Պատվիրան վեցերորդ. «Երանի նորանց, որ սրտով մաքուր են, որ նորանք Աստուծուն կտեսնեն»
«Մարմնի ճրագն աչքն է»
Երանի նորանց, որ սրտով մաքուր են, այսինքն՝ մաքուր են հոգով եւ խելքով մեղավոր մտքերից ու ցանկություններից։ Կարեւոր է ոչ միայն խուսափել մեղքի տեսանելի իրագործումից, այլեւ ձեռնպահ մնալ դրանց մասին մտքերից, որովհետեւ ցանկացած մեղք սկսվում է մտորումներից, նոր հետո առարկայանում է գործողության մեջ։
«Որովհետեւ սրտիցը դուրս են գալիս չար խորհուրդներ, սպանութիւններ, շնութիւններ, պոռնկութիւններ, գողութիւններ, սուտ վկայութիւններ, հայհոյութիւններ»։ Մատթեոս 15։19
Ոչ միայն մարմնական անմաքրությունն է համարվում մեղք, այլեւ առաջնահերթորեն՝ հոգու անմաքրությունը, հոգեւոր աղտեղությունը։ Մարդ կարող է ոչ մեկի չզրկել կյանքից, բայց ներքուստ վառվել ատելությունից մարդկանց նկատմամբ եւ նրանց մահը ցանկանալ։ Դրանով իսկ նա կքայքայի սեփական հոգին, եւ, որպես հետեւանք, կարող է հասնել նաեւ մարդասպանության։
«Ամեն ով որ իր եղբօրն ատում է, մարդասպան է. եւ գիտէք, որ ամեն մարդասպան յաւիտենական կեանք չունի հաստատուած իրանում»: Ա Հովհաննես 3։15
Մարդը, ով ունի անմաքուր հոգի, անմաքուր մտքեր, այլեւս մեղքերի հնարավոր կիրառողն է իրականության մեջ։
«Մարմնի ճրագն աչքն է․ արդ՝ թէ որ քո աչքը պարզ լինի, քո բոլոր մարմինը լուսաւոր կլինի։ Բայց թէ որ քո աչքը չար լինի, քո բոլոր մարմինը խաւար կլինի։ Ուրեմն՝ եթէ այն լոյսն որ քեզանում է՝ խաւար է, ապա խաւարը որքա՞ն ատելի»։ Մատթեոս 6։22-23
Հիսուս Քրիստոսի այս խոսքերն ասված են սրտի, հոգու մաքրության մասին։ Պարզ աչքը մտքերի եւ մտադրությունների անկեղծության, մաքրության, սրբության վկայությունն է, եւ այդ մտադրությունները հանգեցնում են բարի արարքների։ Եվ հակառակը. որտեղ աչքն ու սիրտը կուրացած են, այնտեղ թագավորում են մութ մտադրությունները, որոնք հետեւաբար կդառնան մութ գործեր։
Միայն մաքուր հոգով. մաքուր մտքերով մարդը կարող է մոտենալ Աստծուն, տեսնել Նրան։ Աստծուն տեսնում են ոչ թե ֆիզիկական աչքերով, այլ մաքուր հոգու ու սրտի հոգեւոր տեսողությամբ։ Եթե մարդու հոգեւոր տեսողության այդ օրգանը մթագնած է, խաթարված է մեղքով, Տիրոջն այդ մարդը չի տեսնի։ Դրա համար պետք է հեռու մնալ մեղավոր, չար, անմաքուր մտքերից, վանել դրանք որպես թշնամու կողմից տարածվող մտքեր, եւ հոգում դաստիարակել լուսավորն ու բարին։ Այդ մտքերը սնվում են աղոթքներով, հավատքով եւ հուսալով Աստծուն, սիրով Նրա, մարդկանց եւ ամեն Աստծո արարածների նկատմամբ։
Անահիտ ԲԱՆՈՒՉՅԱՆ
