Հայտնության գրքի այս տողն «Արմագեդոն» բառը հոմանիշ է դարձրել բարու ու չարի վերջնական ճակատամարտի։ Այս անունով նկարահանվում են հոլիվուդյան ֆիլմեր, գրվում են գրքեր, հորինվում են համակարգչային խաղեր… Այդ ֆիլմերում, խաղերում ու գրքերում հերոսները փրկում են Երկիր մոլորակը արտաքին վտանգներից, երկնաքարերից եւ այլն։ Այնինչ երկիրը կործանվելու է ներքին թշնամու հետ պատերազմի, չարի ու չարության մեջ տարրալուծվելու հետեւանքով: Սրանից դուրս մարդկության մնացորդին փրկելու է Ինքը՝ Քրիստոսը։ Մի փոքր ուշ, Հայտնության գրքի 19-րդ գլխում Հովհաննես առաքյալը կնկարագրի Արմագեդոնում կայանալիք ճակատամարտն ու կողմերի զորաբանակները։ Երկրային արքաների բանակները գազանի գլխավորությամբ դուրս կգան հզոր բանակի դեմ, որը կգլխավորի անձամբ Հիսուս Քրիստոսը։
Արմագեդոնը լինելու է այն վայրը, որտեղ կայանալու է վերջին, վճռական մարտը բարու եւ չարի ուժերի միջեւ։ Եւ չարի ուժերը ջախջախվելու են։
Քարտեզների, գլոբուսի վրա չկա Արմագեդոն անունով բնակավայր կամ տեղավայր։ Կա փոքրիկ բնակավայր Մեգիդո անունով՝ Իսրայելի հյուսիսում։ Ենթադրվում է, որ Արմագեդոնը հրեական բլուրի անվան հունարեն արտաբերումն է՝ «հար Մեգիդո», որ նշանակում է Մեգիդո լեռ։ Այս բնակավայրով կամ նրա մոտով են անցել համաշխարհային պատմության շատ ու շատ անցքեր, իրադարձություններ։ Այստեղ են խաչվել ծովային ու ցամաքային մեծ առեւտրային ուղիները, այստեղ են կայացել խոշորագույն ճակատամարտերը։ Այստեղ են եգիպտացիները մեծ ճակատամարտ տվել իսրայելական բանակի դեմ, այստեղ է Սավուղ արքան կնքել իր մահկանացուն, այստեղ են մոնղոլները կրել խոշոր պարտություն… Այստեղ 1799 թվին Նապոլեոնը պարտության մատնեց Օսմանյան կայսրության զորքերին։ Հավանաբար, պատահական չէ նաեւ այն հանգամանքը, որ այս լեռների անձավներում է ժամանակին թաքնվել Եղիա մարգարեն, ով վերջին օրերին երկիր է գալու՝ կատարելու վերջին քարոզը։ Խորհրդանշական է նաեւ, որ այստեղ, լեռների ստորոտում, քաղաքի մոտակայքում են կառուցվել Բահայ աղանդի հսկայական տաճարն ու այգիները։ Սա երիտասարդ կեղծ կրոնական ուսմունք է, որը շատ նման է քաղաքական այն ծրագրին, որը գազանը նախանշել է «համաշխարհային տիրակալի» համար։ Ըստ նրանց ուսմունքի՝ Աստված մեկ է, բոլոր կրոնները մեկ են, աշխարհի գլխավոր նպատակը պետք է լինի մարդկության նախապատրաստումը նոր աստվածհայտնությանը, ամենայն հավանականությամբ, նեռի հայտնվելուն։ Ըստ նրանց՝ եկեղեցիներ պետք չեն, ամեն հավատացյալ ինքն է որոնում ու գտնում ճշմարտությունը, բոլոր տեսակի ուղղությունները հավասարեցվում են, հայտարարվում է գիտության պաշտամունք, եւ գլխավորը՝ սահմանվում են համաշխարհային հանրության կարգեր՝ հիմնված համընդհանուր անվտանգության եւ միջազգային արդարության սկզբունքի վրա։ Այսինքն՝ ցանկանում են ստեղծել միասնական համաշխարհային քաղաքակրթություն, որը խոսում է մեկ լեզվով եւ դավանում նույն արժեքները։ Այս հոսանքի հետեւորդներն այսօր հաշվվում են մինչեւ յոթ միլիոն մարդ, սակայն իրենց «գաղափարներով» շատերին են գերում։
Եզեկիել մարգարեն, նկարագրելով գոգի եւ մագոգի վերջին ճակատամարտը, ասում է, որ դա տեղի է ունենալու Իսրայելի լեռներում։
Արմագեդոնը, այնուամենայնիվ, հոգեւոր ճակատամարտ է բարու ու չարի միջեւ եւ եթե ոչ ճակատամարտ, ապա մարտերն ու պատերազմներն ընթանում են անդադար։
Անահիտ ԲԱՆՈՒՉՅԱՆ
