Կիրակի օրը պատարագեց եւ քարոզեց Երեւանի Սուրբ Գրիգոր Նարեկացի Հայ կաթողիկե եկեղեցու ժողովրդապետ գերպ. հ. Մաշտոց վրդ. Զահթերյանը, նախագահությամբ՝ ամեն. եւ գերեջ. Տ.Տ. Ռաֆայել Պետրոս ԻԱ Տանն Կիլիկիո Կաթողիկե հայոց կաթողիկոս պատրիարքի, ներկայությամբ Հայաստանում Սիրիայի Հանրապետության արտակարգ եւ լիազոր դեսպան Դոկտոր Նորա Արիսեանի, Հայաստանի թեմի առաքելական կառավարիչ հայր Միքայել վարդապետի, հոգեվորականների եւ հավատացյալների հոծ բազմության։
Հայր սուրբը հուզմունքով արտասանած քարոզի մեջ նախ անդրադարձավ 13 օրեր առաջ Սիրիայի հայաբնակ վայրերին հարվածած երկրաշարժին՝ ասելով. «Պատմական հայրենիքի արհավիրքից հազիվ ճողոպրած ու պատմականորեն հայկական օրրան հանդիսացող Հալեպ քաղաքն ու շրջակա տարածքները երկրաշարժի թիրախ դարձան, որը նյութական կորուստներից զատ՝ խլեց հազարավոր մարդկանց կյանքեր, որոնցից անմասն չմնացին մեր ազգի զավակները…»: Ապա խորը կսկիծով ավելացրեց. «Այսօր այս սուրբ եւ անմահ պատարագի զոհը մատուցում ենք՝ ի հանգստություն զոհերի հոգիների եւ ի մխիթարություն նրանց ազգականների՝ ցավակից լինելով նրանց, ովքեր մի ակնթարթում կորցրին ամեն ինչ…»:
Այնուհետեւ Հայր սուրբը անդրադարձավ սիրիահայության կրած տառապանքներին՝ ասելով. «Պատմական Հալեպ քաղաքի մեր հայրենակիցները շուրջ երկու տասնյակ ի վեր մաքառում եւ փորձում են իրենց գոյությունը ապահովել՝ ջանալով իրենց մակույկը հոսանքին հառակ ուղղությամբ թիավարել, սակայն այս վերջին արհավիրքը շատ անսպասելի չափազանց ուժգին հարվածեց Սիրիայի ժողովրդին՝ մասնավորապես հայերիս…»:
Հայր Մաշտոցը հայ իրականության համար Հալեպ քաղաքի ունեցած կարեւոր նշանակությունը ամփոփեց հետեւյալ խոսքերով. «Հալեպ նշանակում է սփյուռքի մեկ սիրտ, որի ակունքները սկիզբ են առել դեռեւս վաղ միջնադարում, ուր հայերն ունեցել են հայկական գաղութ, որտեղ գործում էր միջնադարյան մանրանկարչության համալսարան…»:
Հայր սուրբն իր խորին շնորհակալությունը հայտնեց՝ մեջբերելով. «Ես այսօր իմ խորին շնորհակալությունն ու երախտագիտությունն եմ հայտնում յուրաքանչյուր հայի, ով ձեռք մեկնեց այս աղետալի արհավիրքից դուրս գալու ջանքերին։ Փառք եւ երախտագիտություն հայկական արտակարգ իրավիճակների եւ ներքին գործերի նախարարություններին, որոնք ամեն ջանք ներդնելով, չզլացան օգնություն ուղարկել Սիրիայի Հանրապետության բոլոր տարածքներին։ Եվ ոչ միայն Սիրիային, այլեւ Թուրքիային, ուր մեր պապերի պատմական հողերը դարձյալ արտասվում են…»:
Նա իր քարոզը եզրափակեց հետեւյալ կոչով. «Ուստի, օրհասական այս պահին պարտական ենք ազգովի ձեռք մեկնել այնտեղ բնակվող մեր հայրենակիցներին եւ ոչ միայն…»:
Սուրբ եւ անմահ պատարագի ավարտին տեղի ունեցավ հոգեհանգստյան պաշտոն` ի հանգստություն Սիրիայի երկրաշարժին զոհված մեր ազգակիցների հոգիների, այնուհետեւ Ամեն. կաթողիկոս պատրիարքը կատարեց վերջին օրհնությունը։ Ապա ներկաները իրենց ցավակցությունները հայտնեցին եկեղեցու դահլիճում։
