Իսրայելի «Մոսադ» հետախուզական գերատեսչությունը ներքին խոր ճգնաժամ է ապրում: Տեղի ԶԼՄ-ները հաղորդում են մի շարք բարձրաստիճան սպաների հրաժարականների մասին՝ ի նշան բողոքի գործակալության ղեկավար Դեյվիդ Բարնեայի նոր քաղաքականության դեմ, ով պաշտոնը ստանձնել է այս տարի: Շրջանառվող լուրերի համաձայն՝ նա նախաձեռնել է մի շարք գերատեսչությունների լուծարումը դրանց «հնացած լինելու» պատճառով, ինչն առաջացրել է ծառայության վետերանների դժգոհությունը։ Իսրայելական հետախուզական հանրության որոշ ներկայացուցիչներ ենթադրում են, որ Բարնեայի պատճառով ստեղծված իրավիճակը կարող է խաթարել ռազմավարական կարեւորության գործողությունների իրականացումը:
Մի քանի շաբաթվա ընթացքում գործակալությունը լքել են երեք բարձրաստիճան սպաներ: Այս մասին գրում են իսրայելական լրատվամիջոցները: Չորրորդը, ըստ նույն տեղեկությունների, դիտարկում է ծառայությունից հեռանալու տարբերակը: Պատճառը վարչության ներկայիս տնօրենի հետ տարաձայնություններն էին. հետախուզության վետերանները բողոքում էին ստորաբաժանումների միջեւ պարտականությունների բաշխման վերաբերյալ նրա կազմակերպչական որոշումների դեմ։ Դեյվիդ Բարնեան վերացրել է միանգամից մի քանի բաժանմունք, որոնք համարել է հին ու անօգուտ, իսկ որոշները միացրել է իրար։ Հատկանշական է, որ հրաժարական տվածների թվում են տեխնոլոգիական բաժանմունքի պետը, գործողությունների բաժանմունքի եւ հակաահաբեկչական արշավով զբաղվող կառույցի ղեկավարները։
Բարնեան նոր պաշտոնին անցել է հունիսի սկզբին՝ դառնալով առանցքային հետախուզական գործակալության 13-րդ ղեկավարը: Այս նշանակումը շատ ենթադրություններ է առաջացրել, թե «Մոսադի» քաղաքականությունն ապագայում դեպի ուր է շարժվելու: Նրա նախորդը՝ Յոսի Քոենը, նախկին վարչապետ Բենիամին Նաթանյահուի կողմնակիցն էր, ինչը դիտորդներին նույնիսկ ստիպել է հետախույզին դիտարկել որպես կառավարության ղեկավարի պաշտոնում Նաթանյահուին հնարավոր փոխարինողի: Քոենի վրա էր դրվում այն աշխատանքը, որը Նաթանյահուին հնարավորություն էր տալիս քաղաքական միավորներ վաստակել: Օրինակ՝ նրան համարում են հրեական պետության ու արաբական աշխարհի երկրների միջեւ հարաբերությունների նորմալացման գործընթացի հիմնական համակարգող:
«Մոսադի» թիրախային չեզոքացումների մասին «Վերածնվիր եւ առաջինը սպանիր» գրքի հեղինակ Ռոնեն Բերգմանը պնդում է, որ Բարնեայի եւ նրա նախորդի միջեւ տարբերությունն ապշեցուցիչ է: Նրա խոսքերով՝ գերատեսչության նախկին ղեկավարներն իրենց գլխավոր առաքելությունը տեսնում էին այն բանում, որ հավաքեն հետախուզական տվյալներ եւ հատուկ գործողությունների համար հնարավորություններ մշակեն միայն ծայրահեղ դեպքում, մինչդեռ այժմյան տնօրենը «ավելի շատ կենտրոնանում է օպերատիվ տեղեկատվության հավաքագրման վրա, որը միանգամից կարող է վերածվել մարտավարական գործողությունների՝ միտված ռազմավարական փոփոխությունների նվաճմանը: Այլ խոսքերով՝ Բարնեան ագրեսիվորեն տրամադրված է դիվերսիոն գործողություններ իրականացնել առանցքային դեմքերի եւ հակառակորդների օբյեկտների նկատմամբ։
Բարնեայի նորամուծություններից մեկը լրագրողների հետ փոխգործակցության քաղաքականությունն է։ Եթե Քոենի օրոք գործակալությունը կարող էր զգույշ ազդանշաններ ուղարկել իր հակառակորդներին ԶԼՄ-ներում արտահոսքի միջոցով, ապա, ըստ «Հաարեց» թերթի մեկնաբան Յոսի Մելմանի, «Մոսադի» նոր ղեկավարը նախազգուշացրել է ներկա եւ նախկին պաշտոնյաներին, որ կպատժի յուրաքանչյուրին, ով ընթացիկ եւ անցյալի լրտեսական գործողությունների մասին բաց տեքստով կխոսի մամուլի ներկայացուցիչների հետ առանց իր թույլտվության՝ կարեւոր չէ՝ ձայնագրությամբ, թե ոչ պաշտոնապես: «Նա պլանավորում է «Մոսադին» վերադարձնել այն օրերը, երբ լռությունն իսկապես ոսկի էր»,- ասում է Մելմանը:
Հետախուզական գործակալության ղեկավարին բնութագրում է նաեւ այն, որ նա բարձր տեխնոլոգիաների ֆանատ է: Կարծիք կա, որ իրանյան միջուկային ֆիզիկոս Մոհսեն Ֆահրիզադեի սպանությունը Թեհրանի նահանգում 2020 թ. ռոբոտացված գնդացրի օգնությամբ Բարնեայի պլանավորած գործողությունն էր: Նրա գործընկերների խոսքերով՝ դա ոչ միայն արտացոլում է Բարնեայի «ոչ ստանդարտ մոտեցումն» առաջադրանքների կատարման գործում, այլեւ նրա վճռականությունը՝ կատարելագործելու օպերատիվ գործունեությունը նոր գաջեթների հաշվին: Ինչպես վստահեցնում է Մելմանը, չնայած «Մոսադի» նոր ղեկավարը կես տարուց էլ պակաս ժամանակ է, ինչ նոր պաշտոնում է, բայց հասցրել է ստեղծել նոր ստորաբաժանումներ, որոնք իրենց աշխատանքում շեշտը դնում են բարձր տեխնոլոգիաների վրա: Բացառված չէ, որ դա իր դերն է խաղացել հատուկ ծառայության ներսում որոշ բաժանմունքների լուծարման գործում: Այժմ արտաքին հետախուզության գործակալությունը ցնցում է ապրում՝ կապված պաշտոնանկությունների շարքի հետ: Տարածաշրջանային հանդեսները վկայակոչում են «Մոսադի» ներսում ինսայդերների, ովքեր ասում են, որ վերջին զարգացումները կխաթարեն գործակալության ռազմավարական կարեւոր գործողությունները: Բացի այդ, Բարնեայի քաղաքականությունը, նրանց խոսքերով, կարող է պատճառ դառնալ, որ բարձրաստիճան շատ սպաներ ստիպված լքեն ծառայությունը, ինչը կհանգեցնի իսրայելական հետախուզական համայնքում դժգոհության մակարդակի աճին: Վտանգավոր է նաեւ այն, որ պաշտոնանկությունների գործընթացն ազդել է նաեւ շարունակականության խնդրի վրա: Նախկին օպերատիվ աշխատակիցների խոսքերով՝ թոշակի անցածներից առնվազն երկուսը համարվում էին տնօրենի պաշտոնի հիմնական թեկնածու, երբ ավարտվի Բարնեայի պաշտոնավարումը:
Բացառված չէ, որ «Մոսադում» ստեղծված իրավիճակը նաեւ այն բանի հետեւանք է, որ հոկտեմբերին Անկարան հայտարարեց, թե բացահայտել է լրտեսական ցանց, որը կապված է իսրայելական հետախուզության հետ: Թուրքիայի ազգային հետախուզական ծառայությունը երկրի 4 նահանգում հատուկ գործողության շնորհիվ բացահայտեց լրտեսական 5 բջիջ, յուրաքանչյուրում՝ 3 մարդ: Բոլոր 15 անդամները ձերբակալվեցին: Նրանք իսրայելցիներին տեղեկատվություն են տրամադրել արտասահմանյան ուսանողների մասին, ովքեր սովորում են թուրքական համալսարաններում: Ուշադրության կենտրոնում են եղել այն ուսանողները, ովքեր ապագայում կարող են աշխատել պաշտպանական արդյունաբերությունում: Բջիջներից մեկի անդամներին հանձնարարվել է կապեր պահպանել «Մոսադի» օպերատիվ աշխատակիցների հետ, իսկ հանդիպումները կազմակերպել արտասահմանում: Այդ հանդիպումների ընթացքում տեղեկատվությունն ու փաստաթղթերը, որոնք հետաքրքրել են Իսրայելին, փոխանցվել են «Մոսադի» աշխատակիցներին:
Ուշագրավ մի փաստ. լրտեսներից մեկը՝ Ա. Բ.-ն, եղել է ցանցի ամենակարեւոր անդամներից մեկը, նրան հանձնարարվել է հետեւել Թուրքիայում սովորող պաղեստինցիներին: Լրտեսական ցանցի անդամներին հանձնարարվել էր տեղեկություններ հավաքել թուրքական համալսարաններ հաճախող պաղեստինցիների մասին եւ պարզել, թե նրանց ինչ հնարավորություններ են առաջարկում կառավարությունն ու քաղաքապետարանները։ Ցանցն այնուհետեւ օգտագործել է այս տեղեկատվությունը ֆիզիկական անձանց պրոֆիլներ կազմելու համար, որոնք ուղարկվել են «Մոսադի» աշխատակիցներին արտասահմանում՝ օգտագործելով ծածկագրված վեբ ծրագրեր: Ցանցը նաեւ ուսումնասիրել է Թուրքիայում գործող տարբեր ասոցիացիաներ ու կազմակերպություններ եւ իր եզրակացություններով կիսվել իսրայելցիների հետ:
