ԱՄՆ Ներկայացուցիչների պալատի անդամներ Դևիդ Սիսիլինը և Գաս Բիլիրակիսն օրինագիծ են պատրաստում, որում Պետդեպարտամենտին կոչ են անում դադարեցնել ամերիկյան դրոնային տեխնոլոգիաների լիցնեզիաների Թուրքիային փոխանցումը մինչ Կովկասում, Հարավային Ասիայում և Արևելյան Միջերկրականում Թուրքիայի դրոնային ծրագրերի ապակայունացնող դերին առնչվող պաշտոնական հետաքննության ավարտը։ Այս մասին հայտնում է ԱՄՆ Հայ դատի հանձնախումբը։
Նրանք պետքարտուղար Էնթոնի Բլինքենին ուղղված նամակում հայտարարել են, որ թուրքական անօդաչու թռչող սարքերն օգտագործվել են արցախահայության և քրդերի դեմ։
«Վերջին մեկ տարվա ընթացքում թուրքական անօդաչու թռչող սարքերն օգտագործվել են Ադրբեջանի կողմից Արցախի հայ քաղաքացիական բնակչության և Սիրիայում քրդական ուժերի դեմ, որոնք համագործակցել են ԱՄՆ-ի հետ ԻՊ-ի դեմ պատերազմում և Լիբիայի քաղաքացիական պատերազմում», – նշված է կոնգրեսականների նամակում: Ներկայացվում են նաև Արցախում Ադրբեջանի ծավալած մարտական գործողությունների վկայություններ, որոնք հաստատում են ամերիկյան տեխնոլոգիաների օգտագործումը թուրքական «Bayraktar» անօդաչու թռչող սարքերում:
