Աստված խոստանում է մեր ողջ կյանքի ընթացքում լինել մեզ հետ՝ կառավարելով մեր հոգեւոր աճի երկարատեւ ընթացքը։
«Եւ հաստատ համոզուած եմ սորան, թէ Նա, որ ձեզանում սկսեց այս բարի գործը, կկատարէ էլ մինչեւ Յիսուս Քրիստոսի օրը»։ Փիլիպպեցիս 1։6
Հոգեւոր աճի առաջնահերթ պատճառը ամփոփված է Հիսուսում։ Այսպես է ասում Սուրբ Գիրքը. «Ուրեմն ինչպէս Քրիստոս Յիսուս Տէրն ընդունեցիք՝ նորանում գնացէք. Արմատացած եւ նորանում շինուած, եւ հաւատքումը հաստատուած՝ ինչպէս որ սովորեցիք՝ աճելով նորանում գոհութիւնով»։ Կողոսացիս 2։6-7
Ի՞նչ է հոգեւոր աճը
Հոգեւոր աճը Հիսուս Քրիստոսին աստիճանաբար նմանվելու գործընթացն է։ Երբ մենք հավատում ենք Հիսուսին, Սուրբ Հոգին սկսում է մեր վերափոխման գործընթացը՝ հանգեցնելով Նրա կերպարին համապատասխանեցմանը։ Հոգեւոր աճի լավագույն օրինակը հավանաբար նկարագրված է Պետրոս առաքյալի երկրորդ թղթում.
«Ինչպէս որ նորա աստուածային զօրութիւնը շնորհեց մեզ այն ամենը, որ կեանքի եւ աստուածապաշտութեան համար պետք է նորա գիտութիւնովը, որ մեզ կանչեց փառքով եւ առաքինութիւնով, որոնցով ամենամեծ եւ պատուական խոստմունքներ են տրուած մեզ, որ նորանցով հաղորդակից լինիք աստուածային բնութեանը՝ աշխարհքի մէջ ցանկութիւնից եղած ապականութիւնից հեռու փախչելով։ Եւ սոյն այս բանի համար ամեն ջանք անելով ձեր հաւատքովը ներկայացրէք առաքինութիւնը, եւ առաքինութիւնովը գիտութիւնը, եւ գիտութիւնովը ժուժկալութիւնը, եւ ժուժկալութիւնովը համբերութիւնը, եւ համբերութիւնովն աստուածապաշտութիւնը, եւ աստուածապաշտութիւնովն եղբայրսիրութիւնը, եւ եղբայրսիրութիւնովը սէրը։ Որովհետեւ այս բաները ձեզանում մնալով եւ աճելով դատարկ եւ անպտուղ չեն անիլ ձեզ մեր Տէր Յիսուս Քրիստոսի գիտութիւնումը»։ Բ Պետրոսի 1։3-8
Գաղատացիս թղթում բերված է երկու ցանկ։ Առաջին ցանկում թվարկված են մարմնավոր գործերը, որոնցով բացահայտվում է մեր կյանքը մինչ այն պահը, երբ մենք հավատացինք Հիսուսին։ Մարմնի գործերը արարքներ են, որոնք պետք է խոստովանել, զղջալ եւ, Աստծո օգնությամբ, հաղթահարել։ Հավատքի աճի ժամանակ «մարմնի գործերը» աստիճանաբար քիչ են դրսեւորվում մեր կյանքում։
«Եւ յայտնի են մարմնի գործերը, որ են շնութիւն, պոռնկութիւն, պղծութիւն, գիճութիւն, կռապաշտութիւն, կախարդութիւն, թշնամութիւններ, կռիւներ, նախանձներ, բարկութիւններ, հակառակութիւններ, երկպառակութիւններ, բաժանմունքներ։ Չար նայուածներ, սպանութիւններ, արբեցութիւններ, անառակութիւններ, եւ ինչ որ սորանց նման են, որ առաջուց ասում եմ ձեզ, ինչպէս էլ առաջուց ասում էի, թէ այսպիսի բաներ գործողներն Աստուծոյ արքայութիւնը չեն ժառանգիլ։ Բայց Հոգու պտուղն է՝ սէր, ուրախութիւն, խաղաղութիւն, երկայնամտութիւն, քաղցրութիւն, բարութիւն, հաւատք, հեզութիւն, ժուժկալութիւն. այնպիսիների դէմ օրէնք չկայ»։ Գաղատացիս 5։19-23
Երկրորդ ցանկը ընդգրկում, ներառում է «Հոգու պտուղները»։ Դրանցով ներկայացվում է մեր կյանքն այսօր, երբ մենք գտնում ենք փրկությունը Հիսուս Քրիստոսում։ Հոգեւոր աճը որոշակիացվում է Հոգու պտուղներով, որոնք շատ ավելի հաճախ են դրսեւորվում հավատացյալի կյանքում։
Անահիտ ԲԱՆՈՒՉՅԱՆ
