Լիբանանի վարչապետի պաշտոնակատար Հասան Դիաբը նախազգուշացրել է երկրում հասունացող լուրջ ընդվզումների վտանգի մասին:
Դիաբը միջազգային համայնքին կոչ է արել օգնել տնտեսական ծանր ճգնաժամի մեջ գտնվող Լիբանանին, քանի դեռ կա ժամանակ:
Վարչապետի պաշտոնակատարը հանդիպել է Բեյրությում հավատարմագրված օտարերկրացի դիվանագետներին:
Համաշխարհային բանկը Լիբանանի իրավիճակն անվանել է «ամենածանր ճգնաժամն արդիական պատմության ընթացքում»:
Լիբանանի ազգային տարադրամն 90 տոկոսով արժեզրկվել է, բնակիչների կեսից ավելի հայտնվել է աղքատության պայմաններում: Վառելիքի եւ մի շարք այլ ապրանքների պակասը լարված կացություն է առաջացրել:
Անցյալ տարվա օգոստոսին Բեյրութի նավահանգստում տեղի ունեցած պայթյունից հետո Դիաբը հրաժարական է ներկայացրել եւ դրանից հետո կառավարությունը ղեկավարում է որպես վարչապետի պաշտոնակատար:
Կրոնական համայնքների սկզբունքով գործող քաղաքական ուժերը տարաձայնությունների հետեւանքով չեն կարողանում համաձայնեցնել կառավարության հարցը:
Եվրոպական միության արտաքին եւ անվտանգության հարցերով Բարձր ներկայացուցիչ Ժոզեպ Բորելը Լիբանանի քաղաքական վերնախավին է մեղադրում այդ քաոսային իրավիճակի համար, ասելով, որ պետական այրերը չեն կարողանում կառավարություն կազմել եւ բարեփոխումներ իրականացնել:
Միջազգային համայնքը նկատել է տվել, որ Լիբանանին չի սատարի, քանի դեռ այդ երկրում չեն պայքարում համատարած կոռուպցիայի դեմ:
Վարչապետի պաշտոնակատար Դիաբը խնդրում է օգնությունը չկապել կառավարության կազմավորման հետ:
«Ես կոչ եմ անում չպատժել Լիբանանի ժողովրդին կաշառակերների գործողությունների համար: Ո՞ր մեղքի համար շարքային լիբանանցին պետք է վճարի դրա գինը, մի՞թե կոռուպցիոներների հանցանքների համար լիբանանցին պետք է մահանա հիվանդանոցի դռան մոտ»,- ասել է վարչապետի պաշտոնակատարը:
Հասան Դիաբի խոսքով, Լիբանանում համազգային ընդվզումը կարող է մեկնարկել առաջիկա օրերին:
«Դա օրերի հարց է»,- նախազգուշացրել է Դիաբը:
