«Բայց ժամանակ կգայ, եւ հիմա է, որ ճշմարիտ երկրպագողները հոգով եւ ճշմարտութիւնով կերկրպագեն Հօրը, որովհետեւ Հայրն էլ այսպէս է ուզում իր երկրպագողներին»։ Հովհաննես 4։23
Ժամանակին Երուսաղեմի տաճարը միակն էր շրջապատում որպես լուսատու աղբյուր։ Միայն այնտեղ էր կարելի կատարել զոհաբերություն եւ երկրպագություն։ Շուրջբոլորը կային շատ այլադավանական տաճարներ, բայց իրական Աստծո տաճարը մեկն էր։ Այժմ իրական տաճարները բազում-բազում են, չարքերի տաճարներն անհետացել են։ Քրիստոնեական տաճարներում կարող ենք աղոթել եւ փառաբանել Աստծուն ամենուր, անկախ տաճարի գտնվելու աշխարհագրական վայրից։ Այսօր իրականում երուսաղեմյան տաճարի անհրաժեշտությունը չկա։ Սակայն դրա անհրաժեշտությունն ունեն հրեաները, ովքեր չեն ընդունում Հիսուսին եւ ցանկանում են վերականգնել իրենց երբեմնի հզորությունը։ Իրենց պատվիրանների կեսից ավելին կապված է տաճարի հետ, եթե չկա տաճարը, դրանք անիրականանալի են։ Եվ նրանք անպայման փորձելու են կառուցել տաճարը։ Կան բազմաթիվ մեկնաբանություններ, թե Նեռը նստելու է Երուսաղեմի վերականգնված տաճարում, սակայն կա նաեւ տեսակետ, թե նա նստելու է քրիստոնեական տաճարում, որովհետեւ նրա նպատակը լինելու է հենց քրիստոնյաներին հետ դարձնել ճշմարիտ ուղուց։
Այնուհետեւ Հայտնության գիրքը պարզաբանում է, որ գազանի յոթ գլուխը, բացի յոթ սարերից, ունի նաեւ այլ իմաստներ, օրինակ յոթ թագավորներն են. «Եւ եօթը թագաւորներն են. Հինգը ընկան, եւ մէկը կայ, միւսը դեռ չէ եկել. եւ երբոր գայ մի քիչ ժամանակ պէտք է մնայ։ Եւ այն գազանը որ կար եւ չկայ, նա էլ ութերորդն է եւ այն եօթնիցն է, եւ կորուստն է գնում»։ Հայտնություն 17։10-11
Ըստ ամենայնի, ութերորդ հրեշտակը եղել է Լյուցիֆերը, որ ցած նետվեց։ Ութը առավել ամբողջականության խորհրդանիշ է, պառկած ութը հավերժության նշան է… յոթը լիարժեքության խորհրդանիշ է այս աշխարհում, իսկ ութն առավել ընդգրկունությամբ ելք է այս աշխարհից այլ աշխարհ։ Ութերորդը, որ կար եւ չկա, ըմբոստանալու է յոթ թագավորությունների կառավարման ավարտից հետո, որը խորհրդանշում է մարդկային ինքնուրույն կառավարման ամբողջությունը ողջ պատմության ընթացքում։ Իսկ ութերորդ թագավորությունը՝ նեռի թագավորությունը, լինելու է ամբողջությամբ սատանայի տիրապետության, ազդեցության, ներգործության ներքո, ով թաքնվելու է նեռի գործունեության, գործողությունների թիկունքում։
Հրեշտակը բացատրում է նաեւ տասը եղջյուրների իմաստը. «Եւ այն տասը եղջիւրը որ տեսար, տասը թագաւորներ են. որոնք դեռ թագաւորութիւն չեն առել, այլ թագաւորի պէս իշխանութիւն են անում մէկ ժամ այն գազանի հետ։ Սորանք մէկ կամք ունին, եւ իրանց զօրութիւնը եւ իշխանութիւնը կտան գազանին»։ Հայտնություն 17։12-13
Որո՞նք են այն տասը թագավորները, ովքեր իրենց իշխանությունն ու զորությունը տալու են գազանին։ Ըստ որոշ մեկնիչների՝ դրանք կարող են լինել մեծ Թուրանի մեջ միավորվող երկրները՝ Թուրքիայի գլխավորությամբ։ Ստեղծվում է մի միավորում, որն արդեն առաջադրում է ոչ թե առանձին առաջնորդների, այլ ամբողջ մի առաջնորդների պահունակ՝ ընդդեմ Աստծո, ընդդեմ Տիրոջ բանակի։ Երկրորդ մեսիական սաղմոսում դեռ գրված է. «Երկրի թագաւորները վեր են կենում, եւ իշխաններն իրար հետ խորհուրդ են անում Տիրոջ դէմ եւ նորա Օծեալի դեմ թէ կոտրենք նորանց կապանքները, եւ դէն գցենք նորանց չուանները մեզանից»: Սաղմոս 2։2-3
Ի՞նչ է սա, եթե ոչ նույնանման, նույնաբովանդակ իշխանավորների կոլեգիալ որոշում՝ նույն ոգով…
