Իրանի հետախուզության նախկին նախարար Ալի Յունեսին մի շարք սենսացիոն հայտարարություններ է արել: Նրա խոսքերով՝ «Մոսադը» թափանցել է Իսլամական Հանրապետության պետական կառույցներ, մինչդեռ անվտանգության ծառայությունները զբաղված են իրանցիների, այլ ոչ թե իսրայելցի լրտեսների հետապնդմամբ: Ավելի վաղ նման հայտարարություններ է արել նախկին նախագահ Մահմուդ Ահմադինեժադը, ով, ինչպես հայտնի է, այս տարի դուրս է մնացել նախագահական մրցարշավից:
Ալի Յունեսին խոստովանել է, որ իսրայելական «Մոսադ» ծառայությանը հաջողվել է բավական խորը ներթափանցել երկրի պետական համակարգեր՝ ավելացնելով, որ, կապված դրա հետ, իրանական պաշտոնատար բոլոր անձինք պետք է վախենան իրենց կյանքի համար: Այդ մասին նա հայտարարել է օրերս իրանական «Jamaran» կայքին տված հարցազրույցում: Նրա խոսքերով՝ Իրանում «անվտանգության զուգահեռ ինստիտուտների» ստեղծումը բացասաբար է անդրադարձել հետախուզության նախարարության աշխատանքի վրա ու թուլացրել այն:
Ալի Յունեսին հետախուզության ու ազգային անվտանգության նախարարի պաշտոնը զբաղեցրել է Մուհամմադ Խաթամիի նախագահության շրջանում՝ 1997-2005 թթ.: Հաղորդվում է, որ «Jamaran» կայքը մտերիմ հարաբերություններ է պահպանում Իրանի Իսլամական Հանրապետության հիմնադրի թոռան՝ Հասան Խոմեյնիի հետ:
Նրա խոսքերը համապատասխանում են Իրանի նախկին նախագահ Մահմուդ Ահմադինեժադի արած այն հայտարարություններին, ըստ որոնց՝ իրանական հետախուզության բարձրաստիճան պաշտոնյաներից մեկը, ով պատասխանատու է իսրայելական լրտեսներին դիմակայության համար, Իսրայելի գործակալ է: Ահմադինեժադի խոսքերով՝ Իրանում Իսրայելի հետախուզական գործողությունների հաջողությունը, այդ թվում՝ միջուկային ու տիեզերական ոլորտների հետ կապված գաղտնի փաստաթղթերի գողությունը, կարող են բացատրվել միայն մի հանգամանքով՝ «Մոսադի» գործակալներին հաջողվել է թափանցել պետական անվտանգության ծառայություններ:
«Այս կոռումպացված բանդան (Ահմադինեժադն այսպես է անվանել իրանական հետախուզությունը-խմբ.) պետք է բացահայտի իր դերը միջուկային գիտնականների սպանության ու Նաթանզում ուրանի հարստացման գործարանում պայթյունների մեջ: Նրանք կարեւոր փաստաթղթեր են գողացել Տորկուզաբադից ու Իրանի տիեզերական գործակալությունից: Սա կատակ չէ: Գողացվել են չափազանց կարեւոր փաստաթղթեր, եւ երկրի անվտանգությունը սպառնալիքի տակ է»,- հայտարարել է նախկին նախագահը:
Մահմուդ Ահմադինեժադի հայտարարությունները հնչել են այն բանից հետո, երբ «Մոսադի» նախկին ղեկավար Յոսի Քոենը բացահայտեց Թեհրանի դեմ իր երկրի իրականացրած գործողությունները, այդ թվում՝ միջուկային արխիվի գողության մանրամասները:
Քոենն իսրայելական հեռուստատեսության 12-րդ ալիքին տված հարցազրույցում պատմել է այն մասին, որ այդ գաղտնի գործողությունը կատարվել է 2018 թ. հունվարի 31-ին: Դրան մասնակցել են «Մոսադի» 20 գործակալ: Իսրայելական հետախուզության նախկին ղեկավարը, բնականաբար, նրանց անունները չի հրապարակել, ուստի հայտնի չէ՝ արդյոք նրանք իսրայելցինե՞ր են, թե՞ ոչ բոլորը: Բացի այդ, նա պատմել է, որ միջուկային արխիվի գաղտնի փաստաթղթերը թվային եղանակով ավելի շուտ են ուղարկվել Թել Ավիվ, քան գործակալները կհասցնեին լքել Իրանը:
Հարկ է հիշեցնել, որ Իրանն ու Իսրայելը միշտ գտնվել են «սառը պատերազմի» վիճակում, սակայն վերջին ամիսներին ոչ միայն փոխադարձ մեղադրանքներ են հնչեցրել, այլեւ հարվածներ են հասցրել միմյանց նավերին: Մի քանի ամիս առաջ հարձակում կատարվեց Նաթանզում ուրանի հարստացման գործարանի վրա, եւ դրա մեջ Թեհրանը մեղադրեց Թել Ավիվին: Իսրայելը նաեւ հսկայական թվով ավիահարվածներ է հասցրել իրանական օբյեկտներին Սիրիայում, իրանական խմբավորումներին ու աշխարհազորայիններին:
Իրանի հոգեւոր առաջնորդ այաթոլլա Ալի Համենեին Իսրայելին ոչ թե պետություն է համարում, այլ ահաբեկիչների բազա: «Իսրայելը ոչ թե երկիր է, այլ ահաբեկչական բազա, որը գործում է պաղեստինյան ժողովրդի եւ մահմեդական մյուս ազգերի դեմ: Յուրաքանչյուրիս պարտքն է պայքարել այդ ռեժիմի դեմ»,- ասել է նա:
Անդրադառնալով Իսրայելի իրականացրած հակաիրանական բոլոր գործողություններին՝ հարց է առաջանում, թե որն է դրանց նպատակը: Միջուկային ֆիզիկոս Ֆահրիզադեի սպանությունը ոչինչ չի փոխի: Եթե մի պահ պատկերացնենք, որ Իրանի՝ ատոմային ռումբ ստեղծելու մտադրությունը ճշմարտություն է, ապա հասկանալի կլինի, որ իրանական միջուկային ու հրթիռային ծրագրերը կշարունակեն զարգանալ նաեւ առանց Ֆահրիզադեի: Ստացվում է, որ Իսրայելը ոչ թե վախենում է իրանական ատոմային ռումբի ստեղծումից, որը կարող է ուղղվել իր դեմ, այլեւ պարզապես շատ է ցանկանում սադրել Իրանին եւ ստիպել՝ իրականացնելու պատասխան գործողություններ: Եթե Իրանը վրեժ լուծի, դա հնարավոր կլինի որպես առիթ օգտագործել ամերիկյան հարվածի համար: Իսրայելական իշխանություններն արդեն երկու տասնամյակ փորձում են այնպես անել, որ ԱՄՆ-ն հարձակվի Իրանի վրա, սակայն ապարդյուն: Եթե նույնիսկ ԱՄՆ-ն չվերադառնա միջուկային գործարքին, որի ցանկությունն ունի, միեւնույն է, կրակից շագանակներ չի հանելու Իսրայելի համար: Ավելին՝ ամերիկյան շրջանակներում ոչ ոք տրամադրված չէ Արմագեդոն ստեղծել: Ոչ ոք վաղուց արդեն միջուկային զենք ունեցող Իսրայելին չի օգնի, որովհետեւ նրա այժմյան ռազմավարության մեջ ուղղակի լավ տարբերակներ չկան: Իրանի վրա հարձակումը կհանգեցնի մեծ պատերազմի Մերձավոր Արեւելքում, որում կայրվեն բոլորը, այդ թվում՝ պատերազմի հրձիգները:
Որոշ փորձագետներ գրեթե համոզված են, որ Իսրայելին չեն օգնի նաեւ Իրանի լիակատար մեկուսացումն ու արեւմտյան պատժամիջոցները: Ոչ այն պատճառով, որ Իրանը վաղ թե ուշ ատոմային ռումբ կստեղծի եւ այն կնետի Իսրայելի վրա: Իրանը դա չի անի, սակայն կշարունակի միավորել իսլամական աշխարհի այն ուժերին, որոնք չեն ընդունում Իսրայելի փորձերը՝ հավերժ պահպանելու ստատուս քվոն Պաղեստինում ու Երուսաղեմում:
Վաղ թե ուշ այս իրավիճակը կհանգուցալուծվի Իսրայելի պարտությամբ, երբ նա կզրկվի իր անդրօվկիանոսյան դաշնակցից, որն աստիճանաբար կկորցնի համաշխարհային հեգեմոնի կարգավիճակը: Հետո հրեական երիտասարդ պետությանը կհարվածեն ոչ թե այս կամ այն պետության զենքերը, այլ հենց իր գործած անարդարությունն այդքան կարճատեւ պատմության ընթացքում:
