«Երկրի թագաւորները վեր են կենում, եւ իշխաններն իրար հետ խորհուրդ են անում Տիրոջ դէմ եւ նորա Օծեալի դեմ»: Սաղմոս 2։2
Որոշ մեկնիչներ այս տողերի հետ զուգահեռ են տարել Դանիելի մարգարեությունը, որը նա արել էր հին Բաբելոնում, այն ժամանակ, երբ իսրայելցիները գերության մեջ էին այնտեղ։ Բաբելոնյան թագավորության հիմնադիր, հզոր արքա Նաբուգոդոնոսորը երազում տեսնում է կուռքի արձան, որի գլուխը ոսկուց էր, կուրծքը եւ ձեռքերը՝ արծաթից, փորն ու կոնքերը՝ պղնձից ու երկաթից, իսկ ոտքերը՝ մասամբ երկաթից, մասամբ՝ կավից։ Դանիելն արքայի համար մեկնել է երազը, որ կուռքի ամեն մի մասը տարբեր թագավորություններ են պատմության ընթացքին զուգահեռ. ոսկե գլուխն ինքը՝ Նաբուգոդոնոսորն է, եւ հին Բաբելոնը՝ աշխարհի առաջին կայսրությունը, արծաթե կուրծքն ու ձեռքերը՝ երկու մասից բաղկացած, բայց միասնական պարսկական հզոր կայսրությունը, որը Ք. ա. 6-4-րդ դարերում զբաղեցնում էր տարածք Հնդկաստանից մինչեւ Հունաստան, որտեղ բնակվում էր մոլորակի բնակչության կեսը։ Այն նվաճեց Ալեքսանդր Մակեդոնացին, որը, ըստ մեկնության, կուռքի պղնձե հատվածն էր, եւ վերջին հատվածը՝ մեկ երկաթյա, մեկ՝ թուլացող-կավե ոտքերը մեկնվում է, թե Հռոմն է։ Կայսրությունների պատմական հերթագայությունների մեջ էլ կարելի է նկատել գազանի եղջյուրների խորհուրդը։ Այստեղ ներկայացված են այն կայսրությունները, որոնք, ըստ Դանիել մարգարեի, ընթացել են Աստծուն հակառակ։ Այն տիրակալներն ու կայսրությունները, որոնք հավատքի համար հալածում էին իսրայելցիներին՝ Աստծո ժողովրդին, այդպես էլ ընկալվում էին։
Այն կուռքի թուլացող ոտքերն ու դրանց տասը մատները ներկայումս մեկնվում են նաեւ որպես այն տասը գերտերությունների ղեկավարները, ովքեր իշխանությունը փոխանցելու են նեռին։ Իրական քրիստոնեական երկրների ղեկավարները պետք է հանդես գան խաչի նշանի ներքո եւ դատեն Քրիստոսի օրենքներով։ Ներկայիս փողկապավոր ղեկավարներից շատերը նույնիսկ ամաչում են Հիսուսի անունը տալ։ Որոշ երկրներում սկսել են արգելել Ծննդյան տոների նշումը հենց այդ անունով, գերադասում են ասել՝ նշում ենք տոնական օրեր։ Բայց ո՛չ՝ Ծննդյան տոներ։ Որոշ երկրներում անգամ սկսում են բացահայտ հակաքրիստոնեական քարոզ ու հայհոյախոսություն, պայքար քրիստոնեության ու քրիստոնեական արժեքների դեմ. «Սորանք պատերազմ կանեն Գառի հետ, եւ Գառը կյաղթէ նորանց, որովհետեւ տէրերի Տէր է, եւ թագաւորների Թագաւոր. եւ նորանք որ նորա հետ են, կոչուած, ընտրուած եւ հաւատարիմ են»։ Հայտնություն 17։14
Այժմ ժամանակակից աշխարհում իշխանությունները ազդեցություն ունեն ԶԼՄ-ների, քաղաքականության, էթիկայի, բարոյականության… ամեն ինչի նկատմամբ։ Եվ այս ամենը թելադրվում է ուժի գործադրմամբ, այնպիսի ուժի, որ… փորձիր չենթարկվել… ձեզ անմիջապես կհեռացնեն զբաղեցրած ցանկացած դիրքից ու կհանեն կյանքի իրենց կողմից կառավարվող ընթացիկ հունից։ Այսօր ամբողջ «առաջավոր» աշխարհում ստիպողաբար արմատավորվում է այլասերությունը… Ի՞նչ է սա, եթե ո՛չ սատանայություն։ Գործում է քաղաքական-ֆինանսական հզոր կենտրոն, որը փորձում է հաղթահարել ողջ մարդկությունը։ Ի՞նչ է սա, եթե ոչ սատանայի պայքար Աստծո դեմ։
Անահիտ ԲԱՆՈՒՉՅԱՆ
