Աֆղանստանում իշխանության զավթումից հետո արմատական «Թալիբան» շարժման առաջնորդների հիմնական նպատակը միջազգային ասպարեզում պաշտոնական ճանաչում ստանալն է:
Նման կարծիք է Lenta.ru-ի հետ զրույցում հայտնել Սանկտ Պետերբուրգի պետական համալսարանի հետխորհրդային տարածքի միջազգային հարաբերությունների ամբիոնի դոցենտ Ռուսլան Շամգունովը:
«Հասկանալի է, որ առաջիկա նպատակը համաշխարհային ճանաչում ձեռք բերելն ու «ահաբեկչական կազմակերպության» պիտակն իրեն վրայից հանելն է»,- ասել է գիտնականը: Նա ենթադրել է, որ թալիբները չեն ոտնձգի հարեւան պետությունների տարածքային ամբողջականությանը, բայց դեմ չեն լինի, եթե նրանց բնակիչները դառնան «բարեպաշտ մահմեդականներ»:
Lenta.ru-ի հետ զրույցում համանման կարծիք է հայտնել նաեւ Լոնդոնի Birkbeck համալսարանի պրոֆեսոր Ռոբերտ Սինգհը: Նա թալիբների հիմնական խնդիրներից է անվանել օտարերկրյա ներդրումների ներգրավումը եւ միջազգային առեւտրի վերականգնումը: «Վաղ թե ուշ թալիբների իրական դեմքը նորից կերեւա, եւ նրանք կշարունակեն թալանել, սպանել եւ կառուցել իրենց արմատական կարգը»,- վստահեցրել է գիտնականը:
«Վալդայ» ակումբի փորձագետ Իվան Սաֆրանչուկը Lente.ru-ին հայտարարել է, որ թալիբներն անշուշտ կփորձեն Աֆղանստանում հաստատել նույն ռեժիմը, ինչ նրանք ունեին 1990-ականներին: Նա թույլ է տվել, որ գրոհայինները մի փոքր կմեղմացնեն իրենց քաղաքականությունը, սակայն դա ուժեղ դեր չի խաղա:
