբում կամ ավելի շատ ժամանակ տրամադրել ճանապարհորդություններին։ Իրականում դրանք վատ գաղափարներ չեն, սակայն չեն լուծում միայնության խնդիրները։ Այս խորհուրդները ձեզ կօգնեն պոկվել արատավոր մտքերի, զգացմունքների եւ վարվեցողության շրջապտույտից, ինչը տանում է դեպի միայնություն։

Ա. Հարկավոր է հասկանալ, որ միայնության վիճակի զգացողությունը հատուկ է յուրաքանչյուր մարդու, բայց այն չպետք է լինի մշտական։ Վերաբերվեք ձեր միայնությանը որպես փորձություն. «Ձեզ ուրիշի փորձութիւն չէ պատահել, բացի մարդկային փորձութիւնից, բայց Աստուած հաւատարիմ է, որ չի թողիլ ձեզ ձեր կարողութիւնիցը վեր փորձուելու, այլ փորձութեան հետ ելքն էլ կպատրաստէ, որ կարողանաք համբերել»։ Ա Կորնթացիս 10։13

Նման փորձություններով անցնում են նաեւ ուրիշ մարդիկ։ «Արթուն եղէք, հսկում արէք, որովհետեւ ձեր ոսոխ թշնամին՝ սատանան, գոռոզ առիւծի պէս ման է գալիս եւ որոնում է, թէ որին կուլ տայ։ Որին հակառակ կացէք հաւատքով հաստատուած, գիտենալով, որ ձեր եղբայրներն էլ որ աշխարհքիս մէջ են, նոյն չարչարանքներն են քաշում»։ Ա Պետրոս 5։8-9

Բ. Հարկավոր է ընդունել խնդիրը: Միայն այն բանից հետո, երբ դուք Աստծո եւ ինքներդ ձեզ համար կընդունեք, որ տառապում եք միայնությունից, կարող եք իրապես պայքարել ձեր միայնության ու մեկուսացման դեմ։

Գ. Հարկավոր է գիտակցել պատճառը: Հարկավոր է վերլուծել սեփական կյանքը՝ միայնության վերը թվարկված փաստարկների ու պատճառների լույսի ներքո եւ հայտնաբերել, թե դրանցից որոնք են վերաբերում ձեզ։

Դ. Հարկավոր է հիշել, որ Աստված միշտ կողքիդ է եւ պատրաստ օգնելու՝ ձերբազատվելու միայնությունից։

Կարելի է վերընթերցել Ա Կորնթացիս 10։13 գլուխը։ Սաղմոսերգուն ասում է. «Իմ ժամանակը քո ձեռքին է. փրկիր ինձ իմ թշնամիների ձեռքիցը եւ իմ հալածողներիցը։ Երեսդ փայլեցրու քո ծառայի վերայ. փրկիր ինձ քո ողորմութիւնովը»։ Սաղմոս 31։15-16

Աստված մեզ կոչ է անում ամեն ինչում հենվել Իր վրա, իսկ Ինքն, Իր հերթին, խոստանում է մեզ տալ հանգիստ ու խաղաղություն։ «Տէրը մօտ է։ Ոչինչ հոգս մի անէք, այլ ամեն բանում աղօթքով եւ աղաչանքով եւ գոհութիւնով՝ ձեր խնդրուածքները թող յայտնի լինեն Աստուծուն։ Եւ Աստուծոյ խաղաղութիւնը, որ ամեն մտքից վեր է, կպահպանէ ձեր սրտերն ու միտքերը Քրիստոս Յիսուսումը»։ Փիլիպեցիս 4։6-7

Ե. Հաշտվեք այն մտքի հետ, որ որոշ բաներ հնարավոր չէ փոխել: Մոտ ընկերոջ կամ ամուսնու մահը, տեղափոխությունը հարազատներից հեռու՝ այլ քաղաք կամ երկիր… Սրանք այն իրողություններն են, որոնք արդեն կատարվել են, եւ մեզնից այլեւս որեւէ բան կախված չէ։ Այս ամենի հետ հարկավոր է հաշտվել։ Աստվածաշունչն ասում է. «Բայց գիտենք, որ Աստուծուն սիրողներին ամեն բաները գործակից են լինում դէպի բարին նորանց, որ նախասահմանելովը կանչուած են»։ Հռովմեացիս 8։28

Այլ խոսքերով ասած, Տերը կարող է ձեր իրավիճակը փոխել դեպի լավը։ Ձեզնից պահանջվում է միայն դադարել կառչել անցյալից եւ ընթանալ առաջ Պողոս առաքյալի օրինակով. «Եղբարք, ես իմ անձը չեմ համարում, որ հասած լինեմ, բայց մէկ բան կայ, ետեւի բաները մոռանալով, դէպի առաջի լինողներն եմ նկրտում։ Հետեւում եմ դէպի նպատակը՝ Աստուծոյ վերին կոչումի մրցանակին Քրիստոս Յիսուսումը»։ Փիլիպեցիս 3։13-14

Անահիտ ԲԱՆՈՒՉՅԱՆ