«Եւ երբոր իրանց վկայութիւնը կկատարեն, այն ժամանակ անդունդիցը դուրս եկող գազանը կռիւ կտայ նորանց հետ, եւ կյաղթէ նորանց եւ կսպանէ նորանց»։ Հայտնություն 11։7
Ինչպես նշեցինք, երկու վկաներին սպանելու է ապոկալիպտիկ հասարակության գերագույն կառավարիչը։ Նա անշուշտ կլինի քաղաքական ամենահայտնի գործիչը, այդ ժամանակներում տեղեկատվական տեխնոլոգիաներն ավելի առաջընթաց կունենան, եւ քարոզչությունը կհասնի աննախադեպ ծավալների ու ազդեցության։ Չափից դուրս հայտնի են լինելու նաեւ Եղիան ու Ենովքը, եւ նրանց մասին նույնպես իմանալու են բոլորը։ Եվ խնդիր է դրվելու նրանց ամեն կերպ պախարակելու, սեւացնելու, հեղինակազրկելու։ Այնպես որ, նրանց լուռ, անաղմուկ, սուսուփուս սպանել, վերացնել ասպարեզից չի հաջողվի։ Նրանց սպանելու եւ թողնելու են, ինչպես արդեն մեջբերել ենք, երեք օր ու կես՝ ի տես բոլորի. «Եւ նորանց դիերը ընկած կմնան այն մեծ քաղաքի հրապարակումը, որի անունն հոգեւորապէս Սոդոմ եւ Եգիպտոս է կոչվում. որտեղ մեր Տէրն էլ խաչուեցաւ»։ Հայտնություն 11։8
Ինչպես գիտենք, Տերը խաչվել է Երուսաղեմում։ Ի՞նչ է սա նշանակում։ Սա նշանակում է, որ Երուսաղեմը նմանվելու է Սոդոմին ու Եգիպտոսին։ Անգամ ներկայումս, մեղմ ասած, ոչ դասական կողմնորոշում ունեցողների շքերթներ են անցկացվել Թել Ավիվում, բայց մի քանի անգամ փորձ է արվել դրանք անցկացնել նաեւ Երուսաղեմում։ «Եւ կտեսնեն ժողովուրդներից եւ ցեղերից եւ լեզուներից եւ ազգերից նորանց դիերը երեք օր եւ կէս, եւ թող չեն տալ, որ նորանց դնեն գերեզմանների մէջ։ Եւ երկրի վերայ բնակողները կուրախանան եւ կխնդան. եւ իրար ընծաներ կուղարկեն. որ այս երկու մարգարէները չարչարեցին երկրի վերայ բնակողներին»։ Հայտնություն 11։9-10
Այն ժամանակներում հուղարկավորելու անկարելիությունը համարվում էր անսահման անպատվություն։ Անօրենը փորձելու է ծաղրանքի ենթարկել անգամ վկաների անշնչացած մարմինները, որ բոլոր ազգերը, բոլոր ժողովուրդները տեսնեն, իմանան… Այսինքն՝ գործի են դրվելու տեղեկատվության տարածման ժամանակակից բոլոր միջոցներն ու մեթոդները։ Եվ մոլորակի գրեթե ողջ բնակչությունն ուրախանալու է նրանց մահից։
Այնուհետեւ, սակայն, կատարվելու է ամենաանսպասելին. «Եւ երեքեւկէս օրից յետոյ Աստուածանից կենդանի հոգի եկաւ մտաւ նորանց մէջ, եւ նորանք իրանց ոտների վերայ կանգնեցին. եւ մեծ վախ ընկաւ նորանց տեսնողների վերայ։ Եւ մեծ ձայն լսեցի երկնքիցը, որ ասում էր նորանց. Վեր ելէք այստեղ. եւ վեր ելան երկինքն ամպով. եւ նորանց թշնամիները տեսան նորանց»։ Հայտնություն 11։11-12
Կտեսնեն ժողովուրդներից եւ ցեղերից եւ լեզուներից եւ ազգերից… երեքուկես օր։ Ինչպե՞ս է սա հնարավոր. բնականաբար, միայն ուղիղ եթերով։ Հակաքրիստոսը փորձելու է բոլորին ցուցադրել նրանց ստորացուցիչ մահն ու անդառնալիությունը։ Սակայն այդ նույն ուղիղ եթերում երկու վկաները հարություն են առնելու, եւ դա լինելու է հակաքրիստոսի վերջի սկիզբը։ Սրանով եւս մեկ անգամ ցուցանվելու է Աստծո զորությունը եւ, իհարկե, մի վերջին փաստարկ է լինելու անհավատների համար։
Անահիտ ԲԱՆՈՒՉՅԱՆ
