«Եւ այն տասը եղջիւրը որ տեսար, տասը թագաւորներ են. որոնք դեռ թագաւորութիւն չեն առել, այլ թագաւորի պէս իշխանութիւն են անում մէկ ժամ այն գազանի հետ։ Սորանք մէկ կամք ունին, եւ իրանց զօրութիւնը եւ իշխանութիւնը կտան գազանին»։ Հայտնություն 17։12-13
Այս թագավորները, անշուշտ, իրենց հպատակների մոտ չեն կորցնելու իրենց «արժանապատվությունը», նրանք տպավորություն են ստեղծելու, թե իրենք են կառավարում։ Սատանային ծառայելու համար նրանց պետք է լինելու ունենալ դիվային խոնարհություն։ Երկրների ղեկավարները տպավորություն են ստեղծում, թե կառավարում են երկիրը, իրականում իրենք են ենթարկվում սատանային։ Բարձր իշխանության ձգտող մարդիկ, մինչեւ հասնում են իրենց ըղձալի երազանքին, ճանապարհին ամբողջովին կորցնում են խիղճը։
Այնուհետեւ կարծես թե կատարվում է անսպասելին. «Եւ տասը եղջիւրը, որ տեսար գազանի վերայ, նորանք կատեն պոռնկին, եւ նորան ամայի եւ մերկ կանեն, եւ նորա միսերը կուտեն եւ կրակով կայրեն նորան։ Որովհետեւ Աստուած դրաւ նորանց սրտերի մէջ որ նորա կամքն անեն, եւ միակամ լինեն, եւ իրանց թագաւորութիւնը տան գազանին մինչեւ որ Աստուծոյ խօսքերը կատարուին»։ Հայտնություն 17։16-17
Հայտնի փաստ է, որ հեղափոխությունները կուլ են տալիս իրենց հերոսներին, վեցնոցներն ըմբոստանում են տուզերի դեմ, երբ հանցավոր աշխարհի կնքահայրը թուլանում, սայթաքում կամ ընկնում է, նրան հոշոտում են իր իսկ տաքացրած, աճեցրածները։ Երբ տասը եղջյուրները, տասը կառավարիչները պոռնիկի գինուց արբած խրախճանք էին անում, իրենց ներսում միաժամանակ ատում էին նրան, որովհետեւ նա՛ էր բարձրում, նա էր իրենց թելադրում, հմայում, գայթակղում… ապականում։ Նրան ե՛ւ ենթարկվում էին, ե՛ւ վախենում էին նրանից, ե՛ւ ատում էին նրան։
«Եւ կինը, որ տեսար, այն մեծ քաղաքն է, որ թագաւորութիւն ունի երկրի թագաւորների վերայ»։ Հայտնություն 17։18
Այդ քաղաքը կարող է լինել գերմեծ քաղաքներից ցանկացածը, ուր կենտրոնացել են ֆինանսական, քաղաքական, ռազմական հզոր ներուժ եւ լծակներ։ Դա կարող է լինել, ասենք, Նյու-Յորքի նման հզոր ֆինանսական քաղաքը, ուր գտնվում է նաեւ ՄԱԿ-ի գրասենյակը, որտեղ հավաքվում են աշխարհի բոլոր երկրների ներկայացուցիչները, սակայն որոշումներ կայացնում են գերհզոր «ընտրյալները»։ Քաղաքները հընթացս կարող են հերթագայվել, բայց թե որտեղ կկայանա Աստծո դատաստանը, դա Աստծուն է հայտնի։ Հնարավոր է` դա լինի Երուսաղեմը, որն անվանված է երկրային հոգեւոր Սոդոմ, հոգեւոր Եգիպտոս…
Անահիտ ԲԱՆՈՒՉՅԱՆ
