Է. «Եւ մի շնանար»
Յոթերորդ պատվիրանն արգելում է ցանկացած անօրինական կապ։ Աստվածաշնչի համաձայն՝ օրինական կապ է համարվում ամուսնության կապը հակառակ սեռի ներկայացուցիչների միջեւ, որոնք միմյանց բարեկամներ չեն։ «Շնություն անելը» համարվում է մեղք եւ մարդուն քայքայում է թե՛ մարմնապես, թե՛ հոգեպես։ Առավել սարսափելի հիվանդությունները տարածվում են մարդկանց «շնության» հետեւանքով։ Այս մեղքից կործանվեցին Սոդոմը եւ Գոմորը։
Աստված չի արգելում սիրել, Նա Ինքը սեր է, սակայն Նա պահանջում է բարոյականություն։
Ը. «Եւ մի գողանար»
Այլ անձանց նկատմամբ ոչ հարգալից վերաբերմունքը կարող է դրսեւորվել նյութական գողությամբ։ Ցանկացած օգուտ անօրինական է, եթե այն պայմանավորված է այլ անձանց տրվող վնասով, այդ թվում՝ նյութական։
Ութերորդ պատվիրանի խախտում են համարվում.
-ուրիշի սեփականության յուրացումը,
-գողությունը կամ կողոպուտը,
-խաբեությունը գործերի մեջ, կաշառակերությունը,
-ամեն տեսակ խաբեբայություններն ու խարդախությունները։
Թ. «Եւ քո դրացիի դէմ սուտ մի վկայիր»
Իններորդ պատվիրանն ասում է, որ չի կարելի խաբել ոչ ինքդ քեզ, ոչ էլ ուրիշներին։ Այս պատվիրանն արգելում է ցանկացած սուտ ու բամբասանք։
Ժ. «Եւ քո դրացիի կնկան մի ցանկանար։ Եւ մի ցանկանար քո դրացիի տանը՝ ոչ նորա արտին, ոչ նորա ծառային, ոչ նորա աղախնին, ոչ նորա եզին կամ նորա էշին, եւ քո դրացիի ոչ մէկ բանին»:
Տասներորդ պատվիրանը մեզ ասում է, որ նախանձն ու խանդը մեղք են։ Ցանկությունն ինքն իրեն մեղքի սերմ է, որը չի ծլարձակում լուսավոր հոգում։ Տասներորդ պատվիրանն ուղղված է ութերորդ պատվիրանի խախտման անթույլատրելիությանը։ Ուրիշի ունեցվածքին տիրանալու ցանկությունն իր մեջ խեղդելով՝ մարդը երբեք գողություն չի անի։
Տասներորդ պատվիրանը տարբերվում է նախորդ իննից. այն իր բնույթով Նորկտակարանային է։ Այս պատվիրանն ուղղված է ոչ թե մեղքի արգելմանը, այլ մեղքի մասին անգամ մտածելու անթույլատրելիությանը։ Նախորդ ինը պատվիրաններն ասում են բուն խնդրի մասին, այնինչ տասներորդ պատվիրանը խոսում է խնդրի պատճառի, արմատի մասին։
Անահիտ ԲԱՆՈՒՉՅԱՆ
