Միայնությունը ցավագին զգացողություն է, այն ցավացնում է՝ մխրճվելով սրտի խորքերը։ Երբեմն մարդ ցանկանում է ինչ-որ մեկի հետ կիսվել իր միայնության մասին, սակայն վախենում է նույնիսկ խոսել՝ «իսկ եթե մարդիկ չհասկանա՞ն ինձ, այդ ժամանակ ինձ համար ավելի ցավալի կլինի ու ավելի միայնակ կդառնամ»…
Մարդկային ընկերությունը հատկություն ունի լինելու ոչ կայուն։ Այն մեծապես կախված է տրամադրությունից, տրամադրվածությունից, զգացողություններից ու զգացմունքներից։ Նույնիսկ մտերիմ ընկերները կարող են հարաբերությունները սառեցնել աշխատանքային կամ ընտանեկան խնդիրների պատճառով։ Ընկերները կարող են մոռանալ ձեր մասին, դադարեցնել հարաբերությունները եւ նույնիսկ դավաճանել։
«Վարքն առանց արծաթասիրութեան լինի. բաւական համարեցէք այն, որ ձեռներումդ ունիք, որովհետեւ ինքն ասեց, որ Չեմ թողիլ քեզ եւ երեսից չեմ գցիլ»։ Եբրայեցիս 13։5
«Մի ծածկիր ինձանից քո երեսը, մի մերժիր ծառայիդ քո բարկութիւնովը. դու ես իմ օգնութիւնը. մի հեռացնիր ինձ եւ մի թողուր ինձ, ով իմ փրկութեան Աստուած։ Թէեւ հայրս ու մայրս թողեն ինձ, բայց Տէրն ընդունում է ինձ»։ Սաղմոս 27։9-10
Խաչի վրա Հիսուս Քրիստոսի զոհաբերության միջոցով Աստված ապացուցեց Իր սերն ու նվիրվածությունը ձեր նկատմամբ։ Եթե այդ զոհաբերության միջոցով դուք հաշտվել եք Արարիչի հետ, ուրեմն Նրա հետ ընկերացել եք։ Նրա Հոգին բնակվում է ձեր մեջ, եւ դուք արդեն մենակ չեք. Ինքը՝ Տեր Աստվածն է ձեզ հետ եւ ձեր մեջ։ Մինչ երկիրը լքելը Քրիստոս խոստացավ իր աշակերտներին, որ Ինքը նրանց որբ չի թողնի եւ կուղարկի խոստացած Սուրբ Հոգին, որը կլինի մեր ամոքիչն ու ուսուցիչը։
«Եթէ ինձ սիրում էք, իմ պատուիրանքները պահեցէք։ Եւ ես Հօրը կաղաչեմ, ուրիշ Մխիթարիչ կտայ ձեզ, որ մնայ ձեզ հետ յաւիտեան։ Ճշմարտութեան Հոգին, որին աշխարհքս կարող չէ ընդունել. որ չէ տեսնում նորան. եւ ոչ էլ ճանաչում նորան. բայց դուք նորան ճանաչում էք, որովհետեւ ձեզ մօտ է մնում եւ ձեզ հետ կլինի։ Ձեզ որբ չեմ թողիլ. կգամ ձեզ մօտ»։ Հովհաննես 14։15-18
Ուրեմն, թույլ տվեք Աստծուն ձեր միայնության մեջ մխիթարելու ձեզ։ Կիսվեք Նրա հետ ձեր զգացմունքներով ու հոգեկան վիճակի մասին մտքերով։ Թողեք տրտմությունն ու ներեք բոլոր նրանց, ովքեր ինչ-որ կերպ ձեզ վիրավորել են, հրաժարվել են հասկանալ ձեզ։ Հետեւեք Պողոս առաքյալի օրինակին։ Նրան բոլորը լքեցին դատի ժամանակ։ Սակայն նա գիտեր, որ թեպետ մարդիկ թողել են իրեն, սակայն Աստված չի թողել. «Ատեանումն առաջին անգամն պատասխանելիս՝ ոչ ով չկանգնեց իմ կողմը, այլ ամենքը ինձ թողեցին. թող չհամարուի նորանց։ Իսկ Տէրն ինձ մօտ կանգնեց եւ զօրացրեց ինձ, որ ինձանով քարոզութիւնը հաստատուի, եւ բոլոր հեթանոսները լսեն. եւ ես ազատուեցայ առիւծի բերանիցը։ Եւ կփրկէ ինձ Տէրն ամեն չար բանից եւ կազատէ կհասցնէ իր երկնային արքայութեանը, որին լինի փառք յաւիտեանս յաւիտենից։ Ամէն»։ Բ Տիմոթեոս 4։16-18
Եթե դուք տառապում եք միայնությունից, ապա գիտեք, որ գոյություն ունի լուծում, այդ խնդրին։ Այն սկսվում է գիտակցումից, որ մարդկային միայնության արմատը հոգեւոր միայնության մեջ է՝ Աստծուց հեռանալու մեջ։
Եթե դուք միայնակ եք, առաջին բանը, որ պետք է անեք, շփումն է Աստծո հետ։ Դառնալով քրիստոնյա՝ դուք կշփվեք հոգեւոր մեծ ընտանիքի հետ, Աստծո ընտանիքի հետ։ Երկրորդ բանը, որ հարկավոր է անել, պետք է ապրել հոգեւոր կյանքով՝ Քրիստոսի Եկեղեցում։ «Եւ զգուշանանք իրար համար՝ դէպի սէր եւ բարի գործեր գրգռելով. Եւ չթողենք մեր իրար հետ ժողովուիլը, ինչպէս ոմանց սովորութիւն է. բայց իրար յորդորենք, եւ այնքան աւելի՝ որքան տեսնում էք, որ օրը մօտեցած է»։ Եբրայեցիս 10։24-25
Անահիտ ԲԱՆՈՒՉՅԱՆ
