Իսրայելի եւ Պաղեստինի միջեւ բռնկված հակամարտության նոր փուլը հանգեցրել է այն բանին, որ աշխարհը բաժանվել է երկու ճամբարի. դա դրսեւորվել է ՄԱԿ-ի Անվտանգության խորհրդի նիստում, որի ընթացքում Չինաստանը, որը նախագահում է Անվտանգության խորհրդում, ԱՄՆ-ին մեղադրել է հաշտության կազմակերպման ջանքերը սաբոտաժի ենթարկելու մեջ: Չինաստանի արտգործնախարար Վան Ին ասել է, որ Վաշինգտոնը խախտում է անաչառ լինելու պարտավորությունը եւ սատարում է Իսրայելին: Պեկինն առաջարկել է, որ կողմերի միջեւ բանակցությունները կայանան Չինաստանում: Դա հակասում է Մոսկվայի դիրքորոշմանը, որը նախաձեռնել է խորհրդակցություններ «մերձավորարեւելյան քառյակի» (ՌԴ, ԱՄՆ, ԵՄ, ՄԱԿ) շրջանակներում:
Ինչպես նշում է Չինաստանի պետական CGTN հեռահաղորդակցական հոլդինգը, Անվտանգության խորհրդի նախագահի պաշտոնը, որը Չինաստանը զբաղեցնում է մայիսին, նրան հնարավորություն է տալիս խաղալ ամենակարեւոր խաղաղապահ դերը մոլորակի վրա: Չինաստանը հետեւողականորեն հավատարիմ է մնում պրագմատիկ կուրսին՝ հանդես գալով միջազգային իրավունքի պահպանման օգտին եւ օգնելով կողմերին՝ հանգելու իրատեսական փոխզիջման: Ի տարբերություն որոշ այլ պետությունների, ՉԺՀ-ն չի աջակցում մի կողմին՝ ի վնաս մյուսի:
«Ցավոք, միայն մեկ երկրի խոչընդոտման պատճառով Անվտանգության խորհուրդը չկարողացավ միաձայն խոսել: Մենք ԱՄՆ-ին կոչ ենք անում կատարել իր պարտավորությունները եւ արդար դիրքորոշում որդեգրել»,- ասել է Վան Ին նիստի ընթացքում, որն անցկացվել է տեսակապի ձեւաչափով:
Վերջին շրջանում պարբերաբար հնչում են քննադատություններ Վաշինգտոնի հասցեին ինչպես չինական, այնպես էլ ռուսական դիվանագիտության կողմից: Դրանով հիմա քչերին կարելի է զարմացնել: Նոր պահը, ինչպես նշում է «Times of Israel»-ը, այն է, որ Չինաստանը դուրս է գալիս ստվերից: Նախկինում, նույնիսկ որպես Անվտանգության խորհրդի մշտական անդամ, նա փոքր դեր է խաղացել խաղաղ բանակցություններում, որոնցում տոն է տվել ԱՄՆ-ն: Չինաստանը նաեւ միջազգային միջնորդների «մերձավորարեւելյան քառյակի» անդամ չէ:
Եվ հիմա, երբ ողբերգական իրադարձություններ են տեղի ունենում, Չինաստանը տեղափոխվում է առաջին պլան եւ նույնիսկ առաջարկում կարգավորման իր բաղադրատոմսը: Ո՞րն է դրա էությունը: Պեկինը հայտարարում է, որ իրավիճակի վատթարացման հիմնական պատճառն այն է, որ Պաղեստինի հարցը երկար ժամանակ է՝ արդարացիորեն լուծված չէ: Դա նշանակում է, որ անկախ պետություն ստեղծելու Պաղեստինի իրավունքը չի իրականացվել եւ բազմիցս խախտվել է: Իսկ առանց դրա՝ ոչ Պաղեստինը, ոչ Իսրայելը չեն կարողանա հասնել իրական խաղաղության:
Մա Սյաոլինը՝ Չժեցզյան նահանգի համալսարանի դեկանը, ասում է, որ ԱՄՆ-ն ցանկանում է պաղեստինյան հարցը մղել վերջին պլան: Դա է պատճառը, որ ամերիկյան պետությունը խոչընդոտում է Անվտանգության խորհրդում այդ հարցի քննարկմանը: Իսկ Չինաստանը պնդում է, որ հարցը հնարավոր է կարգավորել միայն երկու պետությունների ստեղծման հիմքի վրա. այսինքն՝ Իսրայելի կողքին պետք է ստեղծվի պաղեստինյան անկախ պետություն Հորդանան գետի արեւմտյան ափին: Պեկինի դիրքորոշումը հետեւողական է. նա կպաշտպանի Պաղեստինի «արդար» գործը: Այս մասին խոստացել է Վան Ին:
Այստեղ կարծես սկզբունքային տարբերություններ չկան Մոսկվայի եւ Պեկինի գծերի միջեւ: Բայց չէ՞ որ ՉԺՀ-ն նախաձեռնել է բանակցություններ չինական պլատֆորմի շուրջ, իսկ Մոսկվան առաջարկել է անցկացնել «մերձավորարեւելյան քառյակի» հանդիպում, եւ այն արդեն կայացել է: Ինչպես նշված է ՌԴ ԱԳՆ կայքում, քննարկվել են «քառյակի» հնարավոր գործնական քայլերը` ուղղված իրավիճակի շուտափույթ դեէսկալացիային, հրադադարի ռեժիմի հաստատմանը եւ քաղաքացիական բնակչության պաշտպանության ապահովմանը: Միեւնույն ժամանակ հայտարարվել է միջազգային հումանիտար իրավունքի նորմերի խստորեն պահպանման անհրաժեշտության մասին:
Ռուսական կողմը շեշտել է, որ զինված առճակատումն անհապաղ դադարեցնելու ջանքերի հետ մեկտեղ կարեւոր է հնարավորինս շուտ սկսել ստեղծել բարենպաստ պայմաններ պաղեստինա-իսրայելական ուղիղ բանակցությունների համար՝ Անվտանգության խորհրդի եւ ՄԱԿ-ի Գլխավոր ասամբլեայի համապատասխան բանաձեւերի, ինչպես նաեւ «երկու պետությունների՝ Պաղեստինի եւ Իսրայելի սկզբունքի» հիման վրա… Այսպիսին էր ՌԴ ԱԳՆ-ի նախաձեռնությունը: Իսկ Պետդումայի միջազգային գործերի հանձնաժողովի նախագահ Լեոնիդ Սլուցկին հայտարարել է, որ Ռուսաստանը նույնիսկ իր հարթակը կարող է տրամադրել իսրայելա-պաղեստինյան շփումների համար:
Հարց է առաջանում. արդյոք Մոսկվան եւ Պեկինը պատրա՞ստ են միահամուռ գործել, թե՞ գնացքը քաշում են տարբեր ուղղություններով: Այստեղ, իհարկե, լուրջ հակասություններ չկան: Ռուսաստանն առաջարկում է օգտագործել առկա մեխանիզմը, եւ սկզբի համար անհրաժեշտ է, որ այն գործի: Իսկ Չինաստանի՝ միջնորդ դառնալու առաջարկը նոր մեխանիզմ է: Ռուսաստանը դժվար թե դեմ լինի, որ Չինաստանը միանա «քառյակին»: Մյուս կողմից՝ պարզ է, որ ոչ մի մեխանիզմ չի կարող լուծել այս հակամարտությունը: Այս առումով պետությունների հայտարարություններն ավելի շատ քարոզչական ու գաղափարական իմաստ ունեն:
Մինչ քաղաքագետները կարծիք են հայտնում իսրայելա-պաղեստինյան հակամարտության հետագա ընթացքի վերաբերյալ, զոհերի թիվը, ցավոք, անշեղորեն ավելանում է. Գազային հասցված իսրայելական ավիահարվածների հետեւանքով մայիսի 17-ի դրությամբ զոհերի թիվը հասել է 212-ի. նրանցից 61-ը երեխաներ են, 36-ը՝ կանայք: Վիրավորվել է 1400 մարդ, այդ թվում՝ 400 երեխա եւ 270 կին: Այս մասին հայտնում է պաղեստինյան անկլավի առողջապահության նախարարությունը:
