Տարբեր առիթներով ներկայացրել ենք, թե ինչպես Թուրքիան բավականին արդյունավետ կերպով կիրառում է «փափուկ ուժի» քաղաքականությունը իր ազդեցության ոլորտն ընդլայնելու եւ խորացնելու նպատակով։ Այդ ճանապարհն առավել լայնորեն է դրսեւորվում թյուրքական եւ իսլամական աշխարհում։
Այս օրերին (հուլիսի 28-30) Թաթարստանի Հանրապետությունում (ՌԴ) ընթանում է «Ռուսաստան-իսլամական աշխարհ. Կազանյան գագաթնաժողով 2021» 12-րդ միջազգային տնտեսական գագաթնաժողովը: Միջոցառման նպատակն է ամրապնդել առեւտրատնտեսական, գիտական, տեխնիկական, սոցիալ-մշակութային կապերը Ռուսաստանի եւ Իսլամական համագործակցության կազմակերպության (ԻՀԿ) անդամ երկրների միջեւ, ինչպես նաեւ խթանել Ռուսաստանի Դաշնությունում իսլամական ֆինանսական հաստատությունների զարգացումը:
Թաթարստանի նախագահ Ռուստամ Միննիխանովը, երեկ կառավարական նստավայրում ընդունելով Թուրքիայի առեւտրի նախարար Մեհմեդ Մուշին, նշել է, որ Թաթարստանը շահագրգռված է թուրք գործընկերների հետ համատեղ նախագծերի իրագործմամբ, նաեւ ընդգծել, որ երկրի առաջնահերթ խնդիրներից է Ռուսաստանի եւ իսլամական աշխարհի միջեւ տնտեսական փոխգործակցության ամրապնդումը: Ի դեպ, Թուրքիան Թաթարստանի հիմնական արտաքին տնտեսական գործընկերներից է եւ տարածաշրջանի տնտեսության մեջ ներդրել է ավելի քան 2 միլիարդ դոլար։ Այսօր Թաթարստանում գործում են շուրջ 60 թուրքական ընկերություններ։ Բացի առեւտրատնտեսական կապերից, Թաթարստանը եւ Թուրքիան համագործակցում են նաեւ մշակույթի, գիտության եւ կրթության, առողջապահության, սպորտի եւ զբոսաշրջության ոլորտներում: Գագաթնաժողովին ամենամեծ պատվիրակությամբ ներկայացել է Թուրքիան՝ ավելի քան 50 պատվիրակով, ինչը ցույց է տալիս այդ երկրի հետաքրքրվածությունը։
Մեհմեդ Մուշն իր հերթին խոսել է Թաթարստանի նկատմամբ թուրքական բիզնեսի հետաքրքրության աճի մասին՝ խոստանալով աջակցել Թուրքիայում թաթարստանյան ընկերությունների ներդրումային նախագծերին: Մինչ համավարակը, Թաթարստանի եւ Թուրքիայի միջեւ առեւտուրը գերազանցել է 480 մլն դոլարը, իսկ անցյալ տարվա կտվածքով առեւտրի ծավալը կազմել է 360 մլն դոլար: «Անադոլու» գործակալության փոխանցմամբ, Թուրքիայի առեւտրի նախարարը հույս է հայտնել, որ կարճաժամկետ հեռանկարում կկարողանան վերականգնել դիրքերը եւ շրջանառության ծավալը հասցնել 1 մլրդ դոլարի:
«Ռուսաստան-իսլամական աշխարհ» 12-րդ միջազգային տնտեսական գագաթնաժողովի մասնակիցներին ուղերձով ողջունել է ՌԴ նախագահ Վլադիմիր Պուտինը, ընդգծելով, որ մահմեդական երկրների գործընկերները կարող են լիովին ապավինել Ռուսաստանի աջակցությանն ու օգնությանը` տարածաշրջանային ճգնաժամերը հաղթահարելու, ինչպես նաեւ ահաբեկչության եւ ծայրահեղականության բոլոր դրսեւորումներին դիմակայելու հարցում։
Թաթարստանն իր աշխարհագրական դիրքով յուրատեսակ կամուրջ է Ռուսաստանի եվրոպական եւ ասիական մասերի միջեւ, իսկ մայրաքաղաք Կազանը կրում է «Ռուսաստանի երրորդ մայրաքաղաքի» ոչ պաշտոնական անվանումը, թեպետ այդ տիտղոսի մասով ունի մրցակիցներ։ Թաթարստանի բնակչության կեսից ավելին իսլամադավան են, ինչը նույնպես կրոնական տեսանկյունից թույլ է տալիս Թուրքիային օգտվելու «փափուկ ուժի» ընձեռած հնարավորություններից։ Միեւնույն ժամանակ դա գործոն է, որի հետ ՌԴ կենտրոնական իշխանությունը չի կարող հաշվի չնստել։
