Հոնկոնգում Չինաստանի ԱԳՆ պաշտոնական ներկայացուցիչը դատապարտել է հոնկոնգցիներին անվտանգ ապաստան տրամադրելու ԱՄՆ-ի որոշումը՝ որպես «դավադրություն Չինաստանի դեմ եւ քաղաքում անկարգությունների հրահրում»: Այս մասին հաղորդում է The Independent-ը:
Չինաստանի ԱԳՆ-ի հայտարարությունը հետեւել է ԱՄՆ նախագահ Ջո Բայդենի հրամանին, որը թույլ է տալիս Հոնկոնգից այն մարդկանց, ովքեր արդեն ԱՄՆ-ի բնակիչներ են, մնալ երկրում 18 ամիս՝ ի պատասխան Պեկինի կողմից ժողովրդավարական շարժման դեմ ճնշումների:
Չինաստանը նաեւ հայտարարել է, որ Միացյալ Նահանգները «բացահայտորեն միջամտում է Հոնկոնգի գործերին եւ Չինաստանի ներքին քաղաքականությանը եւ ոտնահարում է միջազգային իրավունքի եւ հարաբերությունների հիմնական սկզբունքները»:
Չինաստանը Հոնկոնգի ազգային անվտանգության մասին օրենքն ընդունել է 2020 թվականին:
Անցյալ ամառ ուժի մեջ մտնելուց ի վեր, չինացի պաշտոնյաներն օրենքն օգտագործել են ավելի քան 100 քաղաքական գործիչների եւ ակտիվիստների ձերբակալելու, դատական իշխանության անկախությունը խարխլելու եւ ժողովրդավարամետ Apple Daily թերթը փակելու համար:
