Այսօր Ուզբեկստանի մայրաքաղաք Տաշքենդում հանդիպել են Աֆղանստանի նախագահ Աշրաֆ Գանին եւ Ռուսաստանի արտգործնախարար Սերգեյ Լավրովը։
Քննարկման հիմնական թեման Աֆղանստանում շարունակվող ռազմական գործողություններն էին:
«Բանակցությունների ընթացքում ռուսական կողմը կարեւորել է Աֆղանստանում խաղաղության հաստատմանն ուղղված բանակցությունների օր առաջ մեկնարկը», – նշված է Ռուսաստանի ԱԳՆ հաղորդագրության մեջ։
Իրադրությունը Աֆղանստանում սրվել էր այստեղ գտնվող ամերիկյան եւ դաշնակից ուժերի շուտափույթ դուրսբերման ֆոնին։ Պաշտոնական Քաբուլը հայտարարում է, որ կառավարական ուժերին վերջին օրերին հաջողվել է որոշակիորեն կայունացնել իրադրությունը՝ հետ մղելով «Թալիբան» շարժման զինյալների հարձակումները։
«Այս պահին կենտրոնական իշխանությանը ենթարկվում են երկրի 325 գավառներից 190-ը», – այսօր Քաբուլում հայտարարել է կառավարության ներկայացուցիչ Նադեր Նադերին։
