Վերջին 10 օրվա ընթացքում Վրաստանում արձանագրված սոցիալական անհնազանդության երկու խոշոր միջադեպն էլ կապված են այդ երկրում առկա ադրբեջանաթուրքական գործոնի հետ: Ադրբեջանցիների ու թուրքերի պատկառելի թիվը եւ կենսագործունեության տարբեր ոլորտներում ազդեցության մեծացումն արդեն իրենց օրինաչափ հակազդեցությունն են գտնում էթնիկ վրացի հասարակության շրջանում:
Մայիսի 16-ին Վրաստանի Դմանիսի քաղաքում ադրբեջանցիների եւ վրացիների միջեւ ծեծկռտուք էր տեղի ունեցել, որը շարունակվում էր մի քանի օր՝ բախումների մեջ ներգրավելով ավելի շատ թվով քաղաքացիների: Վրացական իշխանությունները մեծ թվով իրավապահներ էին կենտրոնացրել քաղաքում՝ թույլ չտալով կողմերին օժանդակող մարդկանց խմբերի մուտքը բնակավայր: Տեւական ժամանակ չէր հաջողվում կրքերն այստեղ հանդարտեցնել:
Ոչ պակաս զանգվածային ակցիայի առիթ է դարձել թուրքական «Էնկա» ընկերության կողմից «Նամախվան ՀԷԿ»-ի կառուցման նախաձեռնությունը: Այս անգամ ակցիայի կազմակերպիչները վրաններ են տեղադրել Թբիլիսիի Հանրապետության հրապարակում: Ցուցարարների թիվն ավելանում է շրջաններից ժամանած քաղաքացիների շնորհիվ: Ըստ ցուցարարների՝ ՀԷԿ-ի շինարարության թույլտվությունը կխաթարի Ռիոնի կիրճի գեղեցկությունն ու էկոհամակարգը: Նրանք գտնում են, որ «Էնկան» պետք է լքի կիրճը, կասեցվի ընկերության հետ կնքված պայմանագիրը, որը գործում է 2015-ից:
Ցուցարարները պահանջում են նաեւ էկոնոմիկայի նախարարի հրաժարականը եւ պատասխանատվության ենթարկել նրանց, որոնք անմիջականորեն մասնակցել են այդ նախագծին: Վրաստանի վարչապետ Իրակլի Ղարիբաշվիլին մարտին հայտարարել էր, որ թեեւ «Նամախվան ՀԷԿ»-ի ամբարտակի կառուցումը շատ կարեւոր է Վրաստանի համար, սակայն բնակիչների եւ բնապահպանների բողոքի ֆոնին այն դադարեցվել է 9-12 ամսով:
Աներկբա է, որ Վրաստանում թուրք-ադրբեջանական ներկայության աննախադեպ ծավալները հանգեցրել են էթնիկ վրացիների եւ Վրաստանում բնակվող մյուս ժողովուրդների օրինաչափ հակազդեցությանը: Չնայած այդ երկրի իշխանությունները պնդում են, որ ադրբեջանցիները նույնպես Վրաստանի քաղաքացիներ են, եւ նրանց իրավունքների պաշտպանությունը չի կարող մյուս քաղաքացիների իրավունքներից առանձին դիտարկվել, սակայն փաստ է, որ նրանք ընդհարվել են էթնիկ հողի վրա ձեւավորված լուրջ հակասության: Վերոհիշյալ դեպքերը փաստում են, որ այս երկրում մեծանում է լարումն արդեն Վրաստանում մեծությամբ երկրորդ էթնիկ շերտ հանդիսացող թյուրքերի ազդեցության ավելացման հետեւանքով: Այս ամենն արդյունք է առաջին հերթին Թուրքիայի ծավալապաշտական քաղաքականության, որի սողացող տարբերակը լայն թափ ստացավ Սաակաշվիլիի ջանքերով՝ հակաթուրքական կեցվածքով Աջարիայի առաջնորդ Ասլան Աբաշիձեի հեռացումից հետո: Եթե Վրաստանի իշխանություններին չհաջողվի բալանսավորված քաղաքականություն վարել, ապա էթնիկ հողի վրա հակասությունը կունենա ավելի բարդ դրսեւորումներ, ինչը ցանկալի չէ նաեւ մեզ համար…
