Եվրամիության գլխավոր դիվանագետ Ժոզեպ Բորելը խորը մտահոգություն է հայտնել Կիպրոսի վերաբերյալ Թուրքիայի ծրագրերի կապակցությամբ՝ դրանք որակելով անընդունելի:
Թուրքիայի նախագահ Թայիփ Էրդողանն ասել է, որ խաղաղ բանակցությունները կարող են տեղի ունենալ միայն «երկու պետությունների» սկզբունքի հիման վրա, բայց այդ դիրքորոշումը մերժվում է Կիպրոսի եւ ԵՄ-ի կողմից: Հայտարարվել է նաեւ լքված Վարոշա հանգստավայրի մի փոքր մասի հնարավոր տեղափոխման ծրագրերի մասին:
«Եվրամիության բարձր ներկայացուցիչը իր խորը մտահոգությունն է հայտնում (Թուրքիայի) նախագահ Թայիփ Էրդողանի եւ Էրսին Թաթարի կողմից Վարոշայի տարածքի վերաբերյալ հուլիսի 20-ին արված հայտարարությունների կապակցությամբ, որոնք Վարոշայի կարգավիճակը փոխելու անընդունելի միակողմանի որոշում են»,- ասվում է Բորելի հայտարարության մեջ:
«ԵՄ-ն եւս մեկ անգամ ընդգծում է միջազգային իրավունքի խախտմամբ միակողմանի գործողություններից եւ նոր սադրանքներից խուսափելու անհրաժեշտությունը, որոնք կարող են մեծացնել լարվածությունը կղզում եւ սպառնալիքի տակ դնել Կիպրոսի խնդրի համապարփակ կարգավորման շուրջ բանակցությունների վերսկսումը»,- ասել է Բորելը:
