Սեպտեմբերի 3-ի գիշերն Իսրայելը հարված հասցրեց Սիրիայի տարածքին: Կապված դրա հետ՝ ռուսական «Խմեյմիմ» բազայի ներկայացուցիչը հաղորդեց, որ «Բուկ» եւ «Պանցիր» համակարգերը, որոնք սիրիական բանակի զինանոցում են, խփել են 24 հրթիռից 21-ը, որոնք արձակվել են իսրայելական ինքնաթիռներից: Ինչպես գրում է Հորդանանի «Al Rai»-ի թերթի հոդվածագիր Մուհամմեդ Հարուբը, Թել Ավիվը որսաց «նուրբ ակնարկը», ուստի ԱԳ նախարար Լապիդը շտապեց Մոսկվա:
Իսրայելի արտաքին գործերի նախարար Յաիր Լապիդի կարճաժամկետ այցը Մոսկվա, որ տեղի ունեցավ երեկ, արտահայտում է Իսրայելի աճող լարվածությունը, որ Ռուսաստանն արմատապես փոխել է իր վերաբերմունքն իսրայելական ավիահարվածների նկատմամբ, որոնք կատարվում են սիրիական ռազմական օբյեկտների ուղղությամբ ինչպես Դամասկոսի մոտ, այնպես էլ այլ տեղերում: Իսրայելական իշխանությունները թաքնվում են այն ստի հետեւում, որ հարվածների են ենթարկվում «Հըզբոլլահի» եւ իրանամետ ոստիկանության դիրքերը:
Ծայրահեղ աջ քաղաքական գործիչ Նաֆտալի Բեննետի գլխավորությամբ նոր կառավարության իշխանության գալուց հետո Թել Ավիվի եւ Մոսկվայի հարաբերություններում նկատելի սառնություն է զգացվում: Դա տարբերվում է այն բանից, ինչ կար Նաթանյահուի դարաշրջանում: Իսրայելի նախկին վարչապետը Մոսկվա է այցելել ու հանդիպել ՌԴ նախագահ Վլադիմիր Պուտինի հետ՝ ակնհայտորեն ակնարկելով, որ Սիրիայի հարցով «որոշակի պայմանավորվածություններ» կան իրենց ու Կրեմլի միջեւ: Իսրայելը որսաց ռուս զինվորականների եւս մեկ «նուրբ ակնարկը», երբ նրանք հայտարարեցին. «Սեպտեմբերի 3-ին, ժամը 01:30-ի մոտ Իսրայելի F-15 մարտավարական ինքնաթիռները Լիբանանի օդային տարածքից 24 կառավարվող հրթիռներով հարված հասցրեցին Սիրիայի Արաբական Հանրապետությանը»:
Իսրայելը խորապես անհանգստացած է այդ հայտարարություններից: Ռուսական հատուկ ծառայություններն ուշադիր հետեւում են յուրաքանչյուր գրոհին, ինչի մասին վկայում են մանրամասները՝ հրապարակված Հակամարտող կողմերի հաշտեցման կենտրոնի կողմից: Ավելին՝ սիրիական բանակի հրթիռների բեկորները, որոնք ընկել են Թել Ավիվի շրջանում, պատահականություն կամ սխալ չեն:
Արդյոք փոխվե՞լ են խաղի կանոնները, որոնցով Թել Ավիվն առաջնորդվել է Նաթանյահուի օրոք: Իսկ ինչպե՞ս կվարվի իսրայելական նոր կառավարությունը, որն ընդամենը մի քանի շաբաթ է, ինչ իշխանության ղեկին է: Մոսկվան առայժմ «փակում է աչքերը» եւ չտեսնելու տալիս իսրայելցիների գործողությունները: Ի միջի այլոց, միայն արաբական, ամերիկյան ու եվրոպական ԶԼՄ-ներն են աջակցում Իսրայելին համակարգված արշավի շրջանակներում՝ ուղղված Ռուսաստանի դերի վարկաբեկմանը Սիրիայում ու ռուս-սիրիական հարաբերությունների խաթարմանը, սակայն մյուսները հանդես են գալիս իսրայելական ռեյդերի, բանդիտիզմի ու սիրիական օդային տարածության չարաշահման դեմ: Իսրայելը ստում է նաեւ, որ Իրանը հասել է իր սահմաններին կամ դրանց մոտ է, ստում է, երբ ասում է, որ Թել Ավիվը կդադարեցնի իր ռեյդերը, երբ վստահ կլինի, որ Իրանը վերջնականապես հեռացել է Սիրիայից:
Մոսկվան ոչ երկիմաստ ուղերձներ ու ազդակներ է հղում Իսրայելին եւ տարածաշրջանի բոլոր շահագրգիռ կողմերին, հատկապես ամերիկա-ռուսական խորհրդակցություններից հետո: Մոսկվան եւ Վաշինգտոնը, իբր, պայմանավորվել են իսրայելական հարձակումներին վերջ դնելու անհրաժեշտության մասին, քանի որ դա կարող է տարածաշրջանը ներքաշել նոր ռազմական հակամարտության կամ նույնիսկ լայնածավալ ռազմական գործողությունների մեջ: Վաշինգտոնը չի ցանկանում նոր պատերազմի մեջ մտնել Աֆղանստանից, Իրաքից ամերիկյան ուժերի դուրսբերումից, Սիրիայի հյուսիսում եւ արեւելքում տարածքների օկուպացիայից եւ քրդերին՝ «Սիրիայի ժողովրդավարական ուժին» աջակցությունից հետո:
Մոսկվան բացասաբար է վերաբերվում Սիրիայի տարածքի վրա Իսրայելի հարձակումներին: Այն փաստը, որ իսրայելական ինքնաթիռները չեն ներխուժել Սիրիայի օդային տարածք եւ Լիբանանի տարածքից են հրթիռներ արձակել, վկայում է հետեւյալը. Թել Ավիվը մտավախություն ունի, որ իր ինքնաթիռներից մեկը կարող են խոցել սիրիական բանակում գործող ռուսական ՀՕՊ համակարգերը: Դա կարող է նպաստել ռուս-իսրայելական հակամարտության բռնկմանը: Չենք կարծում, որ Իսրայելը պատրաստ է դրան, չնայած իր քաղաքական գործիչների եւ զինվորականների բարձրագոչ հայտարարություններին. նրանք վստահ են, որ իրենց հիմնական ռազմավարական դաշնակիցը՝ ԱՄՆ-ը, դա թույլ չի տա:
Իսրայելը կարծում է, որ կարող է ռուսներին ընտելացնել, ինչպես Նաթանյահուն փորձեց անել: Նա կշարունակի կառչած մնալ այս պատրանքից, եթե հավատա Ռուսաստանին դիմակայելու պատրաստակամության մասին ԱՄՆ-ի հայտարարություններին: Իր հերթին՝ ԱՄՆ պաշտպանության նախարարը խոստացել է, որ Վաշինգտոնը դասեր կքաղի Աֆղանստանի իրադարձություններից: Այդ մասին նա հայտարարել է Աֆղանստանում ջախջախիչ պարտությունից եւ ՆԱՏՕ-ի գործընկեր երկրների կողմից կոշտ քննադատության ենթարկվելուց հետո:
Լապիդը Մոսկվա է ժամանել առանց լրագրողների, ինչը վկայում է ՌԴ արտգործնախարար Սերգեյ Լավրովի հետ բանակցությունների փակ բնույթի մասին: Ճիշտ է՝ ԶԼՄ-ները բացահայտել են, որ Իսրայելը վախենում է Ռուսաստանի վերաբերմունքից՝ կապված Սիրիային իր օդային հարվածների հետ, սակայն ակնհայտ է, որ օրակարգում կլինի նաեւ պաղեստինյան թեման:
